მილიარდერების ყველაზე ცნობილი ქალიშვილები

მილიარდერების ქალიშვილები, როგორც წესი, განებივრებული, ფუფუნებაში გაზრდილი პრინცესები არიან, თუმცა ზოგიერთი მათგანი არანაკლებ აქტიურად ერთვება ბიზნესსაქმიანობაში და თავადაც შოულობს დიდ ფულს, რომ მდიდარ მამიკოზე მეტისმეტად არ იყოს დამოკიდებული. გადავხედოთ მილიარდერების ყველაზე ცნობილ ქალიშვილებს.

დონალდ ტრამპის 32 წლის ქალიშვილი ივანკა ტრამპი სამოდელო კარიერაში იყო ჩართული, მაგრამ ნაკლებად დაინტერესდა ამ სფეროთი. მან თავიდანვე ბიზნესის სფერო და მწერლობა აირჩია. ამიტომაც იყო, რომ თანდათან სერიოზულად აღიქვეს. საიუველირო სამკაულების, ფეხსაცმლის, აქსესუარების საკუთარი ხაზი, უძრავი ქონება, წიგნები იმის შესახებ, როგორ უნდა მივაღწიოთ წარმატებას - ეს ის სფეროებია, რითაც ლამაზმანია დაინტერესებული.

ის, პრაქტიკულად, ყველაფერს ოქროდ აქცევს, რასაც ეხება. ივანკამ წარმატებულადაც იქორწინა ჯარედ კუშნერზე - მათი ქორწილი მშობლებს 6 მლნ დოლარი დაუჯდათ. ივანკამ 14 ოქტომბერს მეორე შვილი გააჩინა და სულ მალე აპირებს, საქმიანობას დაუბრუნდეს - ამ ქერა პრინცესას ხომ ბიზნესი სისხლში აქვს.



დაშა ჟუკოვაც 32 წლისაა. ის კორპორაცია ''სინთეზ ოილის'' დამაარსებლის ალექსანდრ ჟუკოვის ქალიშვილია და ბავშვობიდან არაფერი აკლდა. მშობლების განქორწინების შემდეგ დედასთან ერთად სანტა-ბარბარაში გადასახლდა. მრავალმილიონიანი ქონების მემკვიდრეს განათლება ლონდონში აქვს მიღებული და საკმაოდ წარმატებული ბიზნესვუმენია. კრისტინა ტანგთან ერთად ტანსაცმლის ხაზი გამოუშვა, რომელიც მალე გახდა პოპულარული. მერე ჩოგბურთელ მარატ საფინთან რომანით გაითქვა სახელი, თუმცა ყველაზე სარფიანი რომან აბრამოვიჩის გაცნობა აღმოჩნდა. დაშას გამო რომანი ცოლსაც დაშორდა და მილიარდერის ქალიშვილთან უკვე მეორე შვილიც გაუჩნდა. დაშა არც ამის მერე გაჩერებულა. აბრამოვიჩის მხარდაჭერით რუსეთში არტ-საზოგადოება ჩამოაყალიბა - ''გარაჟი'' , რომელიც რუსეთში თანამედროვე ხელოვნების ცენტრად მიიჩნევა.
''ალუმინის მაგნატის'' ვასილი ანისიმოვის უმცროსი ქალიშვილი ანა ანისიმოვა რა ხანია ამერიკული ელიტური ქრონიკების მუდმივი სტუმარია. ის რუსეთიდან აშშ-ში ჩასული ''ოქროს გოგონების'' კრებითი სახეა. მას რუს პერის ჰილტონსაც უწოდებენ. ანა ძირითადად უძრავი ქონების ყიდვა-გაყიდვით არის დაკავებული. ძირითადად, ნიუ-იორკში, მაიამისა და ლოს-ანჯელესში ყველაზე ძვირად ღირებული ბინებით ინტერესდება. ანა წარმატებითაც გათხოვდა - ერთ-ერთი კინოკომპანიის გენერალური დირექტორის პიტერ შაფერის ცოლია.


29 წლის ტამარა ეკლსტოუნი ''ფორმულა 1'' -ის მფლობელის, მილიარდერ ბერნი ეკლსტოუნისა და მოდელ სლავიკა ეკლსტოუნის ქალიშვილია. ტამარა ცეცხლოვანი ქალია: ერთ-ერთ ბრიტანულ არხზე რბოლების კომენტატორია, მამაკაცების ჟურნალებისთვის შიშვლდება და ცხოვრებით ტკბება. ცოტა ხნის წინ მამამ ერთ-ერთი უძვირფასესი სახლი აჩუქა, რომლის შესყიდვა და რეკონსტრუქცია ეკლსტოუნებს 100 მლნ დოლარზე მეტი დაუჯდათ. სახლში არის 55 ოთახი, მთის ბროლით დამზადებული აბაზანა, სილამაზის სალონი, სპასალონი სახლის პატრონის ძაღლისთვის... ასეთი მდიდარი საპატარძლო სულაც არ გაჰყოლია ''ოქროს ბიჭუნას'' . მისი ქმარი ჩვეულებრივი ბირჟის მაკლერია, რომელსაც, სხვათა შორის, თაღლითობაში ადანაშაულებდნენ. მათ ქორწინებას წლის ქორწილიც უწოდეს და ზეიმს ჰოლივუდის თითქმის ყველა მეგავარსკვლავი ესწრებოდა.


რომან აბრამოვიჩის 21 წლის ქალიშვილი ანა აბრამოვიჩი ტიპურ მემკვიდრეს არ ჰგავს. არ ერიდება ჩვეულებრივ მაღაზიებში შემოსვას, არ მიისწრაფვის საჯაროობისკენ, მოკრძალებულობით გამოირჩევა და არც მოდას მისდევს. ის ''ოქროს გოგონას'' ნაკლებად ჰგავს. ვესტმინსტერის უნივერსიტეტში ამთავრებს ბაკალავრიატს და პარალელურად ქალთა პრესტიჟულ სკოლაში ლექციებს ესწრება, სერიოზულად არის გატაცებული თანამედროვე ხელოვნებით და თავადაც ხატავს. ორი წლის წინ 29 წლის იურისტ ნიკოლაი ლაზარევს დაშორდა და ახლა მარტოა, ძირითადად, მომავლის დაგეგმვაზე ფიქრობს.

ჟურნალი ''რეიტინგი''