რატომ დაითხოვა გოჩა ჩერტკოევმა ცოლისძმა პროექტიდან

პროექტის "ცეკვავენ ვარსკვლავები" ჟიურის უცვლელი წევრი, ცნობილი სამჯელისო მოცეკვავე, ექსცენტრიკული გოჩა ჩერტკოევი გასულ სეზონში ამბობდა, რომ ჟიურის მაგიდასთან ვეღარ ვიხილავდით, მაგრამ ცდუნებას ვერ გაუძლო და მესამე სეზონზეც კუთვნილი ადგილი ამაყად დაიკავა. უნდა, რომ სამეჯლისო ცეკვები უფრო პოპულარული გახდეს საქართველოში. ამჯერად მას "კონკურენტი" გამოუჩნდა ჟიურიში – მოსკოვის დიდი თეატრის ყოფილი არტისტი, ბალეტის ვარსკვლავი ნიკოლოზ ცისკარიძე, რომელიც ამავე დროს რუსეთის ცენტრალურ არხზე ასეთივე პროექტის ჟიურის უცვლელი წევრია. მას და ბატონ გოჩას აქვთ რაღაც საერთო – დამტვრეული ქართულით საუბრის რაღაცნაირად საყვარელი მანერა, პირდაპირი, შეულამაზებელი შეფასებები კონკურსანტების მიმართ და, რაც მთავარია, პიროვნული ხიბლი. თუმცა ცისკარიძე კიდევ უფრო "დაუნდობელია" და მის ფონზე გოჩა ჩერტკოევი მონაწილეებისთვის გარკვეულ შვებადაც კი იქცა.
ამერიკიდან თბილისში გოჩა ჩერტკოევის ჩამოსვლას ოჯახური სკანდალი დაერთო. მესამე სეზონზე მოცეკვავის სტატუსით მონაწილეობა უნდა მიეღო მის ცოლისძმას, რატი გაჩეჩილაძეს (გიგი გაჩეჩილაძის უმცროს ძმას), მაგრამ, როგორც კი გოჩამ ეს ამბავი გაიგო, პროდიუსერებს კატეგორიულად მოსთხოვა – ან მე, ან რატი პროექტშიო. შედეგად, რატის ჩანაცვლება სწრაფად მოხდა. ჩერტკოევს კი ცოლის ოჯახი, მათ შორის, მისივე აღმზრდელი თენგიზ გაჩეჩილაძე გაუნაწყენდა.
დანარჩენ დეტალებზე, კონკურსის კულუარებსა და პირად დამოკიდებულებებზე "სარკეს" გოჩა ჩერტკოევი, როგორც ყოველთვის, გულახდილად ესაუბრება.
– ბატონო გოჩა, ზოგადად როგორ შეაფასებთ პროექტის "ცეკვავენ ვარსკვლავები" მესამე სეზონს, წინა ორზე უკეთესია თუ უარესი?
– ეს სეზონი უკეთესია. ჯერჯერობით შოუ წინ მიდის, რადგან დეტალებიც იხვეწება. ყველა კონკურსანტი ვიზუალურად თუ სხვა მონაცემებით კარგია, მაგრამ ეს, ჩემი აზრით, ჭკვიანური არ არის – არჩევანის გაკეთება რთულია.
– მეორე სეზონზე მაყურებელს შთაბეჭდილება დარჩა, რომ შემდეგში ჟიურის წევრად აღარ გიხილავდათ, რადგან მალე დატოვეთ ჟიურის სკამი. რატომ დაბრუნდით, რა ინტერესი გაქვთ ამ შოუსთან დაკავშირებით?
