ეკა ჯამაგიძე: სინდისი სუფთა მაქვს და დანარჩენი არ მაინტერესებს.

''ჩემი ცოლის დაქალების'' მსახიობი ეკა ჯამაგიძე წელს პირველად ხვდება ახალ წელს საკუთარ ბინაში, ამ დღესასწაულთან დაკავშირებული ყველანაირი სამზადისი უკვე დასრულებული აქვს და როგორც თავად ამბობს, ფასდაკლებებზე საშოპინგოდ ფულიც აღარ რჩება ხოლმე. როგორც მსახიობმა ჩვენთან საუბრისას აღნიშნა, ფულის შეგროვება არ შეუძლია, როცა აქვს, ხარჯავს.

- ფილმში ''ჩემი ცოლის დაქალი კინოში'' , შენც ხარ დაკავებული?
- არა, რადგან ფილმში მირიან ბარათეონი იღებს ფილმს, რომელშიც მთავარი გმირი იქნება კატო, აქედან გამომდინარე ჩვენ, ოფისის გოგონები, ამ ფილმში არ ვართ დაკავებული.
- გული არ დაგწყდათ?
- რა თქმა უნდა, ჩვენც რომ მოვხვედრილიყავით ამ ფილმში, კარგი იქნებოდა, მაგრამ...
- სერიალში რჩებით?
- კი, ჯერჯერობით არანაირი ცვლილება არ იგეგმება, მაგრამ ამ ბოლო დროს სცენარი ისე ვითარდება, რომ ძველებური სიხშირით აღარ გვეძახიან გადაღებებზე, უკვე კარგა ხანია, სამუშაოდ არ ვყოფილვარ.
- ეკა, ახალი წელი მოდის, უკვე დაიწყე მომზადება ამ დღესასწაულისთვის?
- საერთოდ, დღესასწაულებიდან ყველაზე მეტად ახალი წელი და აღდგომა მიყვარს, ბოლო 5 წელია, ახალ წელს საქართველოში არ შევხვედრივარ, მოსკოვში ვიყავი ხოლმე, წელს კი თბილისში ვრჩები და ვემზადები ამ ღამისთვის, თან ეს პირველი ახალი წელი იქნება ჩემს სახლში და განსაკუთრებულად ველი, ნაძვის ხე ჯერ არ ამიწყვია, ბარბარობას დავდგამ.
- როგორც წესი, საახალწლო სამზადისი საკმაოდ დიდ ფინანსებს უკავშირდება, ამასთანავე გვთავაზობენ ფასდაკლებებსაც, თუ იყენებ ხოლმე ამ შანსს?
- არა, რადგან სანამ ფასდაკლებები დაიწყება, მანამდე ვყიდულობ ხოლმე საჭირო ნივთებს და მერე თანხა აღარ მრჩება. მაღაზიაში რომ შევალ და კაბა მომეწონება, ფასდაკლებას ვერ დაველოდები. მირჩევნია, ადრე მოვემზადო და წინასწარ მქონდეს გათვლილი ყველაფერი, ვიდრე ბოლო დღეებში დავიწყო სირბილი.
- უკვე იზრუნე სამოსზე?
- რა თქმა უნდა, ასეთ საკითხებზე ზრუნვას საკმაოდ ადრე ვიწყებ. მაქვს ამოჩემებული ბუტიკები, მაღაზიები, რომელთა მუდმივი მომხმარებელი ვარ, უკვე წლებია, მათთან ვყიდულობ სამოსს, ნაცნობობა მაკავშირებს, საჭიროების შემთხვევაში ''ნისიადაც'' მატანენ სამოსს და ა.შ. როცა ადამიანს წლებია იცნობ, გიჩნდება ნდობა და ასეთი საკითხები პრობლემას აღარ წარმოადგენს.
- შენს გოგონასთან ერთად ცხოვრობ, ალბათ, ქალურ დეტალებზე საუბრობთ ხოლმე, განიხილავთ თუნდაც შოპინგის საკითხს.
- კი, ასეა. დაქალის დაბადების დღეზეა წასასვლელი და მელოდება, როდის გავყვები სამოსის საყიდლად, მეუბნება, თუ არ გამომყვები, საერთოდ არ წავალო, ენდობა ჩემს გემოვნებას, სჯერა ჩემი და უნდა, რომ სამოსი მე შევარჩევინო.
- ახალი წლის ღამისთვის ტკბილეულისა და კერძების მომზადებას თუ აპირებ სახლში?
- კი, რა თქმა უნდა, ტკბილეულს, გოზინაყს მოვამზადებ, ასევე საცივსაც, სადილებზე გადაყოლას არ ვაპირებ, მე და ჩემი შვილი ვიქნებით მარტო სახლში და დიდად თავს არ შევიწუხებ, მით უმეტეს, რომ ოცკაციანი სუფრის გაშლა საერთოდ არ შედის ჩემს გეგმებში.
- ეკა, ახლა რუბრიკის თემაზე გადავიდეთ და მინდა გაიხსენო შენი პირველი ჰონორარი.
- პირველი ჰონორარი ავიღე ''ყავა და ლუდში'' მონაწილეობისას, მართლა კარგი შეგრძნება იყო. საკუთარი შრომით აღებული 100 ლარი ჯობია სხვის მოცემულს.
