თამთა შედანია და ერეკლე მანგოშვილი მალე ჯვარს დაიწერენ

"მის საქართველო 2012" თამთა შედანია, როგორც კი გვირგვინს სხვა ლამაზმანს გადაულოცავს, საყვარელ მამაკაცთან, ახალგაზრდა ბიზნესმენ ერეკლე მანგოშვილთან ხელს მოაწერს და პომპეზურ ქორწილსაც გადაიხდის. მანამდე კი ჯვარს დაიწერენ და ღვთის წინაშე სიყვარულის ფიცს დადებენ.
თამთამ და ერეკლემ ერთმანეთი წელიწადნახევრის წინ გაიცნეს. ეს დრო სრულიად საკმარისი აღმოჩნდა იმისთვის, რომ ერთმანეთში ბევრი საერთო თვისება აღმოეჩინათ. თამთამ მასში ევროპულად მოაზროვნე მამაკაცი დაინახა, რომელსაც ლამაზი ქალის გვერდით ყოფნა არ აკომპლექსებს და არც რამეს უკრძალავს. ერეკლე თამთას ჰპირდება, რომ კარიერაში ყველანაირად შეუწყობს ხელს და სამოდელო სააგენტოსაც გაუკეთებს.
ერეკლე: თამთა პირველად სილამაზის სალონში. დავინახე და მაშინვე ძალიან მომეწონა. მივხვდი, რომ მოდელი იქნებოდა. იმ დღეს არანაირი ინიციატივა არ გამომიჩენია. მეორედაც იმავე სალონში შევხვდი სრულიად დაუგეგმავად და მაშინ გამოველაპარაკე. ასე დაიწყო ყველაფერი.
თამთა: ერეკლე დავინახე თუ არა, ძალიან მომეწონა. ყურადღება იმით მიიპყრო, რომ ჩემ მიმართ არანაირი რეაქცია არ ჰქონია, წესიერად არც შემოუხედავს, თითქოს იქ არც ვყოფილიყავი. ასე დამაინტრიგა. სალონში არაფერი მიკითხავს მასზე. მერე გავიგე, რომ ჩემი წასვლის შემდეგ სტილისტებს დაუწყიათ ლაპარაკი, ვინც ვიყავი და ა.შ.
ერეკლე: სალონში მითხრეს, რომ თამთას მამა ძალიან ცუდად იყო... მიუხედავად იმისა, რომ მასზე ყველაფერი გავარკვიე და მობილური ტელეფონის ნომერიც გავიგე, არ მიმოქმედია, შესაფერის დროს დაველოდე. თამთას მამის მდგომარეობა გულთან ახლოს მივიტანე. პირველად სწორედ მამამისის მოსაკითხად დავურეკე.
თამთა: ერეკლეს ასეთი საქციელი ჩემთვის მოულოდნელი იყო. ჩვენი საუბარი ძალიან ცოტა ხანს გაგრძელდა. იმ პერიოდში "მის საქართველოს" კონკურსისთვის პროფაილი უნდა გადაგვეღო რაბათის ციხეში. ღამის 2 საათზე გაისმა ზარი, ერეკლე მომესალმა და მითხრა, ახალციხეში შენ სანახავად მოვდივარ და რა გინდა, წამოგიღოო.
– ახალგაცნობილი ბიჭისგან ასეთი საქციელი არ გაგიკვირდათ?
თამთა: მაშინვე გამიჩნდა კითხვა: "რატომ მოდის?". ვფიქრობდი, ის არც ჩემი შეყვარებულია, არც – მეგობარი... ბევრი რომ არ გავაგრძელო, ერეკლემ ბარში შეიარა და ჩემთვის და გოგოებისთვის სუში წამოიღო. თუმცა ჩამოსვლა ისე დააგვიანდა, დავურეკე, გვიანია და ვეღარ შეგხვდები–მეთქი. რა უნდა ექნა, შუა გზიდან გაბრუნდა. მეორე დღეს კი ისე ჩამოვიდა, არც კი გავუფრთხილებივარ. საერთოდ, ერეკლეს სიურპრიზები ძალიან უყვარს. რაღა დაგიმალოთ და, მაშინ მისი საქციელით ძალიან მოვიხიბლე.
