რატომ აგდებდა შოკში ნიკა გვარამია ცოლის მეგობრებს

"რუსთავი 2"–ის გენერალურ დირექტორ ნიკა გვარამიას კონკურენტი ოჯახში ჰყავს ცოლის, სოფია ლილუაშვილის სახით. მისი მეორე ნახევარი კონკურენტ არხზე, "იმედზე" პროექტ "ახალი ხმის" პროდაქშენის გუნდის წევრია. ასეთ პირობებში ცოლ–ქმარი ახერხებენ, სახლში კოაბიტაცია ჰქონდეთ. სოფია პროფესიით ინგლისური ენის პედაგოგია. ნიკა შეუღლებამდე დიდი ხნით ადრე გაიცნო, თუმცა მათი სიყვარული 7 წლის წინ დაიწყო. სოფია მაშინ პირველ ქმართან განქორწინების უარყოფითი ემოციებით იყო დატვირთული და ახალი ურთიერთობის დაწყებას არ გეგმავდა. ნიკამ მისი და მისი შვილის, გიკოს გულის მოგება მოახერხა და ასე შედგა მათი ოჯახი. ამჟამად ცოლ–ქმარს სამი შვილი ჰყავთ – გიკო, რომელიც ახლა 16 წლის არის, 6 წლის სანდრო და 4 წლის ქეთევანი.
– სოფია, გაიხსენეთ, როგორ დაიწყო თქვენი და ნიკას ურთიერთობა, როდის გაჩნდა თქვენ შორის პირველი ნაპერწკალი.
– 2001 წელს მე და ნიკა ერთმანეთს პირველად ქობულეთში, ინტელექტუალური თამაშების "რა? სად? როდის?" ამიერკავკასიის ჩემპიონატზე შევხვდით. მაშინ კლუბის ხელმძღვანელ გიორგი მოსიძის ასისტენტად ვმუშაობდი, მას საორგანიზაციო საკითხებში ვეხმარებოდი. პრინციპში, ნიკა არც შემიმჩნევია. როგორც თვითონ ამბობს, მან მომაქცია განსაკუთრებული ყურადღება და გამოიკითხა, ვინ ვიყავი და რას ვსაქმიანობდი. მაშინ ორივე ჩვენი ცხოვრებით ვცხოვრობდით და ჩვენს ცხოვრებაში იყვნენ სხვა ადამიანები. ამის შემდეგ დიდი დრო გავიდა და არანაირი ურთიერთობა არ გვქონია.
2005 წელს შევხვდით საერთო მეგობრის ქორწილში. იმ დროს ნიკა უკვე დეპუტატი იყო. იქ საერთოდ არ მომცილებია გვერდიდან, ტელეფონის ნომრებიც გავცვალეთ. რამდენჯერმე დამირეკა. მე კი შეხვედრაზე უარს ვეუბნებოდი. ალბათ მობეზრდა მუდმივი უარი და მერე აღარ დაურეკავს.
შემდეგი შეხვედრა მამაჩემის, გიორგი ლილუაშვილის პანაშვიდზე შედგა 2006 წლის დასაწყისში. ძალიან გამიკვირდა ნიკას იქ ნახვა. აღმოჩნდა, რომ მამას არ იცნობდა და ჩემ გამო მოვიდა, მაგრამ მე ეს არ ვიცოდი. ამის მერე კიდევ რამდენჯერმე შემეხმიანა. ისევ არ შევხვდი. ერთ დღესაც დამირეკა, დღეც მახსოვს – 2006 წლის 5 ოქტომბერი, სხვათა შორის, არჩევნები იყო. მითხრა, აუცილებლად უნდა გნახო, მნიშვნელოვანი საქმე მაქვსო. დღესაც არ ვიცი, რატომ შევხვდი და სწორედ იმ დღიდან დაიწყო ჩვენი ურთიერთობა. ერთი საათით გავედი სამსახურიდან და უკან რომ დავბრუნდი, ვფიქრობდი, რა იყო ამ შეხვედრის მიზეზი. დაბნეული ვიყავი. იმ საღამოსვე მომაწია მესიჯი და მას შემდეგ აღარც გაჩერებულა. ორ თვეში უკვე ერთად ვცხოვრობდით. ერთი წლის თავზე სანდრო დაიბადა.
