ლევან ახვლედიანს ცოლად კონკურენტი ლელა ბაზალი ჰყავს

29 წლის მოცეკვავე ლევან ახვლედიანი რამდენიმე თვეში მეორე შვილის, ამჯერად გოგონას მამა გახდება. პირველი კი ვაჟი ჰყავს – წლის და 4 თვის ლუკა. ლევანს წლები დასჭირდა, რომ თავის კონკურენტ ლელა ბაზალში ცხოვრების თანამგზავრი ამოეცნო. ისინი შეჯიბრებებზე ხშირად ხვდებოდნენ ერთმანეთს, მაგრამ მათ შორის გრძნობა წლების შემდეგ გაჩნდა. მანამდე ლევანის ცხოვრებაში იყო გატაცებები, მაგრამ სერიოზული – არაფერი. ქალში ინტელექტი ხიბლავს, ასევე – შრომისმოყვარეობა. პროექტში "ცეკვავენ ვარსკვლავები" სამ განსხვავებული ხასიათის ქალთან მოუხდა ცეკვა. კრისტი ყიფშიძე ლევანს თავისი სიურპრიზებით აკვირვებდა, ეკა ნიჟარაძე – შრომისმოყვარეობით, ნანა ნებიერიძე კი პუნქტუალობით აოცებს.
– ლევან, პირველ რიგში, თქვენი ცხოვრების თანამგზავრ ქალზე გვიამბეთ.
– სხვათა შორის, ინტერვიუს ჩაწერის დღე ძალიან ლამაზ თარიღს, ჩვენი შეუღლების 2 წლისთავს დაემთხვა, ოღონდ ეს მე არ მახსოვდა და ჩემმა მეუღლემ, ლელამ შემახსენა. ლელა ბაზალის ცეკვას ბავშვობიდან ვაკვირდებოდი. ორივე სხვადასხვა სტუდიებში ვცეკვავდით. მაშინ მე 20 წლის ვიყავი, ის – 13–ის. იმ დროს მას, როგორც მოცეკვავეს, ისე ვაკვირდებოდი. პატარა იყო, მაგრამ მეწყვილის გამო დიდების კატეგორიაში ცეკვავდა. ერთი პერიოდი ჩემი კონკურენტიც კი იყო, ერთმანეთს შეჯიბრებებზე ვხვდებოდით და მიგებდა კიდეც. დღეს ვეღარ მიგებს. მას მაშინ დავუახლოვდი, როცა მეწყვილე დამჭირდა. მაშინ მე "თელაში" ვვარჯიშობდი, თუმცა ჩემი სტუდიის "არტ დენსის" სახელით გამოვდიოდი, ლელა კი აბიტურიენტი იყო. მისი აცეკვება ძალიან ცუდ დროს მომიწია, მაგრამ მაინც დავიყოლიე.
– როდის შეხედეთ ლელას, როგორც ქალს?
– მაშინ, როცა წყვილში ცეკვა შევთავაზე და შეხვედრა მოგვიწია. მახსოვს, მანქანაში ჩავისვი და სასაუბროდ ერთ–ერთ კაფეში დავსხედით. 3 წლის უნახავი მყავდა და, რომ ვნახე, უკვე ჩამოყალიბებული იყო. მაშინ შევხედე სხვა თვალით. იმ პერიოდიდან ერთად ცეკვაც დავიწყეთ.
– რითი მოგხიბლათ ლელამ?
– მანამდე სულ სხვანაირ გოგონებთან მქონდა ურთიერთობა. ლელა უფრო ლმობიერი ხასიათის, თავდაჯერებული და წყნარია. ბევრს არ ლაპარაკობს, სიტყვაძუნწია. გოგოს ზოგჯერ ენის ტლიკინი კი უხდება, მაგრამ ხშირად გამაღიზიანებელიცაა. ამ მხრივ, ლელა არასოდეს მაღიზიანებს, მან ყოველთვის იცის, რა უნდა თქვას. ალბათ ამ ნიუანსმაც დიდი როლი ითამაშა.
