ვის სიყვარულს ვერ იყოფს გოგა ბარბაქაძე შვილთან

ტელეკომპანია ''ჯდს''-ზე დაიწყო ახალი მისტიკური კომედია ''პანიკის გარეშე'', სადაც საიქიოდან ამქვეყნად მობრუნებულ ბაბუას გოგა ბარბაქაძე თამაშობს. როგორც მსახიობმა გვითხრა, ამჟამად შემოქმედებითად დატვირთული პერიოდი აქვს, ემზადება პრემიერისთვის, რომელიც თავისუფალ თეატრში იგეგმება, ამის გამო საახალწლო პროექტში მონაწილეობაზე უარი განაცხადა. გოგას მეუღლე ასევე მსახიობი მაია დობორჯგინიძე გახლავთ, რომელიც გოგასთან ერთად სერიალ ''შუა ქალაქში'' მარიკას როლს თამაშობდა. წყვილს 5 წლის გაბრიელი ჰყავს, რომელიც თურმე მამას მისი გმირის გამო დასცინის.

- სერიალის პირველმა სერიამ საკმაოდ დიდი რეიტინგი აჩვენა და გამოხმაურებაც კარგი ჰქონდა, ბევრმა ადამიანმა მითხრა, რომ მოეწონა, საზღვარგარეთაც ნახეს ჩემმა ახლობლებმა და დადებითი დამოკიდებულება გამოხატეს, თუ ასე გაგრძელდება, ძალიან კარგი იქნება.
- ძალიან საინტერესო გმირს თამაშობთ, საიქიოდან მობრუნებულს... რთული არ არის მისი განსახიერება?
- ჩემს პროფესიაში რაც მეტი სირთულე იქნება, უფრო ბედნიერი და ამაყი ვიქნები, იმიტომ, რომ მსახიობისთვის მარტივი რაღაცების კეთება არ არის კარგი. გადაღებები მიდის ძალიან საინტერესოდ, მაგრამ არანორმალური გრაფიკით, გვინდა, ერთი სეზონი დავასრულოთ, რომ მერე ადამიანურ რეჟიმში გავაგრძელოთ მუშაობა.
- ''შუა ქალაქის'' შემდეგ, რომლის მეშვეობითაც კიდევ უფრო პოპულარული გახდით, გადაინაცვლეთ ''რუსთავი 2''-ზე, სადაც მონაწილეობდით სერიალში ''ალუბლების ქუჩა 12'', ახლა როგორაა საქმე, წამოხვედით ''რუსთავი 2''-იდან?
- სანამ GDშ-ის სერიალზე დავიწყებდი მუშაობას, კარგა ხნით ადრე ვიყავი წამოსული ''რუსთავი 2''-იდან.
- წამოსვლის მიზეზი რა გახდა?
- სერიალი არ იყო რეიტინგული, დაიხურა და მე, ჩემი მეუღლე და კიდევ ერთი ადამიანი გამოგვიშვეს.
- მართალია, დაკავებული ხართ, მაგრამ სერიალს ''ჩვენი ამბავი'', რომელიც ''იმედზე'' ''შუა ქალაქის'' ნაცვლად გადის, თუ უყურებთ, თვალი მაინც თუ მოგიკრავთ?
- თავიდან რომ დაიწყო, ინტერესის გამო შევხედე, მაგრამ ახლა ისეთი რეჟიმი მაქვს, ჩემს სერიალსაც კი არ ვუყურებ, დილიდან გასული ღამის პირველ საათზე რომ მიხვალ სახლში, რა უნდა იყოს ისეთი განსაკუთრებული, რომ დაჯდე და უყურო?!
- გარდა სერიალისა, გაქვთ რაიმე სიახლე თეატრში?
- კი. მოგეხსენებათ, ვთამაშობ როგორც რუსთაველის, ასევე თავისუფალ თეატრში, ამჟამად სწორედ თავისუფალ თეატრში იდგმება ''რიჩარდ მესამე'', რომელშიც რიჩარდს განვასახიერებ, შრომატევადი სამუშაო და საკმაოდ დიდი პასუხისმგებლობაა, ამ ეტაპზე რეპეტიციები გვაქვს.
- წინასაახალწლოდ თუ იგეგმება რაიმე პროექტი, რომელშიც მონაწილეობთ?
- არა. იყო შემოთავაზება, მაგრამ ''რიჩარდ მესამის'' გამო უარი ვთქვი, დიდი ტექსტი მაქვს, დროც დიდი მიაქვს და ამიტომ მოხდა ასე.
