თვლის თუ არა ნინა წკრიალაშვილი სოფო ნიჟარაძეს კონკურენტად

მომღერალმა ნინა წკრიალაშვილმა პირად ცხოვრებაში ტრაგედიის გადატანის შემდეგ, რაშიც ფსიქოლოგის დახმარებაც კი დასჭირდა, საკუთარ თავს ამოცანად დაუსახა, შესაძლებლობები რაიმე ახალ ამპლუაში მოესინჯა. ამის შანსი მალე მიეცა კიდეც პროექტის "ცეკვავენ ვარსკვლავები" სახით. ექსპერიმენტმა გაამართლა და ნინა ჟიურის წევრებისგან არცთუ ისე ცუდ შეფასებებს იღებს. არც მაყურებლისგან აკლია ყურადღება. ამაში წვლილი, რა თქმა უნდა, მის მეწყვილეს, პროფესიონალ მოცეკვავე რეზო რობაქიძესაც მიუძღვის, რომელსაც ხანდახან ნინაზე გაბრაზება უნდა, მაგრამ ვერაფრით გამოსდის, რადგან მის ჭკუამხიარულ პარტნიორს ყველაფერი იუმორში გადააქვს.
– ნინა, ამ პროექტამდე ცეკვის გამოცდილება გქონდათ?
ნინა: ჩემდა სამარცხვინოდ, ცეკვაზე არ მივლია და მიკვირს, ეს როგორ გამომეპარა. ვისაც ცეკვაზე უვლია, იმისთვის ეს გაცილებით ადვილია. თუ არ ვცდები, მე, გუგა კუზანოვმა, ტოლი ბოისამ და კოტიკო თოლორაიამ არ ვიცოდით ცეკვა და ეს გვემჩნევა კიდეც. დანარჩენებს მეტნაკლებად რაღაც შეხება ჰქონიათ. წინა სეზონების დროს კონცერტებზე დავდიოდი, ეს პროექტი ძალიან მომწონდა, მაგრამ ვერც ერთ მათგანში მონაწილეობა ვერ მივიღე, რადგან ჯანმრთელობის პრობლემა მქონდა, თან ცეკვის მეშინოდა, მეგონა, ვერ შევძლებდი.
– რეზო, თქვენი შეფასებით, როგორ გამოსდის ნინას ცეკვა?
ნინო: ახლა არ თქვა, კარგად გამოსდისო, თორემ მოგკლავ!

რეზი: მე ვთვლი, რომ კარგად გამოგდის. არადა, როცა ამას ვამბობ, სულ მეჩხუბება. ცეკვა ისე გამოსდის, როგორც საჭიროა, თუმცა მეტის გაკეთება შეუძლია.
– ნინა, ჟიურის უმკაცრესი წევრი გოჩა ჩერტკოევიც იმავეს გეუბნებათ, რომ თქვენგან მეტს ელოდება.
ნინა: ჩემი აზრით, გოჩა ჩემგან უფრო მეტს იმიტომ ელოდება, რომ კარგი იუმორი მაქვს. მასთან წინა სეზონებიდან მოყოლებული ვმეგობრობ. როცა ყავის დალევა გვიწევს ერთად, სიცილით ვკლავ ხოლმე და ჰგონია, როგორი იუმორიც მაქვს, ისე უნდა ვიცეკვო. ვფიქრობ, ამიტომ ელოდება ჩემგან უფრო მეტს. სულ მეუბნება, ცხოვრებაში უფრო ლაღი ხარო. ცხოვრებაში კი ვარ ლაღი, მაგრამ ცეკვაში მეტი არ შემიძლია. მაშინ ეს ყველაფერი კარგად უნდა გავითავისო, იმაზე არ ვიფიქრო, რა რის მერე მოდის, ჩვენ კი ამდენი დრო არ გვაქვს.
– რეზო, როგორია თქვენი რეპეტიციები, ნინას როგორ ასწავლით ცეკვას და რამდენად კარგად მოგყვებათ?

რეზო: ჩვენი მეცადინეობა საერთოდ სხვა თემაა. ყველა წყვილისგან განსხვავებით, ჩვენი გაკვეთილები იუმორით იწყება და იუმორით მთავრდება. რაც შეეხება ნიჭს, ნინა ცეკვას მთლიანად ერთ გაკვეთილში სწავლობს. ბევრი დასვენება უყვარს, მაგრამ ზარმაცი არ არის. როცა იცის, რომ საქმე უნდა გააკეთოს, გააკეთებს, მაგრამ უფრო მეტის მუშაობის ნაცვლად, ცდილობს, დაისვენოს. ამის გამო ვკლავ ხოლმე.
