"საკუთარ თავს ვადანაშაულებ, თამაშის წინ ნაკრებიდან არ უნდა წამოვსულიყავი"

საქართველოს ნაკრების მთავარ მწვრთვნელს, თემურ ქეცბაიას, ფეხბურთელთა "ძველი გვარდია" აუჯანყდა. ის, რომ ნაკრებში ფეხბურთელებსა და მწვრთნელს შორის დაძაბულობა არსებობდა, ყოველთვის იგრძნობოდა. ქეცბაიასთან უთანხმოების გამო რამდენიმე თვის წინ ნაკრები კაპიტანმა ზურა ხიზანიშვილმა დატოვა, მოგვიანებით იგივე გააკეთეს გოგიტა გოგუამ და ლევან ყენიამ. სულ ცოტა ხნის წინ ნაკრებიდან 31 წლის ფეხბურთელი ალექსანდრე ამისულაშვილიც წავიდა, მიზეზად კი ქეცბაიას მძიმე ხასიათი და ფეხბურთელებთან არაჯანსაღი დამოკიდებულება სახელდება.
ამ ნაბიჯის შემდეგ საფეხბურთო სკანდალი უფრო მასშტაბური გახდა. ზურა ხიზანიშვილმა დუმილი დაარღვია და კატეგორიულად მოითხოვა, რომ ქეცბაიამ ნაკრები დატოვოს. ერთმანეთის მიმართ პრეტენზიები ორივე მხარეს აქვს, ქეცბაიას არ მოსწონს ხიზანიშვილის სპორტული ფორმა, თამაშის სტილი და დისციპლინა, ხიზანიშვილი კი ყოფილ მწვრთნელს შეურაცხყოფისთვის პასუხს სთხოვს.