ყველაზე მნიშვნელოვანი ის არის, რომ ლელა ჩემს ცხოვრებაში კარგ პერიოდში გამოჩნდა. 25 წლის ბიჭი ოჯახის შესაქმნელად უკვე მზად ვიყავი. გართობა თითქმის მობეზრებული მქონდა და სერიოზული ურთიერთობა მჭირდებოდა, თუმცა ძალიან რთული აღმოჩნდა ცხოვრების ისეთი თანამგზავრის მოძებნა, როგორიც ჩემ გვერდით წარმომედგინა. ლელა ჩემს ცხოვრებაში ლამაზი ფერებით შემოვიდა. ჩვენი სერიოზული, ოღონდ საქმიანი საუბარი სიყვარულის დღეს, 14 თებერვალს დაემთხვა. ამ ადამიანს, როგორც პიროვნებას, ისე შევხედე და ისეთმა თვისებებმა მომხიბლა, რაც სხვა გოგონებში არ შემხვედრია.
– უკვე გავიგეთ, რომ ბევრი ლაპარაკის მოყვარული გოგონები არ მოგწონთ. კიდევ რა გაღიზიანებთ ქალში?
– უაზროდ თავდაჯერებული გოგოები, რომლებიც რაღაც აზრს ჩააჯინდებიან და გიმტკიცებენ, რომ დაიჯერო. ასეთი ნერვებს მოგიწამლავს და შეიძლება წყობიდან გამოვიდე. მირჩევნია, ასეთ გოგოს გავერიდო, თორემ მართლა არ ვიცი, რას ვიზამ. სიგარეტს არ ვეწევი და რატომღაც არც მწეველი ქალი მომწონს. ლელა არ ეწევა და, მგონი, ამის სურვილი არასოდეს ჰქონია. ეჭვიანობაც მავნე ჩვევად მიმაჩნია, ეს ყველანაირ ურთიერთობას ხელს უშლის. კარგია, ლელა რომ ეჭვიანი არ არის. უამრავ ფოტოს დებენ ინტერნეტში, სადაც შეიძლება ვინმესთან ისეთ პოზაში დამიჭიროს, რომ... იმ დროს იქ არ არის და ხომ შეიძლება რაღაც იფიქროს? შეყვარებული ადამიანი ეჭვიანიც უნდა იყოს, მაგრამ ზომიერების ფარგლებში, მთავარია ურთიერთნდობა, რაც მე და ლელას გვაქვს.
ვაკვირდები და ვხვდები, რომ გოგოებს ვერ გაუგიათ, რა უნდათ. არასრულწლოვნები ქორწინდებიან და მერე ოჯახებს მალევე ანგრევენ. თითქოს ევროპისკენ მივდივართ, მაგრამ გაპარვა და მოტაცება ისევ არსებობს. არ მომწონს, დაუფიქრებელ ნაბიჯებს რომ დგამენ. მინდა, ყველა ახალგაზრდამ იგემოს სტუდენტური და თავისუფალი წლები.
– რაც ცოლ–ქმარი ხართ, თქვენსა და ლელას შორის გაუგებრობა არასოდეს ყოფილა, იდეალურად უგებთ ერთმანეთს?
– თქვენ წარმოიდგინეთ, დღემდე უპრობლემოდ ვცხოვრობთ. ყველა ოჯახში არსებობს რაღაც საკამათო საკითხი, მაგრამ ჩვენ დიდი ჩხუბი არასოდეს მოგვსვლია. ისე კი, ამ გიჟური გრაფიკის გამო, აუტანელი გავხდი. სულ სადღაც მეჩქარება, სადღაც მაგვიანდება, სულ მსაყვედურობენ. ეს ყველაფერი კი ჩემზე ისე მოქმედებს, დღის ბოლოს სახლში ვიმშვიდებ ნერვებს.
– ამ დროსაც ლმობიერია თქვენი ცოლი?
