ქრისტინე იმედაძე: "უიღბლო ქორწინებამ შიში და კომპლექსი გამიჩინა"

მომღერალმა ქრისტინე იმედაძემ პირველად ოჯახი 24 წლის ასაკში შექმნა. მისი და ფეხბურთელ ლაშა ჯაკობიას ქორწინებამ წელიწადნახევარს გასტანა და ამ კავშირმა წყვილს საერთო გოგონა ტაისია დაუტოვა, რომელიც უკვე სკოლის მოსწავლეა. ცალად დარჩენილმა ქრისტინემ ერთი პერიოდი მომღერლის კარიერის აწყობა უკრაინაში სცადა, მაგრამ 9 თვის შემდეგ საქართველოში დაბრუნდა და სცენიდან ტელესტუდიაში გადაინაცვლა, "რუსთავი 2"–ის გადაცემა "შუადღის" ერთ–ერთი წამყვანია. პირად გამოცდილებასა და გეგმებზე მომღერალმა "სარკეს" საკმაოდ გულახდილი ინტერვიუ მისცა.
– ქრისტინე, უკრაინასთან დაკავშირებულმა გეგმებმა არ გაამართლა?
– კიევში 9 თვე ვიყავი. იქ წასვლას 2 წელი ვგეგმავდი, უკრაინაში ბევრი ჩემი მეგობარი ცხოვრობს. საბოლოო გადაწყვეტილება მას შემდეგ მივიღე, რაც ტელევიზიით ციხის სკანდალური კადრები ვნახე. მაშინვე ვიყიდე ბილეთი და გავემგზავრე. 2 კვირით ვგეგმავდი იქ დარჩენას, მაგრამ იმდენად საინტერესო შემოთავაზებები მივიღე, რომ დარჩენა გადავწყვიტე. სიმართლე გითხრათ, რაც წამოვიწყე, ყველაფერი შუა გზაში მივატოვე. ბებიაჩემი ძალიან ცუდად გახდა და გარდაიცვალა, ამის გამო დავბრუნდი საქართველოში. მას მერე აღარც მიფიქრია იქ წასვლაზე. ოჯახი მომენატრა და მათთან ყოფნა ვარჩიე. ჩემი შვილი სკოლაში მივიდა და მინდოდა, მნიშვნელოვან წუთებში მის გვერდით ვყოფილიყავი.
– მოდით, თქვენს ცხოვრებას გადავავლოთ თვალი და მნიშვნელოვანი ეტაპები გამოვყოთ.
– მნიშვნელოვანი ეტაპი ჩემს ცხოვრებაში იმ დღიდან დაიწყო, როცა დედა გავხდი. მას შემდეგ დასრულდა ჩემი სილაღე და გაჩნდა უამრავი პასუხისმგებლობა. საკუთარ თავს მოდუნების უფლებას ერთი წუთითაც არ ვაძლევ. რაც უნდა დაღლილი ვიყო, შვილთან ურთიერთობა ყოველთვის მსიამოვნებს. დედობაზე დიდი საჩუქარი არ არსებობს. 29 წლის ვარ და ვთვლი, რომ ახლა უკვე დიდი გოგო ვარ.
– ასაკის მატებასთან ერთად რაიმე შეიცვალა თქვენს პიროვნებაში?
– ადვილად ვცივდები და დიდი ხანი მჭირდება გამოსაჯანმრთელებლად. იმუნიტეტი დამიქვეითდა. გართობა მეზარება, ვერ ვიტან ხალხმრავლობას. ადრე ძალიან აქტიური ვიყავი, შემეძლო, დილის 6 საათამდე კლუბში ვყოფილიყავი, შინ დავბრუნდებოდი, თავს მოვიწესრიგებდი და ლექციაზე მივდიოდი. ახლახან, სამთვიანი პაუზის შემდეგ, ნინი ბადურაშვილის კონცერტზე მივედი და მივხვდი, რომ გართობა ჯერ კიდევ შემიძლია. გამიხარდა. ფაქტია, რომ 25 წლიდან ქალის ორგანიზმი უკუსვლას იწყებს.

– უკვე დაიწყეთ თავის სერიოზული მიხედვა, პლასტიკური ოპერაციები და ასე შემდეგ?