– მე მხოლოდ პირველ წელს ვაპირებდი ჟიურის წევრად ყოფნას. რომ გავიგე, აქ "ცეკვავენ ვარსკვლავები" დაიწყო, საკუთარ მოვალეობად ჩავთვალე, ჩემს ქვეყანაში ჩამოვსულიყავი და შოუსთვის მხარი დამეჭირა. მეორედ აღარ ვაპირებდი ჩამოსვლას, მაგრამ საბოლოოდ მესამე სეზონშიც ვარ. ასე იმიტომ მოვიქეცი, რომ მინდა, ამ შოუს განვითარებაში წვლილი შევიტანო. სამწუხაროდ თუ საბედნიეროდ, მესამე სეზონში ჩემი ყოფნა საჭიროა. პასუხისმგებლობის გრძნობა მაქვს. ამერიკაში ამ საქმით ვარ დაკავებული და მინდა, საქართველოშიც განვითარდეს ეს სფერო – სამეჯლისო ცეკვები.
განვითარებულ ქვეყნებში ეს შოუ ძალიან წარმატებულია. მინდა, აქაც ასე იყოს, რადგან, ჩემი აზრით, საქართველოში თუ ვერ იქნება წარმატებული, ეს ქვეყნის ჩამორჩენილობას განსაზღვრავს. შტატებში ჩემს საქმეს მოვწყდი. ჩემი მთავარი მიზანია, პროდიუსერებს დავეხმარო, ჩემი შემცვლელი მოვაძებნინო, რომ შემდეგ სეზონზე ამ შოუსთვის აღარ ვიყო საჭირო და უჩემოდ გაგრძელდეს. ვნახოთ, რა იქნება, წინასწარ ვერაფერს ვიტყვი.
– პირველივე სეზონიდან ჟიურის ყველაზე მკაცრ წევრად ხართ აღიარებული. თქვენ როგორ აფასებთ საკუთარ თავს?
– ვფიქრობ, მკაცრი არც ერთ სეზონზე ვიყავი. უნდა შეაფასო ის, რასაც ხედავ – ეს ჩვეულებრივი ამბავია. ამისთვის ცოდნა და გამოცდილებაა საჭირო. ჟიურის წევრობა ადვილი არ არის, ყველა ერთმანეთს უნდა შეადარო, არაფერი უნდა გამოგრჩეს. თუ ზედიზედ ნეგატიურ შეფასებას აძლევ კონკურსანტს, ერთ დღეს შედარებით რბილი უნდა იყო, რომ ბალანსი დაიცვა. კოლეგების ქულებს უნდა მიაქციო ყურადღება.
– ორი სეზონის განმავლობაში თქვენზე დაბალ ქულას არავინ წერდა, თუმცა ახლა ნიკა ცისკარიძე "გჯობნით".
– კონკურსის დასაწყისიდანვე მაღალ ქულას ვერ დაწერ. წარმოუდგენელია, კონკურსანტებმა დასაწყისშივე ასეთი ცეკვა აჩვენონ. კონკურსის განმავლობაში დაიხვეწებიან და ქულებიც ამაღლდება. ნიკა დაბალ ქულებს თუ წერს, ეს ნიშნავს, რომ მას თავისი დამოკიდებულება აქვს კონკრეტული ცეკვის მიმართ. ყველას თავისი აზრი გააჩნია.
– თავად ჟიურის წევრებს შორის თუ იგრძნობა კონკურენცია?
– არა. ჟიურის ეს შემადგენლობა ძალიან მომწონს. კონკურენცია ჟიურის წევრებს შორის არც არასდროს ყოფილა. პირველი სეზონი ცოტა ისეთი იყო...
– დაძაბული?
– ასეც ვერ ვიტყვი, თუმცა მე არც მადარდებს ასეთი რაღაცეები. ამ სეზონზე ყველას თავისი ადგილი აქვს. ერთმანეთის საქმეებში არავინ ვერევით. მაგალითად, სოფო შევარდნაძე თუ 10 ქულას დაწერს, მე შემიძლია 1 ქულა დავწერო. ეს არც სოფოს ეწყინება და არც – მე. აბსოლუტურად გვესმის ერთმანეთის.
– პირველ სეზონზე თქვენ გვერდით ნანუკა ჟორჟოლიანი იჯდა და ისე ჩანდა, რომ ძალიან დამეგობრდით. ახლა ნინო სურგულაძის გვერდით ხართ. ასევე კარგად გაუგეთ ნინოს?