ერეკლე: თამთას გულის მოგება ადვილი არ იყო. ჩემი მიდგომით და ტაქტიკით, მასთან საერთო ენის გამონახვა მაინც მოვახერხე.
– ალბათ ბევრი საერთოც აღმოაჩინეთ ერთმანეთში და ამანაც გაგიადვილათ ურთიერთობა.
თამთა: კი, ასე იყო. მე და ერეკლე ერთმანეთს ხასიათებით ძალიან ვგავართ. ერთნაირი გემოვნება გვაქვს, ჩემსავით რომანტიკულია.
ერეკლე: თამთაში ვხედავდი იმ ადამიანს, რომელსაც მთელ ჩემს ცხოვრებას დავუკავშირებდი. როცა ლაპარაკობს, ხანდახან მგონია, რომ ჩემს სათქმელს ამბობს და ამაზე მეტი მსგავსება რა გინდათ? უახლოესი მეგობრებიც ხშირად მეუბნებიან, რომ მე და თამთა ერთმანეთს საოცრად ვგავართ. მგონი, ის სტერეოტიპი, რომ ქართველი მამაკაცები რომანტიკულები არ არიან, დავარღვიე. თამთამაც აბსოლუტურად შეცვალა ჩემი წარმოდგენა მოდელ გოგონებზე.
– მანამდე რას ფიქრობდით მოდელებზე, რა არ მოგწონდათ მათში?

ერეკლე: ვერ წარმომედგინა, რომ მოდელს გარეგნობის მიღმა შეიძლებოდა სულიერი ღირებულებები ჰქონოდა. მეგონა, არაფრის გაკეთება იცოდნენ. ისიც უნდა ვთქვა, რომ ერთი–ორმა მოდელმა, რომლებიც თამთასგან გავიცანი, ჩემი ძველი წარმოდგენა ამ პროფესიის ადამიანებზე გაამართლა. თამთა კი აბსოლუტურად განსხვავებული, ჩამოყალიბებული ადამიანია. იცის, რა უნდა, რა მიზნები აქვს. ამაშიც ერთმანეთს ვგავართ. ჩემი ცხოვრება თავად "გავქაჩე". 15 წლიდან ვმუშაობ. შრომისმოყვარე ადამიანებს პატივს ვცემ, უსაქმურებს კი ვერ ვიტან. არც ერთი ჩემი ძმაკაცი არ არის უსაქმური, ასეთები ვინც იყვნენ, ყველა ჩამოვიშორე. თამთაც პატარა ასაკიდან მარტო "ქაჩავს", თავდაუზოგავად შრომობს. ესეც ერთ–ერთი თვისება იყო, რითიც მოვიხიბლე და დიდი ყურადღება მივაქციე.
– შეიძლება შეყვარებულები ერთმანეთს ჰგავდნენ, მაგრამ რაღაცეებში ვერ გაუგონ ერთიმეორეს და იჩხუბონ. თქვენს ურთიერთობაში თუ ყოფილა მსგავსი რამ?
ერეკლე: როგორ არა! გვიჩხუბია, მაგრამ ლაპარაკით, ტაქტიანი მიდგომით ყველაფერი დალაგებულა. თუმცა, ისიც უნდა ითქვას, რომ ჩვენ შორის დიდი გაუგებრობა არასოდეს ყოფილა, ერთმანეთისთვის თეფშები არასოდეს გვისვრია.
თამთა: პრობლემას ყოველთვის საუბრით ვაგვარებთ. ბუტია არ ვარ.
ერეკლე: მაგრამ ხანდახან ხოლმე თავს... (იცინიან).
– თამთა, არის ისეთი რამ, რასაც ერეკლე გიკრძალავთ. რა მოთხოვნები აქვს მას?
