ნუკა გვალია დედის გვარზე გადავიდა და კვალიაშვილი გახდა

ახალგაზრდა მომღერალმა ნუკა გვალიამ ცოტა ხნის წინ მნიშვნელოვანი ნაბიჯი გადადგა – დედის, ცნობილ მომღერალ ეკა კვალიაშვილის გვარზე გადავიდა და თავადაც კვალიაშვილი გახდა. გადაწყვეტილება უცბათ და სპონტანურად არ მიუღია. გაიარა გარკვეული ფიქრისა და ლოდინის ეტაპი და საბოლოოდ გააკეთა ის, რაც გააკეთა.
მის ცხოვრებაში კიდევ ერთი, ძალიან მნიშვნელოვანი მოვლენა ახლოვდება – მალე თავად უნდა გახდეს დედა. ის და მისი ქმარი, ნიკუშა კობახიძე, თებერვალში შვილს ელოდებიან. სულ ცოტა ხნის წინ ახალგაზრდა წყვილმა მშობლებისგან ცალკე დაიწყო ცხოვრება. მოსწონთ დამოუკიდებლობა და ბავშვის გაზრდასაც ძიძის გარეშე აპირებენ.
– ნუკა, ქალისთვის ძალიან სასიამოვნო პერიოდი გაქვთ, მალე პირველი შვილი შეგეძინებათ. თუ საიდუმლოდ არ ტოვებთ, რომელ თვეში ხართ და ბავშვის სქესი იცით?
– მეექვსე თვეში ვარ, თებერვალში ველოდებით. ბიჭია. სამ–ოთხ თვემდე ყველას, მათ შორს ექიმებს, გვეგონა, რომ გოგო იყო. მეოთხე თვეზე აღმოვაჩინეთ, რომ ბიჭია. ნიკუშას, ჩემს მეუღლეს, ძალიან უნდოდა ბიჭი და განსაკუთრებულად გაუხარდა.
– სახელი უკვე შეურჩიეთ?
– ეს დიდი პრობლემაა, რადგან ყველამ შევარჩიეთ სახელები და ერთმანეთს ვერ ვუთანხმებთ. არ ვიცით, რა დავარქვათ. ბოლოს მე და ჩემმა ქმარმა გადავწყვიტეთ, რომ დაიბადება, შევხედოთ და ისე დავარქვათ სახელი. დედა ამბობს, გამეორებული სახელები არ შეიძლებაო. მე კი მომწონს ნიკუშა, მაგრამ ალბათ არ დავარქმევთ. ასევე მომწონს ალექსანდრე, ყველანაირი შემოკლების გარეშე, მაგრამ არ მინდა, რომ ლექსო ან ალეკო დაუძახონ, ამიტომ თავს ვიკავებ ამ სახელისგან.
– ბავშვის გარდერობზე ზრუნვა დაიწყეთ?
– ბებიებმა დაიწყეს. ჩვენ ჯერ არაფერი გვიყიდია და ეს კარგიც არის. თავიდანვე ტანსაცმლის ყიდვა რომ დაგვეწყო, ვარდისფერები შეუგროვდებოდა, რადგან გოგო გვეგონა. ნიკუშას დედა კანადაშია და იქიდან უგზავნის ტანსაცმელს. მე ცოტა ხნის წინ საჭმლის კონტეინერი ვუყიდე, დათუნიები ახატია.
– ხომ არ ნერვიულობთ მშობიარობაზე?
– თავიდან ვნერვიულობდი, რადგან ვიდეოებს ვუყურე, ბავშვი როგორ იბადება. ეს არ უნდა გამეკეთებინა, მაგრამ ფსიქოლოგიურად იმ დონეზე გავითავისე, რა როგორ უნდა იყოს, რომ შიში აღარ მაქვს. ვფიქრობ, ყველა ქალმა ფიზიოლოგიურად უნდა გააჩინოს შვილი.
– ფეხმძიმობამ თქვენს ჩვევებსა და განწყობაზე იმოქმედა?