– ძალიან მომწონს ნინო სურგულაძე. ბუნებრივია, ნანუკა და ნინო პიროვნულად განსხვავდებიან ერთმანეთისგან. ნანუკა ჟურნალისტია, ამიტომ სხვანაირად ურთიერთობს ადამიანებთან, სხვა ენერგია აქვს. ნინო მომღერალია, სულ სხვანაირი ემოცია და დამოკიდებულება აქვს. ამ სეზონზე ცოტა უფრო ახლოს რომ ვისხდეთ ჟიურის წევრები ერთმანეთან, კარგი იქნებოდა. ძალიან დაშორებულები ვართ და მხოლოდ გვერდით მჯდომთან თუ გვაქვს კონტაქტი. მე ნინოს და ნიკას შემიძლია ვეკონტაქტო, სოფო და ოთარ ტატიშვილი უკვე მოშორებით სხედან.
– ჟიურის წევრებს – არა, მაგრამ შეიძლება კონკურსანტებს სწყინდეთ დაბალი ქულები. თუნდაც, გუგა კუზანოვმა ჟურნალისტებთან განაცხადა, რომ ქართულ ტურში თქვენ მიერ დაწერილი შედარებით დაბალი ქულა ეწყინა.

– არ ვიცოდი, გუგამ ეს თუ თქვა. საერთოდ კონკურსი ისეთი ფორმატია, რომ, გამარჯვებულის გარდა, ყველა ნაწყენი რჩება. ამიტომ ამას შეჩვეული ვარ. თუ ვინმე ნაწყენია, ცივი წყალი დალიოს!
– ამ სეზონზე ვინ მოგწონთ განსაკუთრებით, ვინ ცეკვავს კარგად?
– როგორც თავიდან ვახსენე, ამ სეზონის სირთულე არის ის, რომ ყველა კონკურსანტი ძლიერია. ჩემი ფავორიტი ჯერჯერობით ნანა ნებიერიძეა, მაგრამ ვერ ვამბობ, რომ ის მოიგებს, რადგან შეიძლება ნებისმიერმა გაიმარჯვოს. ნანა ძალიან ნიჭიერია, თუმცა შეიძლება ყველა ეპიზოდში სხვადასხვა ფავორიტი მყავდეს. ქართული ცეკვის ტურში უპირობო ლიდერი მეცამეტე კონკურსანტი, ქეთი ხატიაშვილი იყო. იულია ქავთარაძეც ძლიერი იყო, მაგრამ გავარდა.
– მის დაბრუნებასთან დაკავშირებით დიდი აჟიოტაჟი ატყდა. პროექტის პროდიუსერმა ნოე სულაბერიძემ განაცხადა, რომ ვერ დააბრუნებდა, რადგან კონკურსის ფორმატი ამას არ ითვალისწინებდა. თქვენზე რომ ყოფილიყო დამოკიდებული, დააბრუნებდით?
– რა თქმა უნდა, არ უნდა დაბრუნდეს. ეს შოუა და კონკურსანტმა თუ დატოვა პროექტი, აღარ უნდა დაბრუნდეს. მხოლოდ გამონაკლის შემთხვევებში შეიძლება ყოფილი კონკურსანტის დაბრუნება, თუ პროექტში რაღაც მოხდა, მაგალითად, სხვა კონკურსანტი ცუდად გახდა ან სხვა ამგვარი შემთხვევის დროს. რატომ უნდა წავიდეთ კონკურსის წინააღმდეგ, თუ კონკურსანტს მაყურებელი არ უჭერს მხარს? მარტივი ლოგიკაა. ჟიურის წევრები ვაფასებთ კონკურსანტებს, მაგრამ ხალხი ირჩევს მათ.
– ანატოლი ბოისას მიმართ თითქოს ლიბერალური ხართ. მართლა ასე კარგად ცეკვავს?