– რატომ არ ხვდებოდით ნიკას, არ მოგწონდათ?
– ახალი განქორწინებული ვიყავი. მარტო ვზრდიდი ბავშვს და მხოლოდ ამაზე ვფიქრობდი. ალბათ არ ვიყავი მზად ურთიერთობებისთვის. თან ნიკას არ ვიცნობდი, ჩემთვის მხოლოდ დეპუტატი იყო.
– როგორ მოგაწონათ თავი, რითი მოგხიბლათ ასე მალე – ორ თვეში?
– ყურადღებით, სითბოთი და უსაზღვრო სიყვარულით. ეს ნიკასთვის პირველი ქორწინებაა, ჩემთვის – მეორე. პირველად ძალიან პატარა ვიყავი. მეორე აბსოლუტურად განსხვავებული შემთხვევაა, გააზრებულად გადავდგი ნაბიჯი. ზუსტად ვიცოდი, რომ ნიკა იყო ის ადამიანი, რომელთან ერთადაც მინდოდა მთელი ცხოვრების გატარება. თითქმის უსიტყვოდ გვესმის ერთმანეთის და ეს ძალიან მახარებს. მან მარტივად გამონახა საერთო ენა ჩემს შვილთან, გიკოსთან, რაც ჩემთვის ძალიან მნიშვნელოვანი იყო. გიკო ახლა 16 წლისაა. ნიკასთან რომ გადავედით საცხოვრებლად, მერვე წელში იყო. დღეს ნიკა და გიკო კარგი მეგობრები არიან. გიკოსთვის ყველაზე დიდი ავტორიტეტი ნიკაა. ერთად არჩევენ გიკოს "სიყვარულობანას" და სხვა სათავგადასავლო ამბებს. საინტერესო საუბრებია.
– შეყვარებულობის პერიოდში ნიკა ალბათ ბევრ სიურპრიზს გიწყობდათ.
– ნიკას მაინცდამაინც არ უყვარს სიურპრიზები, განსაკუთრებით, თუ მას უწყობენ. არ უყვარს დღესასწაულები, მაგალითად, ახალი წელი ან საკუთარი დაბადების დღე, თუმცა შეუძლია და გაუკეთებია კიდევაც, რომ ჩვეულებრივი დღე დღესასწაულად უქცევია. რომანტიკული ადამიანია. ყოფილა საჩუქრები, მოულოდნელი მოგზაურობები, რომანტიკული საღამოები...
– როგორი ქორწილი გქონდათ?
– ქორწილი არ გადაგვიხდია. ამისი სურვილი არც მე მქონია და არც ნიკას. მარტივად შევთანხმდით. ამერიკაში რომ მივდიოდით, ქორწინების მოწმობა მოგვთხოვეს და სასწრაფო წესით მოვაწერეთ ხელი. მეჯვარეებად ჩვენი ბავშვის ძიძა და მძღოლი გვყავდა.
– ალბათ იმ პერიოდს გულისხმობთ, როცა განათლების მინისტრობიდან მოულოდნელად უცხოეთში გაემგზავრა სასწავლებლად.
– მაშინ ნიკასთვის ძალიან მნიშვნელოვანი იყო ჩემი თანადგომა. უნდოდა, ოჯახიც თან ჰყოლოდა. ვიცოდით, რომ ამის გამო ფინანსურად გაგვიჭირდებოდა, სამი ბავშვით უცხო ქვეყანაში... ქექე (ქეთევანი) სულ რაღაც 3 თვის იყო, მაგრამ ჩვენთვის ეს იმდენად მნიშვნელოვანი საფეხური გახლდათ, რომ სირთულეებს არ შევუშინდით და კარგად გავუმკლავდით ყველაფერს. წელიწადნახევარი ვიყავით ამერიკაში. ჩემი აზრით, ძალიან სასარგებლო და საინტერესო გამოცდილება იყო. ვფიქრობ, ამ გამოწვევამ ნიკაც გააძლიერა და ჩვენი ოჯახიც.