– გართულება სუნზე დამეწყო. სიგარეტი გადავაგდე და მის სუნს ვერ ვეგუები, ამიტომ სახლში აღარავინ ეწევა. მძაფრი სუნები მაღიზიანებს. ჩემდაუნებურად ემოციურიც გავხდი. შეიძლება არ მინდა, მაგრამ ხასიათი სწრაფად მეცვლება. ამასთან დაკავშირებით ბევრი რამ წავიკითხე და აღმოვაჩინე, რომ ორსული ქალების უმეტესობა ასეა.
– ორსულობის მიუხედავად, საკმაოდ აქტიურად ცხოვრობთ. საცხოვრებელი გამოგიცვლიათ და ამას გარკვეული საზრუნავიც მოჰყვებოდა.
– დიახ, ბინა გავყიდეთ და ცალკე გადავედით ნაგირავებში. საკმაოდ რთული იყო გადაბარგება, მით უმეტეს, როცა ეს წვრილმან ნივთებს ეხება. თან მარტომ გავაკეთე ყველაფერი. მეგობრები ბარგის ჩალაგებაში დამეხმარნენ, მაგრამ სახლში თვითონ დავალაგე, რადგან არ იცოდნენ, რა სად უნდა დაედოთ.
ვერ ვიტყვი, რომ აქტიური ცხოვრების წესი მაქვს, რადგან გარეთ ხშირად არ გავდივარ, გაციებას ვერიდები. ორ დღეში ერთხელ შეიძლება მე და ნიკუშამ სუფთა ჰაერზე გავისეირნოთ. სახლში კი ძალიან აქტიური ვარ. თუ რამეა გასაკეთებელი, ვცდილობ, მე გავაკეთო.
– მანამდე მამამთილთან ერთად ცხოვრობდით. ცალკე გადასვლა რატომ გადაწყვიტეთ?
– იმიტომ, რომ ბავშვი უნდა გაჩნდეს და თან დამოუკიდებლად ცხოვრება გვინდოდა, თუმცა მამამთილი ხელს არ გვიშლიდა, ჩვენ ჩვენი ოთახი გვქონდა და იქაც დამოუკიდებლად ვიყავით.
– ნიკუშა რით ანებივრებს ფეხმძიმე ცოლს?
– სულ ტკბილეულის მოტანას ვთხოვ. ძირითადად კანფეტები მოაქვს. საკმაოდ მოვიმატე. რომ დავფეხმძიმდი, 44 კილო ვიყავი და ახლა უკვე 60 კილო ვარ. ძალიან მიყვარს ჭამა. მანამდე არ მეტყობოდა, ახლა უკვე მერგება.
– ალბათ გარდერობის განახლება დაგჭირდათ.
– გარდერობი არ განმიახლებია, რადგან აზრი არ აქვს. მხოლოდ ერთი შარვალი ვიყიდე, ერთი შარვალი ისედაც კარგად მაქვს და მყოფნის. არ ვარ ის ტიპაჟი, შოპინგი დიდად რომ მიზიდავდეს.
– თქვენს საყვარელ მუსიკას თუ ასმენინებთ პატარას?
– ვცდილობ, რომ ეს იშვიათად გავაკეთო, რადგან მძიმე ჟანრს ვუსმენ.
– დამოუკიდებლად აპირებთ მის გაზრდას თუ ძიძას აიყვანთ?
– ძიძა არასოდეს მეყოლება, რადგან არ ვენდობი, ისეთი რაღაცეები მაქვს ნანახი. ძიძა და მომვლელი არ დამჭირდება. ხან დედა დამეხმარება, ხან ნიკუშას დედა. უცხო ადამიანს შვილს არ გავაზრდევინებ.
– "საქართველოს ვარსკვლავში" პირველობისთვის იბრძოდით, როცა ორსულობის შესახებ შეიტყვეთ. როგორი იყო თქვენი პირველი რეაქცია?
– "დიფ ფარფლის" ტურზე გავიგე, რომ ორსულად ვიყავი. ვინერვიულე, რადგან იმ პერიოდში ვეწეოდი და რამდენჯერმე დავლიე კიდეც, მაგრამ ექიმმა დამამშვიდა, ორი კვირის ნაყოფს არაფერი ეხებაო. სიგარეტს მაშინვე დავანებე თავი, მიუხედავად იმისა, რომ ძალიან გამიჭირდა.
– როგორ ჩაიარა პირველმა თვეებმა? ეს ყველაზე რთული პერიოდია ხოლმე ორსულისთვის.