– ანატოლი ბოისამ კონკურსის დაწყებიდან მეორე ეპიზოდში ძალიან ცუდად იცეკვა, მაგრამ შემდეგ ტურში გამოასწორა და ძალიან კარგი შედეგი აჩვენა. მიუხედავად იმისა, რომ კალათბურთელია, მოუქნელი არ არის და სხვანაირი ენერგია აქვს. კარგად ასრულებს დაკისრებულ მოვალეობას. ის ყველა კონკურსანტზე უკეთ გადმოსცემს მამაკაცის დამოკიდებულებას ქალის მიმართ. ეს კი ამ პროექტში მთავარია. ცეკვებში უნდა ჩანდეს, მამაკაცმა როგორ უნდა მოუაროს ქალს. ანატოლი ამაში ძლიერია, ამას კარგად გადმოსცემს, მაგრამ, რა თქმა უნდა, თუ სწორად არ იცეკვებს, მხოლოდ ეს დამოკიდებულება შორს ვერ წაიყვანს.
– ჟიურის წევრები სოფო ნიჟარაძესაც კარგ შეფასებებს აძლევთ. შეიძლება ითქვას, გამორჩეულად დადებითად აფასებთ მას. ასე არ არის?
– არ ვფიქრობ, რომ რომელიმე კონკურსანტს უფრო კარგი შეფასება აქვს ჩვენგან, ვიდრე სხვას. არა მგონია, რომ სოფოს უფრო მეტი ქულა ჰქონდეს ჩვენგან, ვიდრე სხვებს. ჩვეულებრივად მიდის, როგორც ყველა სხვა დანარჩენი კონკურსანტი. არ ვიცი, ხალხი რას ლაპარაკობს. ჩემგან განსხვავებით, ხალხი იცნობს სოფო ნიჟარაძეს თუ სხვა კონკურსანტებს, იცის მათი ისტორია, წარსული. მე კი მათი სახელებიც მერევა. ჩემთვის ისინი მხოლოდ კონკურსანტები არიან. არ მაინტერესებს მათი ისტორია და არც მინდა, ვიცოდე. ამიტომ ყველას მიმართ ობიექტური ვარ.
– რა შემთხვევაში შეიძლება იყოთ სუბიექტური, რა შეიძლება აპატიოთ კონკურსანტს?
– სუბიექტური არასდროს ვიქნები, მაგრამ შემიძლია თვალი დავხუჭო ისეთ შემთხვევებზე, როგორიც არის ცეკვის დროს იატაკზე ფეხის მოცურება. ასეთ დროს შეიძლება ძალიან მკაცრი არ ვიყო. საბოლოოდ მაინც ის იგებს, ვისაც ფეხი არ მოუსრიალდება, ვინც ნეგატიური ხასიათის არ არის, ვინც ცდილობს, იცეკვოს და ა.შ.
– შტატებში ასეთივე პროექტის მენეჯერი და პროდიუსერი იყავით. რა განსხვავებაა ქართულსა და ამერიკულ პროექტებს შორის, მონაწილეების, მაყურებლების მხრივ?
– აქ ზრდილობა აკლიათ. ამერიკაში ვერავისგან გაიგებთ, ვიღაცაზე ცუდს რომ ამბობდეს. იქ ან დადებითს ამბობენ, ან – არაფერს. აქ, კონკურსანტი რომ გავარდება, მიდიან და ეუბნებიან, შენ როგორ გავარდი და ეს მახინჯები როგორ დარჩნენო. აქ ასეთი საუბარი ნორმალურად მიიჩნევა. "რა ცუდია, რომ გავარდი, ეს საზიზღარი როგორ დარჩა კონკურსში და შენ გარეთ უნდა იყო?!" – ასეთი ტექსტი აქვთ. ხანდახან ისეთი ნეგატიური რაღაცეები მესმის, რომ, ნეტა, არ ვიგებდე! ალბათ კარგი იქნება, თუ დიდ ბანერს გავაკეთებთ და დავაწერთ: "შური და ბოროტება კლავს ადამიანს!".აქ კონკურენტს მტრად აღიქვამენ. ურჩევნიათ, ცუდებში იყვნენ კარგი, ვიდრე კარგებში – საუკეთესო. ამერიკაში ასეთი რამ არ ხდება. აქ კონკურენტის პატივისცემა არ იციან. არადა კონკურენტი უნდა დააფასო.