- მართალია, მაიაც მსახიობია, მაგრამ თქვენი ასეთი დატვირთული გრაფიკის გამო არ წუწუნებს?
- სამწუხაროდ, არ ხდება ისე, რომ ყოველ წელს 6-8 პრემიერა იყოს, თუმცა ყველას სიამოვნებით დავთანხმდებოდი. რეალურად, შეიძლება, ერთ წელიწადს ორი-სამი სპექტაკლი გამოვუშვათ, თითოზე კი 3-4 თვეს ვიმუშაოთ და შესაბამისად, ეს პერიოდი ვიყო ასეთ რეჟიმში, ამიტომ ეს კამათის საგანი არ ხდება. რა ვქნა, ასეთია ჩემი პროფესია, არ ვარ შახტიორი და რა გავაკეთო?!.
- პრემიერის წინა დაძაბულობა, ღელვა აისახება პირად ურთიერთობაზე?
- კი, თავისთავად, მით უმეტეს, რომ მსახიობები ბევრად ემოციურები არიან, ვიდრე სხვა პროფესიის ადამიანები, თუ მსახიობი უცებ არ აღელდა და იმდენივე დრო დასჭირდა ამისთვის, როგორც ჩვეულებრივ ადამიანს, არაფერი გამოუვა.
- გოგა, ცოტა ოჯახზე ვისაუბროთ, გვითხარით, რას საქმიანობს მაია? რამდენი წლისაა თქვენი შვილი...
- მაია რეჟისორობს, თავისუფალ თეატრში დგამს სპექტაკლს, მაგრამ ახლა რიგი მიზეზების გამო გაჩერებულია. რაც შეეხება შვილს, გაბრიელ ბარბაქაძეს, 5 წლისაა, დადის ბაღში, ჰგავს მამას, არის ძალიან ცელქი და იმავდროულად ჭკვიანიც, მარტო ცელქი არ გეგონოთ.. უნდა აღვნიშნო, რომ დედა უყვარს, გიჟდება..
- ამაზე მამა არ ეჭვიანობს?
- კი, მაგრამ რა ქნას?! გაბრიელს დედაც უყვარს და მამაც, მაგრამ დედა უფრო, მამასაც რომ უყვარს დედა, რა ქნას?
- მოკლედ, დედას, ანუ მაიას, ორი მამაკაცი ვერ იყოფთ..
- ასეა, ვერა და ვერ ვიყოფთ.
- ალბათ, გაბრიელი უყურებს თქვენს სერიალს, რას გეუბნებათ?
- გახარებული იყო, სერიალი რომ ნახა, მაგრამ დამცინის, რაღაცებს ჩემნაირად თამაშობს, აი, ასეთი ''თავხედი'' ბავშვია...
- ალბათ, გაბრიელი განსაკუთრები ელოდება ახალ წელს და თოვლის ბაბუს საჩუქარს, იცით უკვე, რა უნდა?
- ვიცი და ეს მიშლის ნერვებს..
- რატომ?
- იმიტომ, რომ ძვირი ღირს, მაგრამ თოვლის ბაბუ მაინც შეუსრულებს, აბა, რა ქნას?!
- თავად გახსოვთ, რა ასაკში შეიტყვეთ თოვლის ბაბუის არარსებობის შესახებ?
- არა, იმიტომ რომ თოვლის ბაბუის დღემდე მჯერა.
- ანუ, თუ საჩუქარს მოგიტანთ, დაიჯერებთ, ხომ?
- არა, ისედაც მჯერა... გაბრიელი არის ჩემთვის თოვლის ბაბუის განსაკუთრებული საჩუქარი.
- წელს თუ გაქვთ დაგეგმილი, სად შეხვდებით 2014 წელს?
- შარშან მე, გაბრიელი და ჩემი მეუღლე ბაკურიანში შევხვდით ახალ წელს, ძალიან კარგი იყო, წელს წინასწარ ნამდვილად არ მაქვს დაგეგმილი. ჩემი გრაფიკის გამო არ ვარ ნორმალური ადამიანი, ამიტომ ვერაფერს გეტყვით.
- ახალი წელი დაკავშირებულია ქეიფთან, სმასთან, თამადობასთან...
- რა თქმა უნდა, მაგრამ თამადობას ქეიფი მირჩევნია. როცა თამადა ხარ, გარკვეული პასუხისმგებლობა გაქვს, დრო უნდა გაატარებინო სუფრის წევრებს, ამასობაში კი შეიძლება, შენ ისე კარგად ვერ მოილხინო, ამის გამო დიდად არ მიყვარს სუფრის გაძღოლა და არც მაქვს ამის დრო და ნერვები.

ციცი ომანიძე
ჟურნალი ''რეიტინგი''