- საერთოდ, ფულის შეგროვება თუ გახასიათებს?
- არა, არანაირად. თუ ფული მაქვს, უნდა დავხარჯო. შეგროვება რომ შემეძლოს, ხომ სეილებზე ვიყიდდი ყველაფერს (იღიმის)?!
- გარდა სამსახიობო კარიერისა, სხვა მხრივ თუ გაქვს სამუშაო გამოცდილება?
- კი, ერთ-ერთ კომპანიაში მუსიკალური ხელმძღვანელის თანაშემწედ ვმუშაობდი, ''ცეკვავენ ვარსკვლავების'' პირველ სეზონზე ხდებოდა ეს, მაშინ მუსიკალური ხელმძღვანელი რუსა მორჩილაძე იყო.
- ეკა, საქმის შემოთავაზების შემთხვევაში ანაზღაურებას რა მნიშვნელობას ანიჭებ?
- მეგობარსა და ახლობელთან ერთჯერადად სამუშაოდ ანაზღაურების გარეშეც წავსულვარ და წავალ კიდეც, მაგრამ სერიალი უკვე სხვა საქმეა.
- ხშირად მსმენია მსახიობებისგან, რომ ამ პროფესიით თავის რჩენა ძალიან ძნელია, შენც ასე ფიქრობ?
- ჩემი გამოცდილებით გეტყვით, რომ ამ პროფესიით თავის რჩენა შეუძლებელია. არ ვიცი, ვის რა მოთხოვნილებები აქვს ცხოვრებაში, ვიღაც კმაყოფილდება იმით, რაც აქვს, ვიღაცას უფრო მეტი უნდა, მაგრამ რომ გითხრა, მე რამდენს ვიღებ სერიალიდან, შეიძლება გაგეცინოს... 100 და 200 ლარით თავის რჩენა წარმოუდგენელია. საქართველოში ეს პროფესია არ ფასდება და ეს ყველამ იცის.
- ეკა, ფინანსურად დამოუკიდებელი რა ასაკიდან გახდი?
- მე ახლაც არ ვარ ფინანსურად დამოუკიდებელი, ჩემზე ოჯახი ზრუნავს. როგორ შეიძლება, ჩემი 100 ლარით, რომელიც სერიალიდან მაქვს ასაღები, გადავიხადო კომუნალური გადასახადები და ვარჩინო ოჯახი? წარმოუდგენელია, ამით ფინანსურად დამოუკიდებელი იყო. პენსიონერებს აქვთ 150 ლარი და ისინი ვერ ინახავენ თავს და მე როგორ უნდა შევინახო (იცინის) ?
- არ გიფიქრია, დამატებითი შემოსავლის წყარო გაგეჩინა?
- კი, როგორ არა, მაგრამ ნორმალური ვერაფერი ვნახე, კიდევ 200 და 300 ლარზე ვერ წავალ, ან რად მინდა? გზაში დამეხარჯება ეგ ფულიც.
- როდესაც ფინანსური კრიზისული პერიოდი გაქვს, ვის მიმართავ?
- ხმამაღალ ნათქვამად არ ჩამითვალოთ, მაგრამ ფინანსურად კრიზისული პერიოდი, მადლობა ღმერთს, არასდროს მქონია, შესაბამისად, არასდროს ამიღია კრედიტი, განვადება, თუ რამე მინდა, მივდივარ და ვყიდულობ.
- აზარტული თუ ხარ, თუ თამაშობ ხოლმე ლატარიას?
- ყოველთვის მინდა, რაღაც მოვიგო, მაგრამ არასდროს ვთამაშობ, ამიტომ ისიც არ ვიცი, აზარტული ვარ თუ არა. სატელეფონო გათამაშებებში კი ვმონაწილეობ ხოლმე, მაგრამ არაფერი მომიგია, სხვათა შორის, არც არასდროს დამიკარგავს იმდენი ფული, რომ დღემდე მახსოვდეს. ფულის რა გითხრათ, მაგრამ ოქრო კი ბევრჯერ დამიკარგავს, სამაჯურები ხელიდან ისე მძვრებოდა, რომ ვერ ვიგებდი, შედეგად 5-6 მაინც მექნება დაკარგული. სხვათა შორის, ერთხელ ოქროს სამაჯური ვიპოვე, ვარჯიშზე დავდიოდი, გასახდელში სამკაული აღმოვაჩინე და ადმინისტრატორს მივეცი. მერე კი ვიფიქრე, რა იცის იმ ადმინისტრატორმა, ვისია ეს სამაჯური, ან საერთოდ გამოაჩენს და იტყვის, რომ მივეცი-მეთქი, მაგრამ მე ხომ ჩემი გავაკეთე, სინდისი სუფთა მაქვს და დანარჩენი არ მაინტერესებს.
- ეკა, რა კრიტერიუმებით არჩევ საფულეს?
- საფულეები მიყვარს და აქტიურად ვიყენებ, შეიძლება, ჩანთის წაღება დამეზაროს, მაგრამ ავიღო საფულე და გავიდე. მიუხედავად ამისა, ხშირად არ ვიცვლი, სანამ ბოლომდე არ მიფუჭდება, მანამდე შეცვლაზე ფიქრს არ ვიწყებ.

ციცი ომანიძე
ჟურნალი ''რეიტინგი''