რამაზ ლაზარიშვილი: "მე და სოფო ნიჟარაძე ამ პროექტის შემდეგ ვერ ვიმეგობრებთ"

რამაზ ლაზარიშვილი სიყვარულმა ააცეკვა ამ სიტყვის პირდაპირი მნიშვნელობით. 3 წლის წინ გადაწყვიტა, შეყვარებულისთვის სიურპრიზი მოეწყო და ტანგოს შესასწავლად სტუდია "თელაში" მივიდა. ნიჭიერი მოსწავლე რამდენიმე კვირაში უკვე კონკურსზე აღმოჩნდა და ასე დაიწყო მისი საცეკვაო კარიერა. მერე იმ შეყვარებულს დაშორდა, მაგრამ ცეკვა მის ცხოვრებაში სამუდამოდ დარჩა. ახლა ტელეპროექტში "ცეკვავენ ვარსკვლავები" მომღერალ სოფო ნიჟარაძის მეწყვილეა.
21 წლის რამაზი შეყვარებულია. მისი რჩეული მოცეკვავე თიკო დარახველიძეა. ისინი მეწყვილეები არიან და კონკურსებშიც ერთად მონაწილეობენ. რამდენიმე ხნის წინ რამაზმა თიკო დედასთან, იტალიაში ჩაიყვანა და სარძლო გააცნო. ახალგაზრდა მოცეკვავეს ბევრი გეგმა აქვს, რაზეც თავად გვიამბო:
– იტალიაში დედასთან ერთად უნდა მეცხოვრა, ჩავედი კიდეც, უნივერსიტეტშიც ჩავაბარე, მაგრამ ვერ გავძელი და საქართველოში დავბრუნდი. ამჟამად საავიაციო უნივერსიტეტის მეოთხე კურსის სტუდენტი ვარ. წესით, უნდა დავფრინავდე, მაგრამ ტელეპროექტში ვარ. იტალიაში ვერ გავძელი, მაგრამ მხოლოდ საქართველოში ყოფნაც არ მიყვარს.
– ცეკვა როდის დაიწყეთ?
– ცეკვა ყოფილი შეყვარებულის გამო დავიწყე 18 წლის ასაკში. მისთვის სიურპრიზის გაკეთება გადავწყვიტე და სტუდია "თელაში" ტანგოს შესასწავლად შევედი. ორ კვირაში კი კონკურსზე გამიშვეს, სადაც 7 წყვილიდან მე–6 ადგილზე გავედი, რამაც კიდევ უფრო შემმატა სტიმული. ეს სიყვარული დიდხანს არ გაგრძელებულა, მაგრამ მოცეკვავე გავხდი.
– თქვენს ცხოვრებაში ქალს სხვა დროსაც უთამაშია მნიშვნელოვანი როლი?
– დედამ ჩემს ცხოვრებაში მნიშვნელოვანი როლი ითამაშა, დღეს თუ რამეს წარმოვადგენ, მისი დამსახურებაა. ამ ადამიანმა მასწავლა შრომის ფასი. ვცდილობ, მის მიმართ თბილი ვიყო. მისი ბედნიერებისთვის ყველაფერს გავაკეთებ. ჩემთან სულ აქვს შენიშვნა და გამუდმებით რჩევებს მაძლევს. როცა მირეკავს, მისგან კომპლიმენტებს არ ველოდები. რა შენიშვნა გაქვს–მეთქი, მაშინვე ამას ვეკითხები. გრამატიკული შეცდომებიდან დაწყებული და ჩაცმით დამთავრებული, ყველაფერში მაკრიტიკებს. ორი და მყავს, ერთი საფრანგეთში ცხოვრობს, ერთი აქ არის გათხოვილი. მე ბებიასთან ვცხოვრობ, მოკლედ, სულ ქალების გარემოცვაში ვარ. ქალის გარეშე არც ეს ცეკვები იარსებებდა. ცეკვა ჩემთვის სხეულის ენაა და მოცეკვავემ აზრიანად უნდა იცეკვოს.
– მართლაც ქალებით ყოფილხართ გარემოცული და ალბათ კარგად იცნობთ ქალის ბუნებას. როგორი დამოკიდებულება გაქვთ მშვენიერი სქესისადმი?
– ვერ ვიტყვი, რომ ქალებთან მიმართებაში რომანტიკული ან ლმობიერი ვარ, შეიძლება ითქვას, რომ მკაცრიც ვარ, თუმცა ალბათ ვისთან როგორ.
– "ცეკვების" წინა სეზონზე თქვენი მეწყვილე მსახიობი ია სუხიტაშვილი იყო. მასთან როგორი ურთიერთობა ააწყვეთ?