ნინა: ნაბიჯებს ადვილად ვსწავლობ და იმაზე მეტი მუშაობა მაგრად მეზარება. ნაბიჯები რადგან გამომდის, მგონია, რომ მაგრად ვცეკვავ. რეზიკო სულ მეუბნება, მოდი, კიდევ ერთხელ გავიმეოროთო, მე კიდევ, წელი მტკივა–მეთქი, ვპასუხობ. ეს კიდევ – არ გტკივაო. ამაზე ვბრაზდები – მე უფრო ვიცი, მტკივა თუ არა, თუ შენ–მეთქი. მხრებში გასწორდიო, სულ ამას მეუბნება. მერე გავსწორდები–მეთქი, ვპასუხობ და ვართ ასე.
– რეზო, ყველაზე რთული რა იყო ნინასთვის, რისი დაძლევა გაუჭირდა?
რეზო: შპაგატში ვერ ჯდება.
ნინა: და არც ვცდილობ. ორი თვეა ვვარჯიშობ და თავი რომ მომეკლა, აქამდე ჩავჯდებოდი. მოკლედ, შპაგატში ხომ ვერ ვჯდები, ტრიალის მერე თავბრუსხვევაც მაქვს.
რეზო: როცა ადამიანს ერთ დღეში შეუძლია, მთლიანი კომპოზიცია, ცეკვა ისწავლოს, ვთვლი, რომ ერთ–ერთი ლიდერი უნდა იყოს. ნინას შეუძლია უფრო მეტი გააკეთოს და ივარჯიშოს. ნელ–ნელა ცეკვის ხარისხს ვუმატებთ, ნინა წინ მიდის, ყოველი მისი ცეკვა წინა ტურის ცეკვას ჯობია.
ნინა: ყველაზე კარგად თავი რუმბას ცეკვისას ვიგრძენი. შემდეგი ტური ლათინური ცეკვებისაა და ვნანობ, რომ რუმბა უკვე ნაცეკვი გვაქვს, რადგან ფიზიკურად უფრო შევიკარი და ახლა უფრო მომწონს ჩემი სხეული, ვიდრე სამი ტურის წინ.
– რეზო, ნინას ვარსკვლავური ჩვევები, ჭირვეულობები ხომ არ ახასიათებს, მაგალითად, რეპეტიციაზე თუ იგვიანებს და ა.შ.?
რეზო: ნინა ძალიან უბრალო ადამიანია. ვგრძნობ, რომ თავს ვარსკვლავად არ თვლის. ორივეს მიგვაჩნია, რომ უბრალო ადამიანები ვართ, არავისზე მეტი და არც არავისზე ნაკლები. ეს კი ყველაზე მეტად გვეხმარება ამ საქმის კეთებაში. ნინა ადამიანურია, ყველანაირი პრობლემის გაგება შეუძლია და ძალიან მეგობრულია.
– დამეგობრებაც მოასწარით?
რეზო: ჩვენ პირველივე დღიდან ვმეგობრობთ.
ნინა: ეს ბოლო ორი თვეა, ყველაზე დიდი დოზით რეზიკოს ვნახულობ და, როგორ შეიძლება ვერ დავმეგობრდეთ?! შეიძლება რეზიკოს ჩემგან რაღაცეები სწყენია კიდეც. ერთი–ორჯერ მივხვდი, რომ ძალიან დაღლილი იყო და ჩემგან რაღაც ეწყინა. თვითონ არ იმჩნევს, მაგრამ მე ვგრძნობ, რომ ვაწყენინე. მერე ვეტენები ხოლმე.
– რეზო, რა არის იმისათვის საჭირო, რომ სრულიად არამცოდნემ ცეკვა სწრაფად ისწავლოს?
რეზო: ის, რაც ნინას აქვს. მასში ყველაზე ძალიან ის მომწონს, რომ ილეთებს რიტმულად და მუსიკალურად იმახსოვრებს. როცა კონკურსზე გამოდიხარ, პირველ რიგში, მუსიკალური კუთხით ფასდები.
– მინუსებიც ექნება.
რეზო: მხრების პრობლემა აქვს. დგომა უკვე ისწავლა.
ნინა: როცა რეზოს ჩემი გაბრაზება უნდა, მეუბნება, ნინა, ძალიან ცუდიაო. ჰგონია, მეწყინება და ძალიან მოვინდომებ. მე კიდევ ვეუბნები, ვიცი, რომ არ ვარგა–მეთქი და სიცილით ვკვდები. ამაზე ბრაზდება.
რეზო: რაც უნდა მოხდეს, ნინას ვერ ვეჩხუბები. თავიდან გადაწყვეტილი მქონდა, მეჩხუბა, მაგრამ ამან არ გაჭრა, ამიტომ ტაქტიკა შევცვალე და მხიარულად მივუდექი. ამ მიდგომამ უფრო გაამართლა.
