მამულიჩა ჭორებმა დაღალა

მომღერალ ლელა წურწუმიასა და პროდიუსერ კახა მამულაშვილის , ანუ , როგორც შოუბიზნესურ წრეებში იცნობენ, მამულიჩას, ოჯახი წლებს ითვლის. უკვე ვერავის წარმოუდგენია ლელა მამულიჩას გარეშე და პირიქით. საქმესაც ერთად აკეთებენ ასევე ძალიან ბევრი წელია. ამ ხნის განმავლობაში მათზე არაერთი ჭორი გავრცელებულა, მათ შორის წყვილის დაშორებაზეც.

მორიგი ჭორი მათ დაშორებაზე ახლახან შევიტყვეთ. როგორც ამბობენ, კახას ძალიან ხშირად ნახულობენ ცალკე, კლუბებში, სადაც მეგობრებთან ერთად ერთობა. ლელა, როგორც მოგეხსენებათ, „ახალი ხმის“ ჟიურიშია დაკავებული, მან თავისი გუნდი უკვე შეაგროვა და გადაცემის ჩანაწერების ეთერში გასვლის შემდეგ უკვე ლაივშოუებისთვის ემზადება.

გავრცელებული ხმის გადასამოწმებლად მამულიჩას დავუკავშირდი, რომელმაც ჩვეული იუმორით მიპასუხა ყველა შეკითხვაზე და თან, ისე, რომ გამოცდილი ბუკლიკოც კი დააბნია. ყველა კითხვას ნახევრად ხუმრობით და ნახევრად სერიოზულად პასუხობდა, ბოლოს მაინც გამოვტყუე სიმართლე.

- ერთ კითხვას დაგისვამ. უკვე მერამდენედ გავრცელდა ჭორი, რომ შენ და ლელა ერთმანეთს დაშორდით. კახა ცალკე დადის და ლელა „ახალ ხმაზეა“ გადართულიო.
- (იცინის) მოკლედ, არ მეშვებიან, რა...
- არ გეშვებიან და ეს ჭორიც კარგა ხანია, გავრცელდა.
- მჯერა, რომ გავრცელდა. დაწერე, რომ ეგრეა, შენც დაისვენებ, მეც და ჭორს ვინც ავრცელებს, ისინიც (იცინის).
- ასე ვერ დავწერ, თუ სიმართლეს არ შეესაბამება.
- მაშინ, ნოუ კომენტ. დევს ამ პასუხში ინტრიგა?.. არც უარყო და არც დაადასტურაო, დაწერე (იცინის).
- კარგი, რა... მაინტერესებს, „ახალ ხმაზე“ თუ ეხმარები?
- ვეხმარები, უბრალოდ, არ ვჩანვარ. ფსიქოლოგიურად ვეხმარები (იცინის). პრინციპში, სიმართლე რომ გითხრა, პროექტში არ ვერევი. ჩვენ ცოტა გვიან მივედით „ახალ ხმაში“ , ამიტომ მე მხოლოდ ვაკვირდები. ისე, ღადაობის გარეშე თუ ვილაპარაკებთ ამ ჭორებზე, ამან ძალიან დამღალა.
- კლუბებში ლელას გარეშე დადისო, ამბობენ.
- ლელას არ უყვარს კლუბებში სიარული, მე მიყვარს.

დიჯეი ბუკლე
ჟურნალი „რეიტინგი“