– სულ ახლახანაც რთული პერიოდი გედგათ – თქვენს ქმარს სასამართლო პროცესები ჰქონდა, დაპატიმრებულიც იყო. როგორც ჩანს, არც ისეთი იოლია ნიკა გვარამიას ცოლობა. თქვენგან რას ითხოვს, რას სჭირდება ქმარს ასეთ დროს?
– ერთად დავიწყეთ თუ არა ცხოვრება, მაშინ დაიწყო რთული პერიოდებიც. განსაკუთრებით მძიმედ მახსენდება 2008 წლის აგვისტო. მაშინ იუსტიციის მინისტრი იყო. ის დღეები საერთოდ არ გვეკონტაქტებოდა, სახლშიც რამდენიმე წუთით შემოივლიდა ხოლმე. არ ვიცოდი, რა უნდა მექნა და ვერც ვეკითხებოდი. ასეთ ვითარებაში ნიკა ჩემზე და ბავშვებზე უფრო ნერვიულობს ხოლმე. ვცდილობ, არ შევიმჩნიო ნერვიულობა, მაგრამ, სამწუხაროდ, არ გამომდის. ამ დროს ნიკას სახლში ყოფნა ყველაფერს ურჩევნია და ცდილობს, მხოლოდ ოჯახის წევრებთან და მეგობრებთან ურთიერთობით შემოიფარგლოს. მისთვის ყველაზე მთავარი სახლში სიმშვიდეა. ნაკლები უნდა ესაუბრო სირთულეებზე და კითხვებით არ უნდა შეაწუხო.
ამ დროს ასმაგად თბილი და ყურადღებიანი ვარ, რომ თანადგომა ვაგრძნობინო, რაც ძალიან სჭირდება. ჯერ არ მახსოვს სირთულე, რომლის დაძლევაც მან ვერ შეძლო. ამას დამოუკიდებლად აკეთებს, თან – ჩემი ემოციური მხარდაჭერით.
რაც შეეხება სასამართლო პროცესებს, ყოველთვის მჯეროდა ნიკას უდანაშაულობის და ეჭვიც არ მეპარებოდა, რომ გამამართლებელი განაჩენი დადგებოდა.
– მას შემდეგ, რაც ქვეყანაში ნაციონალური მოძრაობის მმართველობის დროინდელი უკანონობები გამოაშკარავდა, თქვენი ქმრისა და ოჯახის მიმართ საზოგადოებისგან როგორ დამოკიდებულებას ხედავდით?
– რა თქმა უნდა, აგრესიის შემთხვევებიც ყოფილა და პოლიტიკურად ასეთი აქტიური საზოგადოების მხრიდან ეს გასაკვირი არ არის, თუმცა ნიკას მიმართ ბევრად ხშირია პოზიტიური ემოციების გამოხატვა.
– სახლში საუბრობთ პოლიტიკაზე?
– თითქმის არა. ჩვენს ცხოვრებაში პოლიტიკამ საკმარისი როლი ითამაშა და ახლა ამაზე სახლში საუბრით თავს ნამდვილად არ ვიწუხებთ.
– როგორია სახლში, შინაურებთან ბატონი ნიკა, როგორი ქმარი და მამაა?
– ძალიან კარგი. მას შეიძლება ყველა სიტუაციაში დაეყრდნო. ნიკა ჩემთვის კარგი მეგობარია. მიყვარს მასთან საუბარი და მისი მოსმენაც. მას ნამდვილად არ აქვს მარტივი ხასიათი, მაგრამ მგონია, რომ ამით უფრო საინტერესოც არის.
რაც შეეხება მამობას, ვფიქრობ, ამაზე უფრო მნიშვნელოვანი მისთვის არაფერია. თუ თავისუფალი დრო რჩება, ცდილობს, ბავშვებთან გაატაროს. არის შემთხვევები, როცა მას ვუტოვებ ბავშვებს და დარწმუნებული ვარ, კარგად მოუვლის, მიუხედავად იმისა, რომ სულ რაღაც საქმე აქვს.
