ნინო ხომასურიძემ ალმადოვარის ფილმისთვის 34 კილო მოიმატა

იმედი და საყვარელი საქმე – ეს არის მსახიობ ნინო ხომასურიძის სილამაზის "რეცეპტი". არც ჯანსაღი ცხოვრების წესს მისდევს მაინცდამაინც და კანის მოვლისთვისაც დიდ დროს და ფინანსებს არ ხარჯავს. არც პირადი ტრაგედიები დაკლებია, 61 წლის ასაკამდე დიდი ტკივილიანი გზა გამოიარა. როცა ამ ყველაფრის შესახებ იგებ, ამ ქალბატონის ხიბლი ორმაგდება.
– ქალბატონო ნინო, თავდაპირველად, კანის მოვლის შესახებ გკითხავთ. რა მეთოდით უვლით მას?
– სხვათა შორის, საცხებს ვერ ვიყენებ. არ მომწონს, სახეზე რამე თუ მისვია. კანზე მხოლოდ საბავშვო ზეთს ვისვამ. მითხრეს, რომ მას თმა ამოჰყავს, მაგრამ თავს მაინც არ ვანებებ. ძალიან მშრალი კანი მაქვს, რომელსაც ეს ზეთი უხდება, მაგრამ მკვებავად არ გამოდგება. ძალიან მიყვარს მოვლილი ქალები, მაგრამ ამისთვის ფინანსური შესაძლებლობაც უნდა გქონდეს.
– ბოტოქსის ინექცია ან მეზოთერაპია გამოგიყენებიათ?
– მეზოთერაპია გამიკეთებია და ერთხელ ბოტოქსიც გამოვიყენე ზედა ტუჩის გარშემო, მაგრამ შედეგი ძალიან არ მომეწონა. ერთი სული მქონდა, როდის გაქრებოდა. რაც შეეხება მეზოთერაპიას, არაჩვეულებრივია, მაგრამ სულ უნდა იკეთო. ერთი და ორი გაკეთება არაფერს შველის.
– შინაური რეცეპტები თუ გიცდიათ?
– არაჟნის თუ მაწვნის ნიღბებს ვიკეთებ. ზაფხულში ხილის ნიღბებს ვანიჭებ უპირატესობას, მაგრამ ეს ჩემი ცხოვრების წესი არ არის. ამის ხასიათზე უნდა ვიყო და მისი გაკეთება მომინდეს. განწყობის ადამიანი ვარ.
ამ ეტაპზე სრულიად ბუნებრივი ვარ, მაგრამ პლასტიკური ოპერაციის გაკეთება მინდა. ჩემი ნაოჭები მიყვარს, თან, როგორც მსახიობს, ეს მჭირდება, რადგან, ბუნებრივია, სულ 17 წლის გოგოს ვერ ვითამაშებ. აი, სიბერეს კი ვერ ვიტან. ჯერ არ ვიცი, რისთვის შეიძლება მივმართო პლასტიკურ ქირურგიას. ერთი–ორი წელი ჩემს გარეგნობას ხელს არ ვახლებ, მერე ალბათ რაიმეს ვცდი.
– რა ასაკში მოგწონდათ თავი განსაკუთრებით?
– 40 წლამდე, სანამ დავქვრივდებოდი. იმ პერიოდში ქალად ჩამოვყალიბდი. არ ვეთანხმები, როცა ამბობენ, რომ სიბერე კარგია. ალბათ ერთადერთი ეს არის, რასაც ვერ ერევი. რომ მკითხოთ, ადამიანი არ უნდა ბერდებოდეს. ერთი პერიოდი სარკეში არ ვიხედებოდი, არც მაინტერესებდა, როგორ გამოვიყურებოდი. თავიდან ვიცილებდი საზოგადოებაში გასვლას. შინაგანად უნდა გრძნობდე თავს კარგად და ეს არის სილამაზე.
– რა დამოკიდებულება გაქვთ სარკესთან?
– ძალიან მიყვარს სარკე და სახლში უამრავი მაქვს. მერე სადღაც წავიკითხე, რომ სარკე კარგ, კეთილ ადამიანებს უყვართ. ეს რომ გავიგე, გამიხარდა.
– ვინ გიყურებთ სარკიდან?
– ხანდახან ნინო მიყურებს, ხანდახან – აბსოლუტურად სხვა ქალი. ერთხელ სახლს ვალაგებდი და უცებ სარკეში ჩავიხედე. შემეშინდა, რადგან ვიღაც სხვა მიყურებდა. შინაგანი განწყობა ჩემზე ძალიან მოქმედებს. ძალიან ცვალებადი ხასიათი მაქვს.