– მაშინ შოუში მონაწილეობის გამოცდილება არ მქონდა, ამიტომ იას მიმართ ცოტა მკაცრი და სხვანაირად მომთხოვნი ვიყავი. მერე ვისწავლე ის, რომ ქალთან ყოველთვის არ ჭრის სიმკაცრე და ცუდი ტონით ლაპარაკი. ია პროექტში გავიცანი, საკმაოდ მშრომელი ადამიანია. რადგან ჩემთვის ეს პირველი შოუ იყო, სულ ვნერვიულობდი, რომ კარგად გვეცეკვა. ეს ყველაფერი კი ძალიან მძაბავდა და ვფიქრობდი, რომ იას ბევრი უნდა ევარჯიშა, ისევე, როგორც მე ვვარჯიშობდი.
– ახლანდელ პარტნიორ სოფო ნიჟარაძის მიმართაც ასეთი მომთხოვნი ხართ?
– გადავწყვიტე, სოფოსთან მკაცრი არ ვიყო, ასე ჯობს. მასთან სიმკაცრე არ მჭირდება. ვიცი, როდის რა ან როგორ უნდა ვუთხრა, რა არ გამოსდის და კიდევ, თუ რამე არ გამოუვა, პირში არ უნდა მივახალო. ერთიანად ბევრი რამ რომ ვუთხრა, სტიმულს დაკარგავს.
სოფოს ვარჯიში არასოდეს ეზარება. ფეხზე დიდი ტრავმა მიიღო, მაგრამ, ამის მიუხედავად, თავს არ ზოგავს, გამაყუჩებლებს იკეთებს და მაინც ვარჯიშობს. ქართულის ტურზეც ამ ტრავმით იყო, მაგრამ ძლიერი გამაყუჩებლის დახმარებით მაინც დადგა სცენაზე, ტკივილი არ შეიმჩნია და პროფესიონალივით იცეკვა. სოფო იმდენად შრომისმოყვარეა, იმდენად დიდი პასუხისმგებლობა გააჩნია, რომ ჩემი მითითებები არ სჭირდება. მასთან მუშაობა არ მიჭირს, ყველა მოძრაობას ჩემთან ერთად ითვისებს და ხანდახან ისე სწრაფადაც, რომ სულ ვფიქრობ, არ დამასწროს, თორემ სირცხვილია–მეთქი.
– მიუხედავად ამისა, ალბათ მაინც გექნებათ ერთიმეორესთან შენიშვნები.
– მას თავიდანვე ვუთხარი, რომ ჩემთვის ნებისმიერი შენიშვნის მოცემა შეეძლო. ყველაფერს სოფოს ვუთანხმებ – თმის შეჭრას ან გარეგნობაში სხვა სახის ცვლილებას, რადგან ჩვენ ვართ წყვილი და არა – ცალ–ცალკე ვარსკვლავები. შეიძლება სოფო ასე დეტალურად არ მითანხმებდეს რაღაც–რაღაცეებს, მაგრამ ყველაფერს მაინც ურთიერთშეთანხმების საფუძველზე ვაკეთებთ.
– როგორ ატყობთ, ისე დაახლოვდით, კონკურსის შემდეგ მეგობრები იქნებით?
– სოფოსთან ურთიერთობაში თავიდანვე ზომიერი ვიყავი. ის ძალიან კარგი ადამიანია. ვერ გეტყვით, რომ პროექტის გარეთ ვიმეგობრებთ, რადგან ამისთვის დრო თითქმის არ გვაქვს.
– თქვენს ცხოვრებაში არის საყვარელი გოგონა?
– კი და ის ადამიანი ჩემი მეწყვილეა. უკვე მეორე წელია თიკო დარახველიძე მიყვარს.
– ეს სიყვარული ცეკვამ გაპოვნინათ თუ ჯერ შეგიყვარდათ და წყვილად მერე იქეცით?
– ცეკვის დროს საკმაოდ მობილიზებული ვარ და ქალს სხვა თვალით არ ვუყურებ. თიკოსთან ერთი წელი ისე ვიცეკვე, გრძნობა არ გამჩენია. მერე თიკო სტუდიიდან დროებით წავიდა და მე სხვა მეწყვილე მყავდა. ამ დროს გიგიმ (გაჩეჩილაძე) იაქტიურა და მიბიძგა, თიკო ძალიან კარგი გოგოა, მარტო რას დადიხარო. თან იცით, რა იყო? თიკო ცეკვისას სულ სხვა ტიპაჟი, ზედმეტად ჩუმი იყო. როცა რაღაცაზე ვეკამათებოდი, უბრალოდ ჩუმად იყო და ამაზე ვგიჟდებოდი. არც სწყინდა და არც მეჩხუბებოდა. მე კი საკმაოდ ემოციური ვარ და მისგან ყოველთვის რაღაცას ველოდი. თან გაგონილი მქონდა, რომ მეგობრების გარემოცვაში სულ სხვანაირი იყო, გიჟობდა და ბევრს ლაპარაკობდა. ალბათ ჩემი ყურადღება ამ გარემოებამაც მიიქცია. სულ მაინტერესებდა, ეს ადამიანი ცეკვის მიღმა როგორი იყო, ჩემთვის ის ამოუხსნელ განტოლებად იქცა.