– საზოგადოების თვალში ნიკა გვარამიას ცოლობა თქვენგან რაიმე პასუხისმგებლობას გულისხმობს?
– მას აქვს თავისი სტატუსი და ამას ანგარიშს ვუწევ. რა თქმა უნდა, ისე თავისუფლად არ დავდივარ ყველგან, ჩაცმულობასაც ვაკონტროლებ და საუბარსაც. გარკვეულწილად თავისუფლება შევიზღუდე – მარტო აღარ ვარ და ანგარიშს ვუწევ ადამიანს, რომელიც მიყვარს.
– ანუ გათხოვებამ თქვენს გემოვნებაში, სტილში, ცხოვრების წესში ცვლილება შეიტანა.
– ცხადია, ცხოვრების წესში ცვლილებები არის. გაფართოვდა ჩემი ინტერესების წრე. ბუნებრივია, ნიკას ინტერესები დიდი დოზით შემოვიდა ყოველდღიურობაში.
– ერთმანეთის გემოვნებაში ცოლ–ქმარი კარგად ერკვევით?
– მგონია, რომ ძალიან კარგად. ნიკამ კარგად იცის, რა სუნამო მომწონს, როგორი ფილმების ყურება მიყვარს, რა მახარებს და რა მწყინს. მეც კარგად ვიცნობ. ვიცი, რა მოსწონს და რა სჭირდება. ერთი შეხედვით ვხვდები, როგორ ხასიათზეა.
– რა საკითხებში ვერ ახერხებთ შეთანხმებას და ვინ მიდის ამ დროს პირველი დათმობაზე?
– ხშირად ვკამათობთ სხვადასხვა საკითხზე, მისი სამსახურის გარდა. დათმობაზე ყოველთვის ნიკა მიდის. როგორც ამბობს, მე ჯიუტი ვარ.
– შვილების მიმართ რომელი უფრო იჩენთ სიმკაცრეს?
– ბავშვების მიმართ მე უფრო მკაცრი ვარ. ნიკა ძალიან მკაცრი არ არის, მაგრამ მომთხოვნი მამაა, განსაკუთრებით – სწავლის საკითხებში, მაგრამ ქექეს მაინც ვერაფერს უხერხებს. ის ერთადერთი ადამიანია, რომელსაც უარს ვერ ეუბნება და ვერც უბრაზდება.
– თქვენ როგორი დიასახლისი ხართ, სადილებს ახვედრებთ მეუღლეს?
– იმერელი ვარ და ამბობენ, რომ კარგი მზარეულიც, მაგრამ კერძებს იშვიათად ვამზადებ. ნიკას კი ძალიან უყვარს კულინარიული ექსპერიმენტების ჩატარება, მაგრამ ეს ხშირად არ ხდება. ბევრ რამეს ამზადებს გემრიელად, განსაკუთრებით ფრანგულ და იტალიურ კერძებს. ძალიან მიყვარს მისი მომზადებული სპაგეტი ისპანახის სოუსით. ძალიან გემრიელია.
– ნიკა ინტელექტუალური კლუბის "რა? სად? როდის?" წევრია. ესწრებით გადაცემის ჩაწერას, როცა ის მონაწილეობს?
– თუ ნიკა თამაშობს, სტუდიაში აუცილებლად ვარ და მას ვგულშემატკივრობ. ძალიან საინტერესო და აზარტულია ამ დროს იქ ყოფნა. თამაშის ჩაწერის დროს ნიკას ურჩევნია, მასთან ერთად ვიყო. შემდეგ ტელევიზორში ერთად ვუყურებთ გადაცემას და ტელემაყურებლებივით განვიხილავთ თამაშს.
– რაც შეეხება პროექტ "ნიჭიერს", როგორ აფასებთ ნიკას, როგორც ჟიურის წევრს?