თამთა: არ მახსოვს, რამე აეკრძალოს. ერეკლეს გაცნობამდე ქართველ მამაკაცებზე ცოტა სხვანაირი წარმოდგენა მქონდა. ჩემ ირგვლივ კაცებს რომ ვუყურებდი, ქალებს სულ რაღაცას უკრძალავდნენ. მეგონა, ყველა ქართველი კაცი ასეთი იყო. ვერასოდეს წარმოვიდგენდი, საქართველოში ერეკლესნაირ განსხვავებულ მამაკაცს თუ ვიპოვიდი. მას არ აქვს იმის კომპლექსი, რომ გვერდით ლამაზი ქალი ჰყავდეს. არ არის ტიპური ქართველი, თანამედროვე, ევროპულად მოაზროვნე ადამიანია. ძალიან გამიმართლა.
ერეკლე: თამთა არასოდეს მაძლევს იმის საბაბს, რომ რამე ავუკრძალო. მეც მაქვს ჩემი "ხუშტურები", ბოლოს და ბოლოს ქართველი კაცი ვარ, უბრალოდ სხვანაირად ვაზროვნებ. არ მაქვს იმის პრეტენზია, რომ თამთამ მოკლე კაბა ჩაიცვას, მაგრამ ეს არ უნდა იყოს ვულგარული. მსიამოვნებს, რომ ჩემ გვერდით ლამაზი და წარმატებული ქალი დგას. მისი თითოეული წინგადადგმული ნაბიჯით ვამაყობ. ვცდილობ, ხელი შევუწყო, რომ უფრო მეტს მიაღწიოს. თამთა რომ "მის საქართველოა" და 2012 წლის ყველაზე ლამაზ გოგოდ აღიარეს, მაგრად მსიამოვნებს.
– თამთა ყურადღების ცენტრში ხშირად ექცევა. ეს ხომ არ გაღიზიანებთ ან ხომ არ ეჭვიანობთ?
ერეკლე: არა, რას ამბობთ! ამას "ვქაჩავ" და სულ "გავქაჩავ".
თამთა: თუ გგონიათ, რომ საზოგადოების თავშეყრის ადგილებში ერეკლე ყურადღების ცენტრში არ ექცევა, ძალიან ცდებით.
ერეკლე: ხშირად მე უფრო ყურადღების ცენტრში ვარ, ვიდრე თამთა... (იცინიან). ამიტომაც ეს უფრო ეჭვიანობს, ვიდრე მე. ისე არ გაიგოთ, რომ თამთას ვჩრდილავ, ასეთი ამბიციურიც არ ვარ.
– ერეკლე, თქვენზე მეტი რამ გვიამბეთ. როგორც ვიცი, გარკვეული პერიოდი სპორტითაც იყავით დაკავებული.
ერეკლე: კი, ჯერ ფეხბურთს ვთამაშობდი, მერე ფეხზე ტრავმა მივიღე და ოპერაცია დამჭირდა. შემდეგ რაგბის თამაში დავიწყე. გერმანიაში ვცხოვრობდი, იქ დავამთავრე სპორტის აკადემია. საბოლოოდ სპორტს ჩამოვშორდი, რადგან ბიზნესს ვერ შევუთავსებდი. ერთდროულად რამდენიმე კომპანიას ვმართავ.
– თამთა, თქვენმა ოჯახმა როგორ მიიღო სასიძო?

თამთა: სამწუხაროდ, მამამ ვერ მოასწრო ერეკლეს გაცნობა და ამაზე გული ძალიან მწყდება. ერეკლე იმ მძიმე წუთებში, როცა მამა გარდაიცვალა, ჩემი ოჯახის გვერდით იდგა. დედა ხშირად აღნიშნავს, იმ პერიოდში ოჯახში უკაცობა არ მიგრძვნიაო. ერეკლეს უკვე ოჯახის წევრად მიიჩნევს, შვილივით უყვარს და უფრთხილდება.