– მხოლოდ კბილის ექიმთან დავდივარ. ფილტვების გასასინჯადაც ვსტუმრობ ხოლმე ექიმებს. რაც შეეხება ქირურგიულ ჩარევას, მხოლოდ ბრმანაწლავისა და გლანდების ოპერაციები მაქვს გაკეთებული. ვცდილობ, ჯანსაღი ცხოვრების წესი დავიცვა – ვვარჯიშობ, სწორად ვიკვებები. რაც შეეხება თავის მოვლას, ბებიების რეცეპტებით შემოვიფარგლები – კვერცხის გული, თაფლი, კიტრის ნათალი, შვრიის ფაფას სამ კოვზს ვჭამ და სამ კოვზს სახეზე ვისვამ, ეს არის და ეს. ძვირადღირებულ კოსმეტიკას ნაკლებად ვიყენებ.
– ამბობენ, რომ ფეხის წვივები დაიწვრილეთ. მართალია?
– არა! როგორც გინდათ, შემამოწმეთ! ეს ყველაფერი ჩემმა ერთმა ნაცნობმა თქვა, რაზეც გამეცინა. წვივის ძვალს რომ ხერხავენ, რეაბილიტაციისთვის 8 თვე ლოგინში წვანან, რასაც არასდროს გავაკეთებ. რატომ, ცუდი ფეხები, წვივები მაქვს?!
– პირიქით, შესანიშნავი.
– ჰოდა, მაშინ რა გინდათ?! ვერ გადმოგცემთ, ოპერაციების ისე მეშინია. რაც მჭირდება, იმას ვერ ვიკეთებ და... მომწონს ასაკისთვის შესაფერისი ნაოჭები. კარგია, რომ ღმერთმა არ გამიმეტა და სახეზე რაღაც უბედურება არ მჭირს. არ ვთვლი, რომ ისეთი სავალალო მდგომარეობა მაქვს, პლასტიკური ოპერაციები ვიკეთო. ყველა ერთანაირად ლამაზად ხომ არ ბერდება? ვნახოთ, მომავალში რა იქნება, მაგრამ ერთი კი ვიცი, რომ დანის ქვეშ არასოდეს დავწვები, ბოტოქსს კი არ გამოვრიცხავ. რაც ჩემზე ჭორები გავრცელებულა, 100–დან 99 პროცენტი ტყუილია.
– უკვე რამდენიმე წელია მარტო ხართ. ოჯახის ხელმეორედ შექმნაზე არ ფიქრობთ?
– არცთუ პატარამ, 24 წლის ასაკში შევქმენი ოჯახი, მაგრამ... როცა ოჯახი გენგრევა, ხელმეორედ ქორწინება რთული საკითხია. შიში და კომპლექსი ჩნდება. ზოგი ძალიან მარტივად ქორწინდება მეორედ, მესამედ და მეოთხედ. ჩემთვის კი ეს ერთ–ერთი უმნიშვნელოვანესი საკითხია. მეორედ ამ ნაბიჯს ერთი ხელისმოსმით აღარ გადავდგამ. როცა გათხოვებაზე ვიფიქრებ, მაქსიმალური გარანტია უნდა მქონდეს, რომ ჩემი ოჯახი იქნება მყარი და სამუდამო.
– არც შეყვარებული ხართ?
– არა.
– ამბავი გავრცელდა, რომ თაყვანისმცემელმა ვარდები და მოოქროვილი ტელეფონი, აიფონი გაჩუქათ. ასეთ საჩუქრებს ხშირად იღებთ?

– არიან ერთეულები, ვისაც პირად ცხოვრებაში უმართლებთ, მაგრამ მე მათ რიცხვში არ ვარ – არ მიმართლებს. ამიტომ საქმესა და შვილზე ვარ ორიენტირებული. რაც შეეხება თქვენს კითხვას, ნამდვილად არ ვიცი, ეს საჩუქარი ვინ გამომიგზავნა და არც არავისზე მაქვს ეჭვი. ვარდები დაჭკნა, აიფონს ვიყენებ.
– როგორ ფიქრობთ, რატომ არ ამხელს თავის ვინაობას?
– არ ვიცი, არადა ძალიან მაინტერესებს, ვინ არის. თავიდან მეგონა, რომ მეგობრები მეხუმრებოდნენ, რადგან, სანამ ეს ამბავი მოხდებოდა, წინა დღით მათთან ვამბობდი, ადრე თაყვანისმცემლები საჩუქრებით, თაიგულებით მანებივრებდნენ, ამ ბოლო დროს კი არავინ არაფერს მჩუქნის–მეთქი. მეორე დღეს კი ეს საჩუქარი მომიტანეს და დიდ ეჭვებში ვიყავი. ველოდები ამ საჩუქრის ავტორს, გაამხილოს ვინაობა!
– თქვენი ყოფილი ქმარი როგორი მამაა ტაისიასთვის?