– რეზო, მოდით, ნინა და წინა სეზონზე თქვენი პარტნიორი ეკო ფანგანი შეადარეთ ერთმანეთს.
ნინა: მგონი, ის არ იყო ზარმაცი, არა?
რეზო: ეკო ფანგანი ძალიან მშრომელი ადამიანია. ცეკვით ეკოც მაკმაყოფილებდა თავის დროზე და ახლა ნინაც მომწონს.
ნინა: ეკო შპაგატში ჯდებოდა?
რეზო: ვერ ჯდებოდა.
ნინა: ქერა გოგოები კი გყავს!
– რეზო, პროექტში ქერა ქალები დაგებედათ, მაგრამ ცხოვრებაში როგორი გოგონები მოგწონთ?
რეზო: ქერა იქნება თუ შავგვრემანი, ამით გოგოს არ ვარჩევ. ამ ეტაპზე არც არავინ მყავს და ჯერჯერობით არც ვაპირებ, მყავდეს. ერთი წლის წინ რთული პერიოდი გადავიტანე, ასე რომ ვთქვათ, აღარაფრის მჯერა. შეიძლება ცუდად გამიგოს ჩემმა თაობამ, მაგრამ ჩემი თაობის გოგონების არ მჯერა.
ნინა: ამიტომ ძალიან ბებრებში ეძებე ან, ახლა რომ დაიბადნენ, იმათში.
– შიდა კონკურენციაზე მინდა გკითხოთ. არ მითხრათ ახლა, რომ ერთმანეთთან ყველა კარგად ხართ, ერთმანეთს გულშემატკივრობთ და სხვისი გამარჯვება გინდათ.
ნინა: დაძაბული ურთიერთობები მძულს და კონფლიქტურიც არ ვარ. ერთმანეთს ხოცავენ–მეთქი, რომ გითხრა, ასე არ არის, მაგრამ დაძაბულობა უკვე შეიმჩნევა. ძალიან დიდი პლუსი მაქვს, კონკურენტებად ვერავის აღვიქვამ. იმიტომ კი არა, რომ კარგი ვარ და ვინმეს ვჯობივარ, უბრალოდ კონკურსები არ მომწონს და აქაც ყოველ გამოსვლას ისე ვუყურებ, როგორც კონცერტს. ვიცი, რომ ვიღაცეები ჩემზე უკეთესად ცეკვავენ, ვიღაცეები – უარესადაც, მაგრამ ეს თამაშია და კაცმა არ იცის, წინ ვინ წავა.
ეს სეზონი გამორჩეულია, წინა სეზონებში ერთი–ორი ლიდერი იყო და წინასწარ ხვდებოდი რაღაცეებს. მიუხედავად ამისა, იქაც მოხდა აბსურდული რამ, ქრისტინე იმედაძე არაჩვეულებრივად ცეკვავდა და პროექტს შუა ნაწილიდან გამოეთიშა, იულია ქავთარაძეც კარგი იყო და პროექტი დატოვა. ახლა, როგორც ვხედავ, რამდენიმე გოგოს მაღალი შეფასებები აქვს, ჩვენც ძალიან ბევრი ესემესი მოგვდის, უბრალოდ ჟიური "ორიანებს" გვიწერს ხოლმე.
– ნინა, თქვენ გეკუთვნით ფრაზა, ვისაც ყველაზე მდიდარი "ნაშა" ჰყავს, ის გაიმარჯვებსო. ამაში რა იგულისხმეთ?
ნინა: ვიხუმრე, მაგრამ ხალხი ვერ მიხვდა და მლანძღავდნენ.
– ხალხის მხრიდან ძირითადი აქცენტი თქვენსა და სოფო ნიჟარაძეზე კეთდება, რომ ფული თქვენ გაქვთ და ამ კონკურსს რომელიმე თქვენგანი მოიგებს.
ნინა: საიდან მოიტანეს, რომ ფულიანი ვარ?! უფლის წყალობით, საჭმელი არ მიჭირს. მამაჩემი ერთ დროს ძალიან შეძლებული იყო, მაგრამ ბოლო რამდენიმე წელია, ისიც ჩვეულებრივად ცხოვრობს. მე კიდევ ერთი წელია, არ ვმუშაობ. წუწუნი მძულს, მაგრამ ნამდვილად არ მაქვს ამ ეტაპზე ის მდგომარეობა, რომ საკუთარ თავს ესემესები ვუგზავნო.
