იოანე არაბულის ფანებმა მის შეყვარებულს, ელენე საბიაშვილს, ომი გამოუცხადეს

ახალბედა მომღერალი იოანე არაბული მას შემდეგ, რაც შარშან ტელეკონკურს "ახალი ხმიდან" გაიცნო საზოგადოებამ, გოგონებში ძალიან პოპულარული გახდა, თუმცა მისი გული ახლა მხოლოდ ერთს ეკუთვნის და ის "ერთიც" ასევე "ახალი ხმის" კონკურსანტი, 17 წლის ელენე საბიაშვილია. ის მაია დარსმელიძის გუნდში მოხვდა და ამან დიდი აჟიოტაჟი გამოიწვია. საქმე ის არის, რომ იოანე მაიას და სტეფანეს მეგობარია და ჩათვალეს, რომ ელენე კონკურსში სწორედ მისი დახმარებით, "ჩაწყობით" მოხვდა. ამ ყველაფერზე წყვილს, რა თქმა უნდა, შეკითხვები დავუსვით, ინტერვიუ კი თავიანთი სიყვარულის ისტორიის მოყოლით დაიწყეს.
ელენე: მე და იომ ერთმანეთი თეატრ "ბრავოში", ამერიკული მიუზიკლის კასტინგზე გავიცანით. მანამდე მისთვის თვალიც კი არ მქონდა მოკრული. ორივე აგვიყვანეს და შეყვარებულების როლი მოგვცეს. პრემიერამდე ვერ მოითმინა და თავის გრძნობებში გამომიტყდა. სამი დღის შემდეგ დადებითი პასუხი მივეცი.
იოანე: მიუზიკლის სცენარშიც ასე იყო, ერთმანეთი გვიყვარდა და ვერ ვუტყდებოდით გრძნობებში. ერთმანეთი რომ გავიცანით, ელენე 15 წლის იყო, მე – 20–ის. მისმა გარეგნობამ მაშინვე მიიქცია ჩემი ყურადღება. მერე ელენე ჩემი ბენდის ივენთზე მოვიდა კლუბში. იქ შევთავაზე, ჩემთან ერთად ემღერა და სიამოვნებით დამთანხმდა.
ელენე: ჩვენი სიმღერის დროს კლუბში შუქი ჩაქრა და ძალიან რომანტიკული გარემო შეიქმნა. მანამდე არასდროს ვმღეროდი, გამოდის, რომ იოანემ ამამღერა. მისგან ყურადღებას ყოველთვის ვგრძნობდი, მაგრამ იმავეთი ვერ ვპასუხობდი, რადგან იმ პერიოდში მას შეყვარებული ჰყავდა.
– მათი დაშორების მიზეზი თქვენ ხომ არ გახდით?
ელენე: ალბათ. ერთ–ერთი რეპეტიციიდან გამიყვანა და მითხრა, შეყვარებულს დავშორდიო. იქვე ისიც მოაყოლა, შენ მიყვარხარო.
იოანე: იმ დღის შემდეგ მივხვდი, რომ ელენეს გარეშე ცხოვრება აღარ შემიძლია. ერთადერთი გოგო იყო, რომელსაც არ ვეპრანჭებოდი. თეატრში რეპეტიციის დროს რემონტი მიმდინარეობდა, ფაქტობრივად სულ გაჯში ამოსვრილს მიწევდა ყოფნა. შემეძლო, გამომეცვალა, მაგრამ მინდოდა, ისეთ ფორმაშიც ვენახე ელენეს. შეყვარებულები რომ გავხდით, მას მერე ძალიან შევიცვალე. უკვე 2 წელია ერთად ვართ.
– იოანე, სკოლის მოსწავლესთან ურთიერთობა არ გაგიჭირდათ?
იოანე: ასაკის მიუხედავად, ძალიან ჭკვიანი, საზრიანი, ჩამოყალიბებული გოგო იყო. თუ რამეზე ვჩხუბობდით, ყოველთვის მე ვთმობდი. ჩემს ადგილას სხვა მის ახირებებს ვერ გაუძლებდა. ასაკით პატარა შეყვარებული რომ გყავს, მტყუან–მართლის გარჩევა რთულია, ვერასოდეს მივდიოდით საერთო დასკვნამდე.

