''ახალი ხმის'' მონაწილე შეყვარებულს საზღვარგარეთ უშვებს

17 წლის ელენე საბიაშვილს ''ახალ ხმაში'' ბრმა კასტინგზე სამი მწვრთნელი - მაო, სტეფანე და ლელა წურწუმია შემოუბრუნდა. ელენემ მაოს გუნდში არჩია ყოფნა. გასულ სეზონზე მისი შეყვარებული იოანე არაბულიც სწორედ მაოს და სტეფანეს გუნდში ასპარეზობდა. ახლა იოანეს უწევს ელენეს გამო ნერვიულობა. შეყვარებულმა იოანესა და სხვა გულშემატკივრების იმედი გაამართლა, წინა კვირას რინგზე ნინუცა ნიქაბაძე დაამარცხა და შემდეგ ტურში გადაინაცვლა. ჩვენ შეყვარებულ წყვილთან გთავაზობთ ინტერვიუს.

- ელენე, სკოლაში სწავლობ ჯერ კიდევ, რას აპირებ, რა გეგმები გაქვს სამომავლოდ?
- აბიტურიენტი ვარ, დამამთავრებელ კლასში ვსწავლობ. მსახიობობა მინდა, მაგრამ არ მგონია, თეატრალურზე ჩავაბარო. ჯერ ვერ ჩამოვყალიბდი ამ საკითხზე.
- ''ახალი ხმა'' შენთვის პირველი კონკურსია?
- კი. ჩემი დებიუტი იყო ბრმა კასტინგი.
- შარშან, როცა იოანე იღებდა მონაწილეობას ამ პროექტში, რატომ შენც არ გახვედი?
- კონკურენციის შემეშინდა, მზად არ ვიყავი.
- იოანე, როგორი იყო საგულშემატკივრო ოთახში ''განაჩენის'' მოლოდინი, განერვიულა ელენემ?
- არ მეგონა, ასე თუ ვინერვიულებდი. ჩემს გამოსვლაზე მეტად ელენეს გამოსვლის დროს ვღელავდი.
- როგორ გაიცანით ერთმანეთი?
იოანე:
- დაახლოებით 2 წლის წინ რუსთავის თეატრ ''ბრავოში'' გამოცხადდა კასტინგი მიუზიკლზეს. მე და ელენე შეყვარებულებს ვთამაშობდით. რეპეტიციებიდან დაიწყო ყველაფერი.
- ელენე, როგორ გამოგიტყდა იო სიყვარულში?
- ერთ-ერთ ივენთზე სარეპეტიციო ოთახში გამიყვანა და იქ გამიმხილა თავისი გრძნობების შესახებ. ჩვეულებრივად მოხდა ყველაფერი. ერთმანეთისთვის თავის მოწონებაზე არც გვიფიქრია, ერთად ვთამაშობდით სპექტაკლში, ვმღეროდით და შეგვიყვარდა ერთმანეთი. სამი დღის მერე მეც საპასუხო გრძნობით ვუპასუხე.
- იო, რა მოგწონს ელენეში ყველაზე მეტად?
- მისი შინაგანი ბუნება. რაც უნდა ცუდ ხასიათზე ვიყო, ყოველთვის კარგად ვგრძნობ ელენესთან თავს.
- ელენე, შენთვის რა არის იოანეში პრიორიტეტული?
- მამაკაცურია, უბრალო და ძალიან თბილი.
- იო, შენ რას საქმიანობ?
- ტექნიკურ უნივერსიტეტში ვსწავლობ, პროექტის გამო აკადემიურის გამოყენებამ მომიწია. სწავლას აუცილებლად გავაგრძელებ, მაგრამ ჯერ ლატვიაში მივდივარ ბენდთან ერთად, ალბომი უნდა ჩავწეროთ, კლიპები გადავიღოთ. სულით და ხორცით მუსიკოსი ვარ, ძალიან მიყვარს ეს საქმე.
- ელენე, იო ლატვიაში რომ მიდის, ხომ არ ეჭვიანობ?
- არა, რატომ უნდა ვიეჭვიანო? ეს ჩემში არ ზის.

- იო, ასეთ ლამაზ შეყვარებულზე არც შენ ეჭვიანობ?
- სიმართლე გითხრათ, ცოტას კი (იღიმება), მაგრამ 100 %-ით დარწმუნებული ვარ ელენეში, ისევე როგორც ის ჩემში.
- საკმაოდ ძლიერი კონკურენტები ჰყავს ელენეს, როგორ აფასებ მის შანსებს?
- მართლაც, 5-6 მონაწილეს გამოვარჩევდი ამ პროექტიდან, რომლებიც ღირსეული გამარჯვებულები იქნებიან. მათ შორის არის ელენეც. თუ ბოლომდე აჩვენებს თავის შესაძლებლობებს, გამორიცხული არ არის, გაიმარჯვოს კიდეც.
- ელენე, თუ გავითვალისწინებთ იმას, რომ ბრმა კასტინგი შენი დებიუტი იყო სცენაზე, ალბათ შენს ყველა გამოსვლას ღელვა ახლავს...
- ძალიან ვინერვიულე, განსაკუთრებით ''ბრმა კასტინგზე'' , თან ცუდად ვიყავი, ხმა არ მქონდა. ამის გამოც ვინერვიულე. როცა მღერი და თან ელოდები როდის შემობრუნდებიან, წარმოუდგენლად დიდი სტრესია.
- რინგზე შენს კონკურენტზე რას მეტყვი?
- ნინუცა ძალიან მაგარი გოგოა, ძალიან შემიყვარდა. არაჩვეულებრივი პიროვნებაა და დიდ წარმატებას ვუსურვებ. სამწუხაროდ, დატოვა პროექტი, არავინ მოიტაცა (პროექტის ახალ წესს გულისხმობს, როცა მწვრთნელებს რინგში დამარცხებული კონკურსანტის მოტაცების, ანუ თავის გუნდში გადაყვანის შანსი აქვთ. - ავტ.). გული დამწყდა.
- შენ და იოს ერთნაირი მუსიკალური გემოვნება გაქვთ?
ელენე:
- ძირითადად ერთნაირი.
იოანე:
- 60-იანი წლების მუსიკა მოგვწონს, ბლუზი, ფსიქოდელია.
- ერთად სიმღერაზე არ გიფიქრიათ?
- გვიფიქრია და ვმუშაობთ კიდეც ამ კუთხით. როცა ერთად ვართ, ძირითადად მუსიკით ვართ დაკავებულნი. ექსპრომტად მუსიკასაც ვწერთ, ძირითადად ინგლისურენოვან სიმღერებს.
იოანე:
- მე მაქვს რამდენიმე კომპოზიცია დაწერილი, რომელზეც ქართული ტექსტის დადებას ვფიქრობ, მაგრამ ეს უფრო სამომავლო გეგმებია.

ნინო მჭედლიშვილი
ჟურნალი ''რეიტინგი''