მაკა ასათიანი: "ძალიან ბევრ რამეს ვნანობ, მაგრამ უკან ყურება არ მიყვარს"

წარსულში საქართველოში ყველაზე პოპულარული დიზაინერი, ამჟამად კი ბიზნესმენი მაკა ასათიანი ცხოვრების ძირითად დროს შვეიცარიაში ატარებს. მისი დილა ფინჯანი ყავით იწყება, მერე კი კომპიუტერთან ჯდება და საქართველოში ტელეკომპანია "მაესტროს" მართვას იწყებს, რომლის ერთ–ერთი მფლობელი და მისივე არტდირექტორია. ახლო მომავალში ამ საქმესთან დაკავშირებით გრანდიოზულ ცვლილებებს იწყებს – თებერვლიდან "მაესტრო" აბსოლუტურად განახლებული გადაცემებით და ფორმატით გავა ეთერში.
მაკას ამ გამოწვევაში გვერდით ქმარი, ბიზნესმენი კოტე გოგელია უდგას. ის ტელეკომპანიის მართვის საკითხებში ცოლს ბევრ რჩევას აძლევს.
თავის გეგმებზე, მიზნებსა და ოჯახურ ცხოვრებაზე მაკა ასათიანი პირველად "სარკესთან" საუბრობს.
– მაკა, როგორც შევიტყვეთ, ტელეკომპანიაში დიდი ცვლილებები იგეგმება, მის მუშაობაში თქვენც აქტიურად აპირებთ ჩაბმას. კონკრეტულად რა მიმართულებით იმუშავებთ არხზე, პირადად თქვენ რას გააკეთებთ?
– ეს ძალიან დიდი პასუხისმგებლობაა ჩემთვის და შევეცდები, ის მოლოდინი გავამართლო, რაც ჩემ მიმართ არსებობს. ჩემს მოვალეობაში შედის ყველაფერი, რაც ვიზუალს ეხება, მაგრამ ჟურნალისტებს არ ვაცმევ. მათ სამოსზე დიზაინერი თეონა თავართქილაძე ზრუნავს და მიმაჩნია, რომ წარმატებულად.
თებერვლიდან "მაესტრო" ახალი სახით გავა. სტუდიები უცხოეთში მზადდება. ჩვენ არხის ვიზუალის შესახებ ჩვენს კონცეფციას ვადგენთ, შემდეგ კი ეს ყველაფერი რუსეთში დამზადდება. რა თქმა უნდა, ჯერჯერობით კონკრეტულ დეტალებს ვერ გავამხელთ. მოკლედ რომ ვთქვა, არხის გაფორმებაზე ვიზრუნებ. ამავდროულად აქტიურად ვიქნები ჩართული არაპოლიტიკური გადაცემების შინაარსის შერჩევაში.
– რა თემებზე გამახვილდება ყურადღება გადაცემებში?
– ჩემი და "მაესტროს" მთელი კოლექტივის აზრით, ქართულ ტელესივრცეს სოციალური თემები აკლია. ჩვენ ამგვარ თემებს წინ წამოვწევთ. ხმამაღლა უნდა ვიმსჯელოთ პრობლემებზე, რომ, როგორც ქვეყანას, წინსვლა გვქონდეს.
– აქამდე არხის მხოლოდ დამფუძნებელი იყავით, ახლა თქვენს ფუნქციებს არტდირექტორობაც დაემატა. ეს თქვენი იდეა იყო თუ შემოგთავაზეს?
– დღესაც დამფუძნებლად ვრჩები, ოღონდ აქამდე "მაესტროს" საქმიანობაში აქტიურად არ ვიყავი ჩართული. ამ შემთხვევაში გადავწყვიტეთ, რომ ის რესურსი გამოვიყენოთ, რაც გამაჩნია და შემიძლია არხს მოვახმარო, ამიტომ ჩემს ცოდნას ამ ტელეკომპანიაში ვდებ. დამფუძნებელთა კრებამ გადაწყვიტა, ჩემთვის ჩაებარებინათ ეს თანამდებობა. დავთანხმდი, მიუხედავად იმისა, რომ შვეიცარიაში ვცხოვრობ და ამის გამო ხშირად მიწევს ჩამოსვლა. რადგან მანდეს ეს საკითხი, პასუხისმგებლობაც ავიღე ჩემს თავზე.
– უცხოეთიდან საქართველოში ტელეკომპანიის მართვა და მუშაობა რთული არ არის?