– ზოგადად როგორი ცხოვრების წესი გაქვთ – მავნე ჩვევებისგან თავისუფალი თუ არა?
– ძალიან არასპორტული ვარ. ჩემი დილა სიგარეტით და მწვანე ჩაით იწყება. ადრე ყავას ვსვამდი, მაგრამ ინფარქტის მერე მწვანე ჩაით შევცვალე. სიგარეტს თავს ვერ ვანებებ, უკვე 47 წელია ვეწევი.
– სრულიად გულწრფელად გეუბნებით: ამ ყველაფრის ფონზე არაჩვეულებრივად გამოიყურებით. რა არის თქვენი კარგი გარეგნობის საიდუმლო?
– ჯიში და გენეტიკა. დედაჩემი, თამარ ხომასურიძე, სიმსივნით გარდაიცვალა, მაგრამ ბოლო წუთებამდე ულამაზესი იყო. მას დიდი ცისფერი თვალები და რომაული ცხვირი ჰქონდა.
– საინტერესოა, როგორ უვლიდა დედათქვენი თავს.
– დედა ზამთარ–ზაფხულ ყინულის კუბიკებით იბანდა პირს. ხან ჩაის ნაყენი იყო ამ კუბიკებში, ხან სხვა რამ. მე რამდენჯერმე ვცადე იმავეს გაკეთება, მაგრამ არ მომეწონა და თავი დავანებე. ეს ხერხი კანისთვის, წესით, კარგია, რადგან კუნთებს ამაგრებს. სხვათა შორის, სადღაც წავიკითხე, რომ ყინულის კუბიკებით ეკატერინე მეორეც იბანდა სახეს.
– რას გასწავლიდათ დედა გარეგნობასთან დაკავშირებით, როგორი ნინო მოსწონდა მას?
– მას უნდოდა, რომ სულ ფორმაში ვყოფილიყავი. არადა, როცა ახალგაზრდა ხარ, გარეგნობას დიდ ყურადღებას არ აქცევ. რაიმე ახალი თუ შემოვიდოდა, კოსმეტიკა თუ სამოსი, დედას ჩემთვის ყოველთვის მოჰქონდა.
– დღეს მიჰყვებით მოდის ტენდენციებს?
– ყოველთვის მიყვარდა თავისუფლად და სპორტულად ჩაცმა. ამ სტილს კარგად ვირგებდი. როცა ასაკის მატებასთან ერთად მაღალქუსლიანი ფეხსაცმელების ჩაცმა დამჭირდა, თავს ცოტა უხერხულად ვგრძნობდი. მოდას თვალს ვადევნებ, მაგრამ ჩემს სტილს ვინარჩუნებ.
– თამამი იმიჯი მოგირგიათ?
– არასოდეს. უფრო მეტიც, ბევრ თამამ როლზეც კი უარი მითქვამს. კატრინ ბრეა ცნობილი ფრანგი რეჟისორია. მასთან გადაღებაზე მოხვედრა დიდი ბედნიერებაა. რატომღაც ჩემზე გადაირია. ბრეა ეროტიკული მიმართულების, არაჩვეულებრივად ნიჭიერი, კინოაკადემიის მრავალი ჯილდოს მფლობელი რეჟისორია. საფრანგეთში ხელისგულზე ატარებენ. მაშინ რაღაც ფილმს იღებდა და მთხოვა, მეთამაშა. დელიკატურად ვუთხარი უარი, მაგრამ, რა თქმა უნდა, ვერ გავაგებინე, მსახიობი უარს რატომ ვამბობდი თამამი როლის თამაშზე.
ფრანგულ ფილმში "რაც ოთარი წავიდა" რომ ვითამაშე, კანის კინოფესტივალის აღმოჩენა გავხდი. ამ ფილმმა "ცეზარი" აიღო. ფესტივალზე ჩემი ჩვეულებრივი კაბით მივდიოდი. მაკა ასათიანმა ის კაბა რომ ნახა, კინაღამ სკამიდან გადმოვარდა. მან იმ დღისთვის ძალიან ლამაზი კაბა შემიკერა. მსახიობისთვის ბედნიერებაა, როცა ასეთ ზეიმზე ხვდება. იქ ვიგრძენი, რომ მსახიობი ვიყავი.
– პროფესიის გამო მსხვერპლზე თუ წასულხართ გარეგნობის საზარალოდ?
– ალმადოვარის ფილმისთვის ძალიან მოვიმატე და ძველ წონას დღესაც ვერ ვიბრუნებ. 58 კილო ვიყავი და 92 კილო გავხდი. გურმანი ვარ, მაგრამ წონის პრობლემა მანამდე არ მქონია. სპეციალურ კვებაზე გადავედი, რომ მომემატებინა.