ელენე: ჰო, მე ძალიან ცვალებადი ხასიათი მაქვს, იოანემ კი მასწავლა, რომ ყველაზე დიდი ბედნიერება სიმშვიდეშია.
– ელენე, სიმღერა იოანეს რომ არ შემოეთავაზებინა, თქვენ არასოდეს იფიქრებდით გემღერათ?
ელენე: რაც თავი მახსოვს, მსახიობობაზე ვოცნებობ. აბიტურიენტი ვარ და ვფიქრობ, რომ მსახიობობას ავირჩევ. მუსიკალური შვიდწლედიც მაქვს დამთავრებული, მაგრამ სიმღერის მიმართ სერიოზული ინტერესი იოანემ გამიჩინა. ვოკალის პედაგოგი არასდროს მყოლია, არც დიდ სცენაზე გამოსვლის პრაქტიკა გამაჩნია. "ახალი ხმა" პირველი პროექტია, სადაც თავის წარმოჩენა შევძელი. ეს კი იოანეს დამსახურებაა. სხვათა შორის, ვიდრე შეყვარებულები გავხდებოდით, იოანემ გიტარაზე დაკვრაც მასწავლა.
– იოანე, თქვენი გამოცდილებით შეყვარებულსაც ეხმარებით?
იოანე: "ახალმა ხმამ" დიდი გამოცდილება შემძინა, მუსიკალური ხედვა შემიცვალა. არაჩვეულებრივი მწვრთნელების ხელში მოვხვდი. მაო და სტეფანე თავიანთი საქმის პროფესიონალები არიან. მათნაირი მუსიკოსები საქართველოში თითზე ჩამოსათვლელი არიან. სტეფანე მსოფლიო დონის პროდიუსერია. ამერიკული "ვოისის" ჟიურიში რომ დასვა ქრისტინა აგილერას და აშერის გვერდით, არაფერი შეეშლება. მაომ მუსიკალურად გამზარდა. ახლა ვცდილობ, ის ყველაფერი, რაც მათგან ვისწავლე, ელენეს გავუზიარო. მაიასთან და სტეფანესთან მეგობრობაზე მეტი მაკავშირებს.
ელენე: იო სტეფანეს მამას ეძახდა.
– ელენე, კონკურსში მონაწილეობაც იოანემ გირჩიათ?
ელენე: იოანეს უნდოდა, რომ მასთან ერთად პირველ სეზონზე მეც გავსულიყავი, მაგრამ მაშინ ამ კონკურსისთვის მზად არ ვიყავი. მას რომ ვუყურებდი, ძალიან მომწონდა და გადავწყვიტე, მომავალ სეზონში მეც მეცადა ბედი. ყოველთვის მქონდა იმის ამბიცია, რომ პოპულარული გავმხდარიყავი, ამის შანსი მომეცა და გამოვიყენე.
– და ბევრმა ჩათვალა, რომ ჟიურისთან იოანემ "ჩაგიწყოთ". თქვენს გამოჩენას დიდი აჟიოტაჟი მოჰყვა სოციალურ ქსელებში.
ელენე: სოციალურ ქსელში ბევრი წერს ამაზე, მაგრამ ანონიმურად, თავიანთ თავს რატომღაც არ ამჟღავნებენ. ვინც კარგად მიცნობს, იცის, რა პრინციპების ადამიანი ვარ. საკუთარ თავს არასდროს ვაკადრებდი, ჟიურისთან მივსულიყავი და მეთქვა, მე ამ სიმღერას ვმღერი და შემომიტრიალდით–მეთქი.
– იქნებ იოანემ იაქტიურა ამ მხრივ?
ელენე: არა, რას ამბობთ?! ბრმა კასტინგამდე სამი ტური უნდა გაიარო. ბევრს ჰგონია, რომ პირდაპირ ბრმა კასტინგზე მიდიხარ, რეალურად კი მანამდე ერთი თვეა მოსამზადებელი პერიოდი. სტეფანე, მაია და ლელა მომიბრუნდნენ და სამ ადამიანთან ჩაწყობა არარეალურად არ გეჩვენებათ? ბოლო 25 მონაწილეს შორის ვიყავი, დათოს გუნდი შევსებული ჰყავდა... უსამართლობაა, ასეთ რამეს რომ მაბრალებენ!

იოანე: "ფეისბუქზე" ისეთი ამბავი ატყდა, რომ პასუხის გაცემაც კი არ ჩავთვალე საჭიროდ. წერდნენ, ვითომ მე ჩავუწყვე საქმე, არადა პირიქით, სტეფანეს და მაიას ვუთხარი, არ მკითხოთ, ელენე რა სიმღერას იმღერებს–მეთქი. "იმედში" ელენეს რეპეტიციებზე რომ დავყვებოდი, სტეფანესაც და მაიასაც თავს ვარიდებდი, რომ საუბარში რამე არ წამომცდენოდა. შეიძლება ეს ბევრმა არ დაიჯეროს, მაგრამ ჩემი სიმართლე ესაა.
ელენე: პროექტში მომუშავე ადამიანებმა მირჩიეს, ინტერვიუების დროს იოანე არაბული მეხსენებინა, მეთქვა, რომ ჩემი შეყვარებული იყო. ისიც მითხრეს, მისი ფანები შენი თაყვანისმცემლები გახდებიანო. რეალურად კი პირიქით მოხდა, იოს ფანების 60 პროცენტი აგრესიულად განეწყო ჩემ მიმართ. საოცარი რაღაცეები დამიწერეს. თუმცა შავმა პიარმა იმხელა რეიტინგი მომიტანა, რომ ყველაზე მეტი ნახვა ჩემს ვიდეოს აქვს.
– პროექტის დასრულების შემდეგ რა გეგმები გაქვთ, უახლოეს მომავალში შეუღლებას ხომ არ აპირებთ?

იოანე: ამაზე ფიქრი ჯერ ნაადრევია. გვინდა, მომავალი შევიქმნათ და მერე ვიფიქროთ ოჯახზე.
ელენე: 17 წლის ასაკში ოჯახის შექმნა დიდი სისულელე მგონია.
– ერთმანეთის თაყვანისმცემლებზე ხომ არ ეჭვიანობთ?

ელენე: როცა იო "ახალ ხმაში" მონაწილეობდა, არავინ იცოდა, რომ შეყვარებული ჰყავდა. ეს მისი რეიტინგისთვის იყო საჭირო. ჩემთვის არცთუ სასიამოვნო იყო, როცა გოგოები სოციალურ ქსელში წერდნენ, იო ჩემი ბიჭიაო. თუმცა ამ ყველაფერს ჩვენს ურთიერთობაზე ცუდად არ უმოქმედია. ეჭვიანობა თავმოყვარეობას შემილახავს, მე კი ძალიან ამაყი ვარ.
იოანე: ელენე სულ მეუბნება, ეჭვიანი ხარო, არადა რეალურად საეჭვიანო არაფერია, მთავარი ურთიერთნდობაა. ელენეს თაყვანისმცემლებს კი სათანადოდ ვუმკლავდები.
ლანა კიკნაძე, ჟურნალი სარკე