– ტაისია მამას ძალიან ჰგავს და მასთან არაჩვეულებრივი ურთიერთობა აქვს, უქმეებს ბებიასთან და მამასთან ატარებს. ძალიან დამჯერი, მოწესრიგებული ბავშვია. ამ მხრივ, ძალიან გამიმართლა. მის გაზრდაში დედა მეხმარება. ტაისია დადის ძერწვაზე, ტანვარჯიშზე, ცურვაზე, მუსიკაზე, ხალხურ სიმღერაზე, ეუფლება ფანდურზე დაკვრას. მე და ჩემს მეგობრებს ერთი სული გვაქვს, ტაისია როდის მოგვიწყობს ფანდურის საღამოს. ფაქტობრივად მასთან საურთიერთოდ ცოტა დრო მრჩება, რადგან ოჯახში მხოლოდ მე ვმუშაობ და ვცდილობ, მათ არაფერი მოვაკლო.
– 29 წლის ასაკში ოჯახის რჩენა ალბათ არ არის ადვილი.
– მე ამას 15 წლიდან ვახერხებ, ასე რომ, ასაკი ამ შემთხვევაში ხაზგასასმელი არ არის. თვითონაც არ ვიცი, ამ ყველაფერს თავს როგორ ვაბამ. ადრე თუ რაღაც კონცერტებზე შემეძლო უარის თქმა დაზარების გამო, ახლა ამას აღარ ვაკეთებ, რადგან მარტო ჩემი თავი აღარ მაბარია. ვიცი, დილას ადრე უნდა ავდგე და ყველა საქმე გავაკეთო ჩემი შვილის გამო. თავიდან ბოლომდე მომართული ვარ, რომ შვილს უკეთესი ხვალინდელი დღე ჰქონდეს. მინდა, არ მინდა და დაზარება, აღარ არსებობს ჩემთვის.
– ქეთა თოფურიას ქორწილში მთელი რუსული ბომონდი ნახეთ. რა შთაბეჭდილებებით დაბრუნდით იქიდან?
– ქეთას არაჩვეულებრივი ქორწილი ჰქონდა, ულამაზესი პატარძალი იყო. ისე გავერთე, რომ არც სტუმრები მახსოვდა და არც არავინ. ყველაზე მეტად მე და ქეთა გავერთეთ ქორწილში. მთელი ცხოვრება გაიძახოდა, რომ ქორწილი არ უნდოდა, მაგრამ ძალით გადაახდევინეს. ბოლოს მე და ქეთა ფეხშიშველები დავრბოდით. დაიანა კინგი გვეკითხებოდა, რომელი სიმღერა გინდათ, რომ ვიმღეროო.
– სააკაშვილის ხელისუფლების ფავორიტთა რიცხვში მოიაზრებოდით, კონცერტებში აქტიურად მონაწილეობდით. ახლა რა ხდება თქვენს შემოქმედებაში?
– მე შევარდნაძის ხელისუფლების დროს უფრო აქტიური ვიყავი. ჩემთვის დრო მთავრობის ცვლილების მიხედვით არ იყოფა, აპოლიტიკური ადამიანი ვარ. მყავს ბევრი მეგობარი, ვიღაც მთავრობის წარმომადგენლის ცოლია, ვიღაც დაა, ვიღაც შვილია, მაგრამ ჩემთვის მათი სტატუსები უმნიშვნელოა, მთავარია ურთიერთობები. რაც შეეხება ახლანდელ რეალობას, ქვეყანა დალაგების პროცესშია და შოუბიზნესისთვის არავის სცალია. ჩვენ, მომღერლებმა, ჩვენი საქმე უნდა ვაკეთოთ. მაქვს რამდენიმე ახალი სიმღერა, რაც ჯერ საზოგადოებამ არ იცის, მათ შორისაა რამდენიმე რუსულენოვანიც. იმედია, მათ მალე მოისმენს მსმენელი.
– თქვენს ახალ სიმღერას "კეკელა და მარო" "იუთუბიზე" ბევრი ნახვა აქვს, რადიოჩარტებშიც ლიდერობს. ეს სიმღერა რატომ ჩაწერეთ, კრიტიკის არ შეგეშინდათ?
– დათუნა კენჭიაშვილს აქვს თავისი სტუდია და ხუმრობა–ხუმრობაში ჩავწერეთ ეს დუეტი. ჩვენი მიზანი არ იყო ამ სიმღერით სცენაზე გამოჩენა, უბრალოდ ასე მოხდა. ამ სიმღერის გამო რომც გამლანძღონ, არ მეწყინება.
ლანა კიკნაძე, ჟურნალი სარკე