– "ნიჭიერსაც" ერთად ვუყურებთ ხოლმე. როგორც უკვე აღვნიშნე, ნიკას არ მოეწონება, რომ მისი სამსახურის საქმეში ჩავერიო. ამ შემთხვევაში კი, ჩაწერების წინ ჩაცმულობაზე რჩევას ყოველთვის მეკითხება და ჩანაწერის ყურების შემდეგაც ყოველთვის ითხოვს ჩემს შეფასებას. ვფიქრობ, რომ ნიკა ჟიურის საინტერესო წევრია. ამავდროულად ის საზოგადოებამ ახალი კუთხით დაინახა.
საერთოდ მგონია, რომ ნამდვილ ნიკას ხალხი კარგად არ იცნობს და მის მთავარ თვისებებზე წარმოდგენა არ აქვთ. თავიდან, როცა ურთიერთობები დავიწყეთ, ჩემს ბევრ მეგობარსაც შოკი ჰქონდა – ვერ გაიგეს, რა გვაკავშირებდა, რა საერთო გვქონდა მე და ამ პირქუშ კაცს. მოგვიანებით კი, როცა ნიკა გაიცნეს, მეორე შოკი მიიღეს, რადგან სრულიად განსხვავებული ადამიანი აღმოაჩინეს.
– რა არის ნიკას მთავარი თვისებები, რასაც საზოგადოება ვერ ხედავს?
– ძალიან თბილი, მეგობრული და ერთგულია. კარგად მოსმენა იცის და საჭირო დროს საჭირო რჩევის მიცემა შეუძლია. ძალიან სამართლიანია. ფანტასტიკური იუმორის გრძნობა აქვს. არაჩვეულებრივად უკრავს ფორტეპიანოზე და შესანიშნავად უსტვენს.
– "ნიჭიერის" მაყურებელმაც შეამჩნია, რომ ნიკა გვარამიას ჰობი სტვენაა, როცა ერთ–ერთი კონკურსანტის ამ უნარმა იგი აღაფრთოვანა. გულწრფელად რომ გვითხრათ, ხანდახან შემაწუხებელი ხომ არ არის თქვენთვის მისი ეს გატაცება?
– არა, რადგან იშვიათად უსტვენს. თან ბავშვებს ძალიან უხარიათ.
– ჟიურის მკაცრი წევრი სახლშიც ასეთი მომთხოვნი და პრეტენზიულია?
– ვერ ვიტყვი, რომ ნიკა უპრეტენზიოა ან მომთხოვნი არ არის. მას ძალიან უყვარს კომფორტი და სიმშვიდე, რაც ხშირად ვერ ხერხდება ისევე, როგორც ყველგან, სადაც ბავშვები არიან, თუმცა ნიკა უკმაყოფილო ბუზღუნის იქით იშვიათად მიდის. ბედნიერია, როდესაც ყველანი ერთად ვართ.
– საინტერესოა ის ფაქტი, რომ "რუსთავი 2"–ის გენერალური დირექტორის და "ნიჭიერის" ჟიურის წევრის ცოლი კონკურენტ არხზე და კონკურენტ შოუში მუშაობს. "ფირმის" საიდუმლოებების ერთმანეთისგან დამალვას ახერხებთ თუ ვერა?
– "ახალ ხმაში" მუშაობა მანამდე დავიწყე, სანამ ნიკა "რუსთავი 2"–ის დირექტორად დაინიშნებოდა. ამ თემაზე ძალიან ბევრს ვხუმრობთ. წარმატებული კოაბიტაცია გვაქვს ოჯახში. ისევე, როგორც "ნიჭიერს", "ახალ ხმასაც" ერთად ვუყურებთ და დეტალურად განვიხილავთ. ვფიქრობ, რომ ყველა ჩემი ქმედების თუ საქმის საუკეთესო შემფასებელი ჩემი ნიკაა.
– დაბოლოს, თქვენი აზრით, რა არის მთავარი მყარი, სტაბილური და მოყვარული ოჯახის შენარჩუნებისთვის?
– ოჯახის სიმყარისთვის მნიშვნელოვანი ბევრი რამ არის, მათ შორის – სიყვარული, ჯანსაღი ურთიერთობები და საერთო მიზნები. ასევე პირადი სივრცეც – მეგობრები თუ საქმე.
მანანა ნოდია, ჟურნალი სარკე