– თქვენ ვინ გაფასებთ ობიექტურად, ვის რჩევას და აზრს ითვალისწინებთ ცხოვრებაში?
– ჩემი მეუღლე, შორენა. ჩვენ ერთმანეთს ობიექტურად ვაფასებთ. შეიძლება ითქვას, რომ ერთმანეთი გავზარდეთ. მე, შორენა და ჩემი შვილი ლევანი – ეს სამეული ერთმანეთის მიმართ ყოველთვის ობიექტური ვართ. ვუსმენთ ერთმანეთს და ვითვალისწინებთ აზრს. თუ შორენა ხედავს, რომ კარგად არ გამოვიყურები, მეტყვის: "რამე გააკეთე! რატომ გასუქდი?". მეც – ანალოგიურად, თუ არ მომწონს, რა აცვია, ვეუბნები, რომ სხვა კაბა უფრო უხდება. შვილსაც, ლევანსაც, ასევე ვურჩევ იმას, რაც უკეთესად მიმაჩნია და ისიც ხშირად მაძლევს რჩევებს. ამას ერთმანეთს ნეგატიურად არ ვეუბნებით, არამედ იმიტომ, რომ ერთმანეთზე გული შეგვტკივა.
– როგორი მეუღლე ხართ?
– რთულია საკუთარ თავზე საუბარი. ჯერ ერთი, საკუთარი თავი მეუღლედ არ მიმაჩნია – მე და შორენა ძალიან ახლო მეგობრები ვართ. მეგობარი კი იმას ნიშნავს, რომ მისი ნახვა და მასთან ლაპარაკი ყოველდღე გინდა. ეს უფრო მეტია, ვიდრე ცოლქმრობა.
– არ აპირებთ, შვილი, ლევანი, წამოიყვანოთ საქართველოში და გააცნოთ ქვეყანა?
– არ მინდა, ლევანმა ამ ეტაპზე ნახოს ქვეყანა. ის სხვანაირად არის გაზრდილი, სხვა რამე ესმის საქართველოზე. ვერ წარმოიდგენს, რომ ქუჩაში შეიძლება ხელგაწვდილი ბებო დაინახოს ან ბავშვები, რომლებიც ფულს გთხოვენ. ეს პირველად რომ დავინახე, შოკი მივიღე. არ მინდა, იგივე განიცადოს. ადრე თუ გვიან ლევანი ნახავს საქართველოს და, იმედია, იმ დროისთვის ქვეყანაში უკეთესი სიტუაცია იქნება.
– როგორც შევიტყვეთ, გიგი გაჩეჩილაძის ძმას, ანუ თქვენს ცოლისძმას, რატის, ამ პროექტში მონაწილეობა აუკრძალეთ. უფრო მეტიც, როცა თბილისში ჩამოხვედით, ის უკვე მონაწილე იყო და მისი გაშვება მოითხოვეთ. რატომ?
– ჩემი პროფესიონალიზმი მარტო ქულებით არ შემოიფარგლება. ჩემიანი – ჩემიანია და არ მინდა, კონკურსში იყოს. ცუდი საქციელი იქნებოდა ჩემგან, კონკურსში რომ ნათესავი დამეშვა.
– გიგი გაჩეჩილაძეც ხომ ნათესავია, ის წინა სეზონში მონაწილეობდა ამ კონკურსში.
– გიგი 8 წელი არ მყავდა ნანახი. რატი აქედან 16 წლის წავიყვანე ამერიკაში და ჩვენთან ცხოვრობს. მართალია, მის მიმართ ობიექტური ვიქნებოდი, მაგრამ ვფიქრობ, მაინც ცუდი ტონი იქნებოდა, ასეთი ახლო ნათესავი დამეშვა კონკურსში.
– როგორც ამბობენ, ამ გადაწყვეტილებამ თქვენი აღმზრდელი პედაგოგები, სიდედრ–სიმამრი თენგიზ და ლარისა გაჩეჩილაძეები გაანაწყენა და, როგორც გავიგეთ, ამ ოჯახთან ურთიერთობა გაგიფუჭდათ.