ან სოფო საიდან არის ფულიანი? არც სოფოა მშიერი, ჩემზე მეტი გასტროლიც აქვს და ჰონორარიც, მაგრამ არ მგონია, იდგეს და საკუთარ თავს ესემესებს უგზავნიდეს. როცა ვიხუმრე, ვისაც მდიდარი "ნაშა" ჰყავს, ის მოიგებს–მეთქი, არ ვიცი, საიდან მოიტანეს, მაგრამ ვიღაცეებმა იფიქრეს, რომ ამით სოფოს ვუკბინე. სოფოს გარდა, გოგოები არ არიან? არავისთვის მიკბენია, მართლა ვიხუმრე. მართლა ასე რომ ვფიქრობდე, არც ვიტყოდი. ანდა ცუდი რა არის იმაში, ვისაც "ნაშა", შეყვარებული, ქმარი ჰყავს და ესემესებს გამოუგზავნის?
– შეგიძლიათ გვითხრათ, რამდენ ესემესს აგზავნის თქვენი ოჯახი თქვენს მხარდასაჭერად?
ნინა: მამაჩემი, ჩემი ძმა და მათი სამეგობრო მიგზავნიან ესემესებს, ასევე – ჩემი სამეგობროც. როგორც მე ვიცი, დაახლოებით 2–3 ათასი ესემესი საკმარისია იმისათვის, რომ შემდეგ ტურში გადახვიდე. ერთი ესემესი 50 თეთრი ღირს. არ მჯერა, რომ მას, ვინც მონაწილეობს, მაყურებლისგან 1000 ესემესი მაინც არ შეუგროვდეს. გორში დავიბადე და რამდენადაც ვიცი, ჩემი ქალაქი გვერდში მიდგას, ძალიან დიდი მადლობა მათ. ვიცი, რომ ძალიან ბევრს არ ვუყვარვარ, მაგრამ ძალიან ბევრსაც ვუყვარვარ. თუ ვინმეს მდიდარი ქმარი ჰყავს და "ნაშა", გამოუგზავნოს, ღმერთმა შეარგოს! მეც რომ მყავდეს და არ გამომიგზავნოს, ხმას არ გავცემ.
– ამ პროექტში თქვენს მონაწილეობას რამდენიმე ნეგატიური შეფასებაც მოჰყვა. სოციალურ ქსელში ვკითხულობდი თქვენზე კომენტარებს, რამდენიმე დღის წინ მგლოვიარე იყო, ახლა კი ცეკვავს, ბედნიერიაო და ა.შ.
ნინა: მე ხან ვტირი, ხან ვმღერი. აი, რეზიკოს ჰკითხეთ, ეს ბიჭი შევშალე. ქართული ცეკვების ტურზე "ცანგალა და გოგონა" რომ ვიცეკვეთ, იმ დღეს თენგოს (ნინას ყოფილი ქმარი, თენგო წივწივაძე, რომელიც ავტოავარიაში დაიღუპა. ავტ.) უფროსი შვილი იყო მოსული, მამამისს ძალიან ჰგავს. კულისებში შემომძახა, ჩავეხუტე და, სცენაზე სანამ გავიდოდი, ისე ვტიროდი, ვიზაჟისტი დამდევდა, ეს რა ქენი, მთელი მაკიაჟი ჩამოგივიდაო. ვისაც ეს არ ესმის, არც ვაპირებ, ავუხსნა და თავი მოვაწონო. როცა ადამიანი შეუგნებელია, ეს მისი პრობლემაა, ასეთი მე ვერ მაწყენინებს. ყველამ თავის თავს მიხედოს!
– ნინა, არაჩვეულებრივ ფორმაში ხართ, არადა ერთ–ერთ სტატიაში პლასტიკური ქირურგიის მსხვერპლთა შორის თქვენც დაგასახელეს. თვლით, რომ მართლაც ხართ პლასტიკური ქირურგიის მსხვერპლი?
ნინა: სულაც არ ვთვლი ასე. ყურადღების ნაკლებობა არც მანამდე მიგრძვნია და არც პლასტიკური ოპერაციის შემდეგ. ამ შემთხვევაში, იმ ქალბატონ ქირურგს უფრო აქვს პრობლემა, ვინც ამას ამბობს. სამედიცინო ეთიკა არსებობს, რომლის დარღვევაც არ შეიძლება. არც ერთ პლასტიკურ ქირურგს უფლება არ აქვს, ასე გააკრიტიკოს სხვა, მით უმეტეს, როცა ეს ოპერაცია მას არ გაუკეთებია. ეს ქალი ჩემს თვალში ძალიან დამცირდა. მან შეურაცხყოფა მე კი არა, სხვებს მიაყენა, სამედიცინო ეთიკა დაარღვია.
ეკა ლემონჯავა, ჟურნალი სარკე