ექიმებმა ამ ფაქტს სასწაული უწოდეს

უნგრეთში წარმოუდგენელი ფაქტი დაფიქსირდა. 31 წლის ქალს, რომელიც 15 კვირის ფეხმძიმე იყო, კლინიკური სიკვდილი დაუდგინეს, მაგრამ მომდევნო 12 კვირის განმავლობაში აპარატზე მიერთებული დატოვეს.

ექიმები ცდილობდნენ, ფეხმძიმობა რაც შეიძლება დიდხანს გაგრძელებულიყო, მაგრამ დედის ასეთ მდგომარეობაში ყოფნა ნაყოფისთვის სულ უფრო სახიფათო ხდებოდა, ამიტომ ფეხმძიმობის 27–ე კვირაზე ქალს საკეისრო კვეთა ჩაუტარდა და ქვეყანას პატარა მოევლინა, რომელიც სულ რაღაც 500 გრამს იწონიდა. ბავშვის გაჩენის შემდეგ ქალი აპარატიდან გამორთეს.

ბავშვი დღემდე ინკუბატორშია და მისი ჯანმრთელობის მდგომარეობა დამაკმაყოფილებელია. ექიმები ამ ფაქტს ნამდვილ სასწაულს უწოდებენ.