– არ ვიცი, ჩემამდე ეს განწყობა არ მოსულა. თქვენგან მესმის, გაჩეჩილაძეებთან ურთიერთობა რომ გამიფუჭდა. არ ვიცი, ვინ რას ამბობს ინტერვიუებში, პირადად ჩემთვის ეს არავის უთქვამს. თუ ვინმე ნაწყენია, ცივი წყალი დალიოს! არავისთან არანაირი კონფლიქტი არ მქონია, არც გიგისთან, არც – რატისთან. ჩემთან არაფერი უთქვამთ.
– ალბათ შეიტყობდით, რომ წინა სეზონის წყვილი – გიორგი ვარდოსანიძე და სალომე ჭაჭუა შეყვარებულები გახდნენ, შესაბამისად, სალომე და თქვენი ცოლისძმა გიგი გაჩეჩილაძე, რომლებიც იქამდე შეყვარებულბი იყვნენ, ერთმანეთს დაშორდნენ. ეს ფაქტი როგორ აღიქვით?
– გიორგის და სალომეს ამბავი ჩამოსვლისას გავიგე. ასე ხდება, ხალხი ხან ერთდება, ხან – ეყრება. სალომე ისევ ის არის ჩემთვის, რაც მანამდე იყო. ძალიან ბევრი მოცეკვავე ცეკვის დროს ერთად არის, შემდეგ კი, თუ ცეკვას წყვეტენ, ერთმანეთს შორდებიან.
– წინა სეზონზე "სარკეში" აღნიშნეთ, რომ ქუჩაში ხალხი თქვენს დანახვაზე განსხვავებულ ემოციებს გამოხატავდა, თქვენი იმიჯი უკვირდათ. ამ ჩამოსვლაზე როგორ რეაქციას ამჩნევთ?
– ალბათ უფრო შეეჩვივნენ ჩემს იმიჯს, ქუჩაში მცნობენ. ახლა ისე გულახდილად აღარ გამოხატავენ თავიანთ ემოციას ჩემი სტილის მიმართ, როგორც ადრე. სამოსი ჩემთვის მხოლოდ ტანსაცმელი არ არის. ყველა სიტუაციაში შესაბამისად უნდა მეცვას. სამოსმა პიროვნება უნდა გამოხატოს. ამჟამად 6 ჩემოდნით ვარ წამოსული.
– რას გრძნობთ ხალხისგან?
– ნეგატიური დამოკიდებულება არავისგან მიგრძვნია და ეს ძალიან მახარებს. ხალხი ძალიან კეთილია.
– ფიქრობთ, რომ საბოლოოდ საქართველოში დაბრუნდებით?
– სამწუხაროდ – არა. ის სფერო, რაშიც ვარ, აქ განვითარებული არ არის. ზოგადად კი, ძალიან მინდა, საქართველოში შოუბიზნესი განვითარდეს, ოღონდ აუცილებლად დადებითი გავლენა უნდა მოახდინოს ხალხზე. ყველას უნდა ესმოდეს, რომ შოუბიზნესი თაობებს ზრდის. ამიტომ ყურადღება უნდა მიექცეს, რას აჩვენებენ და ა.შ.
– უყურებთ ქართულ შოუებს?
– ვერ ვუყურებ, რადგან ძალიან კრიტიკული ვარ. კარგი იქნებოდა მეტი მომზადება.
– გამართული ქართულით მეტყველება ისევ ვერ გამოგდით. რატომ ვერ გააუმჯობესეთ ქართული?
– თუ ყურადღებას მივაქცევ წინადადების სწორად დაწყობას, იმ რეაქციას და ემოციას ვეღარ გამოვხატავ, რაც პირველად მომდის თავში. ამიტომ, რა ენაზეც მომდის შეფასებები თავში, მას ვიყენებ შოუში. თან, რაც უფრო შეზღუდული ვარ დროში, რომ სწრაფად უნდა ვთქვა სათქმელი, მით უფრო მიჭირს ემოციის ქართულ ენაზე სწორად გადმოცემა.
მანანა ნოდია, ჟურნალი სარკე