– სამ თვემდე მოწყვეტილი ვიყავი, სულ ძილი მინდოდა. ვსვამდი ბევრ წამალს, რადგან საშიში თვეები მქონდა. კონკურსში მონაწილეობის გაგრძელებას დიდი ძალა უნდოდა, მაგრამ გადავლახე ეს მომენტი, სხვა გზა არც იყო.
– როგორ აფასებთ "საქართველოს ვარსკვლავის" პერიოდს, გენატრებათ საკონკურსო ვნებათაღელვა?
– არა, არ მენატრება. მეგონა, მომენატრებოდა, მაგრამ ასე არ არის. ბევრი კარგი და ახალი წამოვიდა ამ კონკურსიდან, მაგრამ ამავდროულად ბევრი პრობლემაც შემექმნა პირად ცხოვრებაში, სახლში არ ვიყავი მთელი დღეები და ა.შ. ამიტომ არ მენატრება და იმის მერე სულ ვამბობ, რომ არანაირ კარიერას არ დავაყენებ საყვარელ ადამიანებზე წინ.
– ესე იგი შოუბიზნესთან და კარიერასთან დაკავშირებით გეგმები აღარ გაქვთ?
– რა თქმა უნდა, გეგმები მაქვს. ბავშვთან ერთად ექვს თვემდე მომიწევს ყოფნა, მერე უკვე გეგმებს მივხედავ. ალბათ ჩემს სიმღერებს სხვადახვა ქვეყანაში გავაგზავნი, უცხოურ კონკურსებზე გავარკვევ რამეს და ა.შ. საქართველოში კონკურსში მონაწლეობას აღარ მივიღებ.
– საზღვარგარეთ თუ წახვალთ კონკურსზე, მაინც გამოვა, რომ კარიერას ოჯახზე წინ აყენებთ.
– საზღვარგარეთ როცა რაღაცას აკეთებ, გიფასდება. აქ რაც უნდა იწვალო, არ გიფასდება. მარტო ხელოვან ხალხზე არ ვამბობ. ზოგადად უმრავლესობა სახლშია გამოკეტილი და ვერაფერს აკეთებს, რადგან აქ არაფერი ხდება. ჩემი მეუღლე და დედა ყოველთვის გვერდით დამიდგებიან, თუ რამეს მივაღწევ. აქედან თუ წავედი, იციან, რომ იქ მივაღწევ და ამისთვის ბრძოლა ღირს. აქ კი ოჯახის ინტერესების გვერდზე გადადება არ ღირს.
– ამ განწყობაზე იმანაც ხომ არ იმოქმედა, რომ თქვენ მიმართ დადებით კომენტარებთან ერთად, უარყოფითიც იწერებოდა სოციალურ ქსელში?
– ამას მძაფრად არ აღვიქვამდი, რადგან თავიდანვე გავითავისე, რომ ასე იქნებოდა. თვითონ უიტნი ჰიუსტონზეც კი ამბობდნენ, რომ ვერ მღეროდა. ყველას ხომ არ მოვეწონებოდი. ზოგს კი არც უნდა მოვწონდე. იმიტომ არსებობს ჟანრთა სხვადასხვაობა, რომ ყველას თავისი მსმენელი ჰყავდეს, მაგრამ არმოწონება სხვაა და გაბოროტებული, შეურაცხმყოფელი კომენტარები – სხვა. არ მოგწონს, ნუ მოგწონს, რაღატომ ლანძღავ?!
– როგორც გავიგე, მამის გვარიდან დედისაზე გადასულხართ. ასე რატომ მოიქეცით?
– კი, გვარი გამოვიცვალე. 18 წლამდე ვერ ვახერხებდი ამას. ახლა 21 წლის ვარ, ვუცადე, შეიცვლებოდა თუ არა რამე ჩვენს ურთიერთობაში, დაინტერესდებოდა თუ არა მამაჩემი ჩემით. სამწუხაროდ, არაფერი შეცვლილა, მასთან არანაირი ურთიერთობა არ მაქვს. ლოდინითაც დავიღალე და გავხდი კვალიაშვილი. მირჩევნია, ეს ინტერვიუც კვალიაშვილის გვარით დაბეჭდოთ.
მანანა ნოდია, ჟურნალი სარკე