იაფი ბოსტნეული ძვირფასი კოსმეტიკის ნაცვლად - ნიღბები თვალებისთვის

ოხრახუშისა და კარტოფილის საფენი

ერთ სუფრის კოვზ ოხრახუშს დაასხით ნახევარი ჭიქა მდუღარე, დაახურეთ თავზე და გააჩერეთ 15 წუთით. ნახევარი უმი კარტოფილი წვრილად გახეხეთ და დაამატეთ 2 სუფრის კოვზი ოხრახუშის თბილი ნაყენი და 1 ჩაის კოვზი ნაღები.

კარგად აურიეთ, მოათავსეთ რამდენიმე ფენად დაკეცილ დოლბანდის ორ ნაჭერს შორის და დაიფინეთ თვალებზე. გაიჩერეთ 15-20 წუთით. კარტოფილის დარჩენილი მეორე ნახევრიდან გამოწურეთ წვენი და ნიღბის მოშორების შემდეგ თვალების ირგვლივ კანი დაინამეთ. შეეცადეთ, პირი დილამდე არ დაიბანოთ. შესაბამისად, უმჯობესია, ეს პროცედურა ძილის წინ ან უბრალოდ, სამსახურიდან შინ დაბრუნების შემდეგ ჩაიტაროთ. კურსი შეადგენს 15 ნიღაბს დღეგამოშვებით.

ქუთუთოების კანის გასაწმენდად:

1 სუფრის კოვზ სელის თესლს დაასხით 1 ჭიქა მდუღარე, გააჩერეთ ნახევარი საათით და გადაწურეთ. გამოიყენეთ მაკიაჟის მოსაცილებლად, დასაბანად და საფენებად.

ხაჭოს ნიღაბი

2 სუფრის კოვზი ხაჭო კარგად აზილეთ, შეურიეთ 1 ჩაის კოვზი თაფლი, ნახევარი ჩაის კოვზი სტაფილოს წვენი და 1 სუფრის კოვზი ნაღები. ქუთუთოებზე დაიფინეთ სველი დოლბანდი, ზემოდან წაისვით მიღებული მასა და გაიჩერეთ 15 წუთით. ჩამოიბანეთ ხარისხიანი ჩაის მსუბუქი, თბილი ნაყენით.