– რომ არა ლელა, შეიძლებოდა, ოჯახი დამნგრეოდა. უკვე მესამე სეზონია პროექტის "ცეკვავენ ვარსკვლავები" მონაწილე ვარ. მიუხედავად იმისა, რომ თვითონაც მოცეკვავეა, ასე ცხოვრება მისთვის მაინც რთულია, მაგრამ ძალიან მიგებს. მესამე სეზონში მინდოდა, მას ეცეკვა, მაგრამ კასტინგის პასუხებმა დააგვიანა და მოთხოვნა ისევ ჩემზე გაკეთდა. მოგვიანებით კი ლელასაც გამოეხმაურნენ და მოითხოვეს, რომ მასაც ეცეკვა. ამასობაში გავიგეთ, რომ პატარა გოგონას ველოდებით. წლის და 4 თვის ლუკა გვყავს, ჩვენი გოგო რამდენიმე თვეში გაჩნდება და ოჯახში გენდერული თანასწორობაც აღდგება.
– ესე იგი გენდერული ბალანსის მომხრე ხართ?
– სიტყვა "გენდერი" კი ვახსენე, მაგრამ არ მიყვარს. მე მაინც მგონია, რომ ოჯახში კაცმა თავის უფლება–მოვალეობები უნდა შეასრულოს, ქალმა – თავისი. ლელა პირველი მშობიარობის შემდეგ ცოტა პასიურობდა, მაგრამ ჩემი ინიციატივით, ახალი ფილიალი მას ჩავაბარე. ჩემს სტუდიაში კი მუშაობს, მაგრამ მინდოდა, საკუთარი თავის რეალიზებაც მოეხდინა. ახლა უკვე მეჯიბრება კიდეც, თავის მოსწავლეებს ჩემებს აჯიბრებს. ეს ძალიან მომწონს. ლელა უკვე ერთი წელია დამოუკიდებლად მუშაობს და ღირსეულ კონკურენციასაც მიწევს.
– ორსულობა ხელს არ უშლის მუშაობაში?
– თქვენ წარმოიდგინეთ – არა. პირველი ორსულობის პერიოდშიც მშობიარობის ბოლო წუთამდე იმუშავა, მგონი, ახლაც ასე აპირებს. ჯერ 4 თვის ორსულია. პირველ ბავშვზე 3 თვის ორსული იყო, როცა პროექტის "ცეკვავენ ვარსკვლავები" პირველი სეზონის კასტინგზე დამეხმარა და ამ სეზონის გახსნაზეც ერთად ვიცეკვეთ. იმ დროისთვის ლელა ორსულობის მეორე თვეში იყო.
– ფეხმძიმე ცოლის ჭირვეულობების შესრულება გიწევთ?
– უნიკალურ სიტუაციაში ვარ! ჯერჯერობით არაფერზე უთქვამს, მინდაო, თუმცა მე ნებისმიერ დროს, თუნდაც შუაღამეს, მზად ვარ, ავდგე და ნებისმიერი სურვილი შევუსრულო. მორიდებული კი არის, მაგრამ, მგონი, ორსულობის პერიოდში ისე უნდებათ რაღაც საჭმელები, ვერ ითმენენ. პირველ ბავშვზეც არაპრეტენზიული იყო. როცა თავისუფალი ვარ, შემიძლია სამზარეულოში შევიდე და განსაკუთრებული რამ მოვამზადო, ძირითადად ხორცეულთან მაქვს ხოლმე საქმე. ლელას ჩემი გაკეთებული კერძები ყოველთვის მოსწონს, უბრალოდ კორექტივები შეაქვს, რასაც აუცილებლად ვითვალისწინებ. თვითონაც კარგი მზარეულია, არაჩვეულებრივ ტოლმას აკეთებს.
– ლელას რამე თუ არ მოსწონს, წყენას როგორ გამოხატავს?
– შეიძლება ბევრი რამ სწყინს, მაგრამ მეორე დღეს აღარ ახსოვს. ზოგმა ქალმა შეიძლება წყენა გულში ისე ჩაიტოვოს, მეორე, მესამე დღესაც გაახსენდეს და ამაზე მთელი კონფლიქტი აეწყოს. მე უფრო ბუტია ვარ, ვიდრე ლელა, თუმცა დიდხანს არ ვებუტები. შეყვარებულობის პერიოდში გავბრაზებულვარ, დიდხანს არ შევხვედრივარ, მომნატრებია და მერე მინახავს.