ერთი წლის განმავლობაში ერთმანეთს არ ვნახულობდით, "ფეისბუქზე" თუ ვწერდით, ისიც მოკითხვის მიზნით. ჩემზე გიგის ბიძგმაც იმოქმედა და თიკოს მიმართ იმ ქვეცნობიერმა ინტერესმაც, რაც სულ გამაჩნდა. მერე თიკო სტუდიაში დაბრუნდა. ვხვდებოდი, რომ ჩემ მიმართ ისიც რაღაცას გრძნობდა, მაგრამ მისი ქცევებიდან ეს არ ჩანდა, უბრალოდ მამაკაცური ინტუიციით ვიგრძენი. არ არსებობს, დაკვირვებულ კაცს ქალისგან რამე გამოეპაროს. თიკოსგან რომ რაღაც არ მეგრძნო, მისკენ ამ ნაბიჯს არც გადავდგამდი, ამ საკითხში საკმაოდ თავშეკავებული ვარ. ჩვენი ურთიერთობა საკმაოდ მალე აეწყო და შეყვარებულებიც გავხდით.
– როდის გაიცანით ნამდვილი თიკო?
– სტუდიაში რომ დაბრუნდა, მე სხვა მეწყვილე მყავდა და ის სხვასთან ცეკვავდა. ეჭვიანობა არ მახასიათებს, მაგრამ ძალიან მესაკუთრე ვარ და გავღიზიანდი, ჩემი გოგო სხვასთან რომ ცეკვავდა. მოვითხოვე, თიკოს ისევ ჩემთან ეცეკვა და კვლავ დავწყვილდით. მერე სტუდიის გარეთაც გვქონდა ურთიერთობა და კარგად გავიცანი. სამხატვრო აკადემიაში სწავლობს, ხელოვანია და თან ჩემს ხასიათს საკმაოდ კარგად იცნობს. ის ყველაზე ქალურია ჩემთვის.
– მის ქალურობას რა განსაზღვრავს?
– პირველ რიგში, მანერები და ქცევები, ამასთან ერთად, თავის მოვლასაც და ჩაცმასაც დიდ ყურადღებას ვაქცევ. ეს ყველაფერი კი ერთიანობაში ქმნის ქალურობას. ალბათ ყველა მამაკაცისთვის ასეა. ქალი რომ სულ სპორტულებსა და კედებში იყოს, არ მომეწონება. წვეულებაზე კედებით წასვლა ხომ არ შეიძლება?
– ქალის რა მანერები ან ჩვევები გაღიზიანებთ?
– ყველაფერში ზომიერი უნდა იყოს. არ მომწონს, როცა ქალი ეწევა. მე თვითონ მწეველი ვარ, მაგრამ ქალი რომ ეწევა, სუნი არ მსიამოვნებს. ცოლს მოწევას არ დავუშლი, მაგრამ ალბათ არ მესიამოვნება. თიკო არ ეწევა, ჩემი წინა შეყვარებულები კი ეწეოდნენ... არ მინდა, ყველაფერი ვთქვა, რაც ქალში არ მომწონს.
– მაშინ ის გვითხარით, რა მოგწონთ.
– ბუნებრიობა ყველაზე მეტად მომწონს. ბუნებრივად ქალური ქალი სულ სხვაა. არსებობს გოგონების კატეგორია, რომლებიც ქალურად იქცევიან, ოღონდ არაბუნებრივად. ეს უკვე მიბაძვაა. ქალმა ეკრანიდან შეიძლება რაღაცეები ისწავლოს, მაგრამ საკუთარი თავი არ უნდა დაკარგოს.
– ეს სიყვარული რითი განსხვავდება წინა გრძნობებისგან?
– შედარებები არ მიყვარს. ყველა გრძნობისგან შეიძლება რაღაც ისწავლო. ისე კი, ეს სიყვარული სხვებისგან ნამდვილად განსხვავდება, მაგრამ რითი, ამაზე ლაპარაკი არ მინდა. მე და თიკო იტალიაში კონკურსზე ვიყავით, დედაც გავაცანი და, საბედნიეროდ, მას სარძლო მოეწონა, თორემ ვაიმე!..
– როგორც კონკურსანტს, თიკო როგორ გაფასებთ?
– ერთ–ერთ სკოლაში ერთად ვასწავლით, მაგრამ ერთად გაკვეთილის ჩატარება სულ სხვაა და მასთან შეხვედრა – სხვა, რასაც ხშირად ვეღარ ვახერხებთ. ამის გამო ჩემი პროექტში მონაწილეობა დიდად არ მოსწონს, მაგრამ ხელს მიწყობს.
– თქვენს თაყვანისმცემლებზე ხომ არ ეჭვიანობს?
– თიკო ზომიერად ეჭვიანია. თაყვანისმცემლებს რაც შეეხება, მათ ვერ ვამჩნევ. პოპულარობა მართლა არ მინდა და ამას თავმდაბლობის გამო არ ვამბობ.
სოფიო ბოჭორიძე, ჟურნალი სარკე