– მოგვიყევით, როგორ მიიღეთ შემოთავაზება ალმადოვარისგან, ვისთან ერთად თამაშობთ და როდის გამოვა ეს ფილმი ეკრანებზე.
– ფილმის "რაც ოთარი წავიდა" რეჟისორმა და პროდიუსერმა თავისი ნამუშევარი ალმადოვარს აჩვენა. ასე დამიკავშირდა ალმადოვარი. არ ვიცი, მისი ფილმი როდის გამოვა. ვერაფერს ვყვები ფილმის შესახებ, ვერც ფოტოებს ვაქვეყნებ, რადგან კონტრაქტით ამის უფლება არ მაქვს. ფილმში მონაწილე მსახიობები ესპანელები არიან, ჰოლივუდის ვარსკვლავი პენელოპა კრუსი თამაშობს. მე ემიგრანტის როლი მაქვს, რომელიც პენელოპა კრუსის გმირის ოჯახში დიასახლისია. ალმადოვარმა მითხრა, როლიდან გამომდინარე, რა ენაზეც გინდა, ილაპარაკეო, მაგრამ მე სამ კვირაში ესპანურად ავლაპარაკდი. დაბადების დღეც იქ, ესპანეთში გადავიხადე. იმ დღისთვის კაბა ფატუნა ბუშიჰედმა შემიკერა.
– როგორია პენელოპა კრუსი კულისებში?
– თავიდან ცოტა ცივად შემხვდა. ვარსკვლავები პრეტენზიულები არიან. მსახიობი 25 მილიონს რომ აიღებს ერთ გადაღებაში, ამით ყველაფერი ნათქვამია. მათ ცხოვრების სხვა წესი აქვთ, ჩვენნაირები არ არიან. ქართველებს სითბოს გამომჟღავნება გვიყვარს. იქ ეს ნაკლებად არის, მაგრამ ბოლო კვირებში დავმეგობრდით. მაშინ პენელოპა კრუსს ბავშვი ახალი გაჩენილი ჰყავდა, ფორმაში არ იყო, მასაჟებზე დარბოდა და თავისი პრობლემები ჰქონდა.
– შეუხედავი ქალის როლის თამაში რომ შემოგთავაზონ, დათანხმდებით?
– ასეთ როლზე უარი არასოდეს მითქვამს. ჩემთვის, როგორც მსახიობისთვის, საინტერესოა სახასიათო როლები. შეუხედავი, უარყოფითი გმირის თამაში მირჩევნია დადებითი პერსონაჟის როლის შესრულებას, რადგან ეს ადვილია. დოიმ (რეჟისორი დათო დოიაშვილი) რომ მიმიწვია სპექტაკლ "ჯინსების თაობაში" გეგა კობახიძის დედის, ნათელა მაჭავარიანის როლის სათამაშოდ, მაშინ თმა ნულზე მქონდა გადაპარსული. დოის ვუთხარი, რომ არ შეშინებოდა, მან კი მიპასუხა, ზუსტად ასეთი გარეგნობის გმირი მჭირდებოდაო.
– რატომ გქონდათ თმა გადაპარსული?
– თმას პერიოდულად ვიპარსავ. ეტყობა, როცა შინაგანად რაღაც მაწუხებს, ჯავრს თმაზე ვიყრი.
– ცხოვრებაში დიდი ტრაგედია გაქვთ გადატანილი – ჯერ ქმარი დაგეღუპათ და შემდეგ შვილი დაკარგეთ. ალბათ ბევრს უკვირს თქვენ გარშემო, რომ არ წაიქეცით და თანაც ასე გამოიყურებით. რა დაგეხმარათ გაძლებაში?
– ამ პერიოდების გამო ინფარქტი და ანევრიზმა გადავიტანე, მაგრამ გადავრჩი. ათი წელი სცენაზე არ ვიდექი, არავის ვენახვებოდი. მერე დოიმ ძალით მათამაშა "ჯინსების თაობაში". თუ კიდევ რამე მაძლებინებდა, ეს იმედი იყო. იმედი სულ მქონდა, რომ შვილს ვიპოვიდი და დღემდე ამით მოვედი. იმედმა და პროფესიამ მომცა ბიძგი, სტრესს არ დავმორჩილებოდი. მეგობრების მადლიერი ვარ, ისინი უყურადღებოდ არასდროს მტოვებენ. სულ ჩემს სახლში არიან, ერთად ვართ.
მანანა ნოდია, ჟურნალი სარკე