ერეკლე: თამთა ჩემი ოჯახის წევრებსაც ძალიან უყვართ. დედა მესამე შვილად თვლის. მათ ურთიერთობას რომ ვუყურებ, ძალიან მიხარია.
თამთა: ერეკლეს სანათესაოსთან უფრო კარგი ურთიერთობა მაქვს, ვიდრე ჩემს ახლობლებთან. არაჩვეულებრივი და ჰყავს.
– როდის აპირებთ შეუღლებას?
ერეკლე: თამთა "მის საქართველოს" გვირგვინს სხვას რომ გადაულოცავს, ვიქორწინებთ, ხელს მოვაწერთ და ქორწილსაც გადავიხდით.
თამთა: ჯვარს კი უახლოეს დღეებში დავიწერთ.
ერეკლე: ჯვრისწერა პომპეზური არ იქნება, საქორწილო ცერემონიალს კი მასშტაბურს ვგეგმავთ.
თამთა: ჩემი ქორწილი ბავშვობიდან მქონდა დაგეგმილი, წინასწარ ვიცი, რა უნდა ჩავიცვა, რა და როგორ უნდა გავაკეთო. მინდა, ისეთი ორიგინალური ქორწილი გვქონდეს, რომ წლების შემდეგ, როცა მე და ერეკლე დავბერდებით, ტკბილად მოვიგონოთ. ჩვენი ქორწილი მხოლოდ ჭამე, დალიე, იცეკვე და წადი სახლში – არ იქნება. სხვას არაფერს გეტყვით, მინდა, სიურპრიზი მოგიწყოთ.
– თამთა, ბავშვობის ოცნებებიდან რა ვერ აისრულეთ?
თამთა: რაზეც ვოცნებობდი, ყველაფერი ამიხდა. ღმერთმა უხვად დამაჯილდოვა, ყველაფერი მაქვს – საყვარელი საქმე, კარგი ოჯახი და გვერდით არაჩვეულებრივი მამაკაცი, რომელიც, მგონი, ჩემს თავზე მეტად მიყვარს. ძალიან ბედნიერი ვარ.
– ხელებზე ერთმანეთის სახელები გაწერიათ. ვისი სურვილი იყო ტატუს გაკეთება?
თამთა: ჯერ მე გავიკეთე ტატუ, შემდეგ – ერეკლემ. მისი სახელი სამეფო გვირგვინზე დავაწერე, რადგან ერეკლე ჩემი მეფეა... (იცინიან).

ერეკლე: როცა ამ ტატუს ვიკეთებდი, ვფიქრობდი, ასე თამთა ყოველთვის ჩემ გვერდით იქნება–მეთქი. ხშირად მიწევს უცხოეთში საქმიან მოლაპარაკებებზე გამგზავრება და თამთა მართლაც სულ ჩემ გვერდითაა.
– თამთასაც ხშირად უწევს უცხოეთში სამუშაოდ წასვლა, განშორებებს როგორ ეგუებით?

ერეკლე: ორკვირიანი განშორებებიც კი ძალიან რთულია ჩვენთვის, ერთმანეთი უზომოდ გვენატრება. ვერასოდეს შევეგუები, რომ თამთა თვეობით ვერ ვნახო. ჩინეთში ორი თვით იყო წასული და კინაღამ გავგიჟდი.
თამთა: ის ორი თვე მეგონა, საკანში ვიყავი. მაშინ ვთქვი, რომ ერეკლეს გარეშე არსად გავემგზავრებოდი.
– თამთა, როგორ წარმოგიდგენიათ ცხოვრება, როცა "მის საქართველოს" გვირგვინს მოიხსნით?
თამთა: სამოდელო კარიერას გავაგრძელებ.
ერეკლე: მინდა, თამთას თავისი სამოდელო სააგენტო გავუხსნა, რომ საყვარელი საქმე აკეთოს.
ლანა კიკნაძე, ჟურნალი სარკე