ჩემთვის პირველ ადგილას ოჯახი დგას. ჩემი სახე ჩემი ოჯახია. თუ ის არ მექნება, არც კარიერა მინდა! ორივემ ვიცით, რომ ეს ყველაფერი დროებითია და ისეთი ცხოვრების რიტმს აუცილებლად დავუბრუნდები, როცა ცოლ–შვილისთვის მეტი დრო მექნება. ლელას ჩემდამი დამოკიდებულებას ძალიან ვაფასებ და ეს კიდევ უფრო მაძლიერებს.
– პროექტის სამ სეზონზე მეწყვილედ სამი სხვადასხვა სფეროდან და სხვადასხვა ხასიათის მქონე ქალით გყავდათ. ვისთან უფრო კომფორტული იყო ცეკვა, ვის უკეთ ეწყობოდით?
– სამივე სეზონზე სრულიად სხვადასხვანაირ ქალთან მომიწია ცეკვა. ჯერ კრისტი ყიფშიძესთან, შემდეგ ეკა ნიჟარაძესთან ერთად ვცეკვავდი. ახლა კი ნანა ნებიერიძის მეწყვილე ვარ. სამივე აბსოლუტურად სხვადასხვა ადამიანია. ვერ ვიტყვი, რომ ერთმანეთს რამით მაინც ჰგვანან, მაგრამ სამივეში ძალიან გამიმართლა. კრისტი სიურპრიზების დიდი მოყვარული იყო. რეპეტიციებზე შემაშინებდა, მანერვიულებდა, ეს არ გამოგვივაო და სცენაზე ისეთ რაღაცას გააკეთებდა, საერთოდ რომ არ ველოდი და ყბაჩამოვარდნილი ვრჩებოდი. კრისტი სცენას კარგად ფლობდა, თუმცა რეპეტიციებზე დიდად ვერ მხიბლავდა.
ეკა ნიჟარაძეს უდიდესი პასუხისმგებლობის გრძნობა ჰქონდა, ყველაფრის ახსნა, დაკონკრეტება სჭირდებოდა და ზედმიწევნით უყვარდა სწავლა. ვფიქრობ, ასეთმა მიდგომამ და შრომისმოყვარეობამ მიგვაღწევინა იმას, რომ სამეულში მოვხვდით.
ნანას ცეკვის დიდი ნიჭი აღმოაჩნდა. უცაბედად ძალიან კარგი ნაბიჯები გადადგა, მაგრამ უფრო მეტი განვითარებისთვის ბევრი შრომა გვჭირდება. ნანა ძალიან დამჯერია. ის ჩემზე პუნქტუალური აღმოჩნდა. მუშაობს იმაზე მეტს, ვიდრე შეუძლია. ვფიქრობ, რომ ბევრს მიაღწევს. როგორც აღმოჩნდა, ის არამარტო წყალში, სცენაზეც არაჩვეულებრივად გამოიყურება. საერთო ჯამში, ეს პროექტი ვარსკვლავებისაა, მე კი მაქსიმალურად ვცდილობ, მათ ხელი შევუწყო, დავაწყნარო და დავამშვიდო. ამის გამო კი ოჯახისთვის ნერვები ნაკლებად მრჩება და ლელას ვჩაგრავ.
– მეწყვილეები ერთმანეთს უთანხმებთ, როგორ კოსტიუმებს ჩაიცვამთ, რა აჯობებს იმ კონკრეტული ნომრისთვის?
– სხვათა შორის, ამით ძალიან კმაყოფილი ვარ. ამ საკითხში ნანა უჩემოდ ნაბიჯს არ დგამს. სულ მითანხმდება, ასეთი ფორმის ჩაცმას ვაპირებ და შენ რას ფიქრობო. ჩემი რჩევითაც ჩაუცვამს და მაყურებელს მოსწონებია კიდეც.
სოფიო ბოჭორიძე, ჟურნალი სარკე