– ეს ნამდვილად ძალიან რთულია. ძირითადად "სკაიპით" მიწევს ამ ყველაფრის კეთება. ნამდვილად ძალიან მიჭირს, მაგრამ ვცდილობ და როგორ გამომივა, თებერვლის ეთერი გვაჩვენებს.
– თანამშრომლებთან როგორი ურთიერთობა გაქვთ, როგორ შეფად გთვლიან?
– სანამ არტდირექტორი გავხდებოდი, მანამდეც ძალიან კარგი ურთიერთობა მქონდა თანამშრომლებთან. ალბათ ეს უფრო მათ უნდა ჰკითხოთ. მე, პირადად, ყველასთან ძალიან კარგი დამოკიდებულება მაქვს და ვაფასებ. "მაესტრო" ერთი ოჯახი და გუნდია, სწორედ ეს არის ის აუწონავი ძალა, რაც ჩვენს არხს აქვს.
– ტელეკომპანიაში თქვენი კაბინეტის მოწყობაზეც ალბათ თავად იზრუნეთ.
– კაბინეტი ჯერჯერობით საერთოდ არ მაქვს. ახლა იწყება დიდი მშენებლობა – "მაესტრომ" ახალი ტერიტორია შეისყიდა, სადაც სტუდიები თუ საკონფერენციო დარბაზები განთავსდება. ამას რამდენიმე თვე დასჭირდება და მერე კაბინეტიც მექნება.
– ისეთი ძვირი ბიზნესისთვის, როგორიც ტელევიზიაა, ფინანსების მოზიდვას რა წყაროებით ახდენთ?
– ეს ყველაფერი "მაესტროს" შემოსავლებით და დამფუძნებლების პირადი სახსრებით კეთდება.

– საქართველოში არაფერი იმალება, მით უმეტეს, ჟურნალისტურ წრეში. უკვე ცნობილია, რომ "იმედიდან" ვახო სანაია გადმოდის თქვენთან, ამბობენ, რომ მის კვალს "ღამის შოუს სტუდიაც" მიჰყვება. კიდევ რომელ ცნობად ტელესახეებსა და გადაცემებს უმიზნებთ?
– ვახო სანაიამ მიიღო გადაწყვეტილება, რომ ჩვენთან იყოს და ერთად დიდი გეგმები გვაქვს. "ღამის შოუს სტუდიაც" გადმოდის. დიდი პროექტი გვაქვს მათთან დაკავშირებით – დათო გოგიჩაიშვილი ჩვენთან ძალიან საინტერესო გეგმებით მოდის. ეს ახალი სიტყვა იქნება ქართულ ტელესივრცეში. "მაესტრო 24"–ს მთლიანად დათო გოგიჩაიშვილი ჩაიბარებს თავის გუნდთან ერთად და გასართობ გადაცემებს გააკეთებს. ეს მაყურებლისთვის დიდი სიახლე იქნება. დათო გოგიჩაიშვილი ჩვენთან ორივე არხზე აქტიურად ითანამშრომლებს "მაესტროზეც" და "მაესტრო 24"–ზეც. ამ უკანასკნელს ალბათ სახელს შევუცვლით.
– რა პრინციპით შეარჩიეთ სახეები, რომლებიც თქვენს არხზე გადმოდიან?
– მხოლოდ პროფესიონალიზმი და მსგავსი ხედვა გახდა ამის მიზეზი. მიმაჩნია, რომ შეიკრიბა გუნდი, რომლის წევრებსაც სხვადასხვა თემებთან დაკავშირებით მსგავსი დამოკიდებულება და შეხედულებები გააჩნიათ.
"მაესტროს" მთავარი დამსახურება წლების განმავლობაში არის ის, რომ ხალხის ნდობა მოიპოვა. როცა სიმართლის გაგება სურთ, ჩვენს არხს უყურებენ. ეს კი ჩვენი ყველაზე დიდი კოზირია. გვინდა, ეს უფრო ხილული, აშკარა გახდეს. აქედან გამომდინარე, ვგეგმავთ, რომ არხმა თავისი პირველადი კონცეფცია შეინარჩუნოს და უფრო მეტად აქცენტირებული გახადოს. გეტყვით იმასაც, რომ გვინდა, მაყურებელმა ჩვენთან ერთად გააკეთოს ტელევიზია.
– ამაში რას გულისხმობთ?
– ჩვენ ყოველთვის ვითვალისწინებთ მაყურებლის ინტერესს, მაგრამ ამიერიდან, პირდაპირი მნიშვნელობით, მაყურებელი ჩართული იქნება ტელეკომპანიის განვითარებაში. რა თქმა უნდა, ზუსტად ვერ დაგიკონკრეტებთ, ამის გაკეთებას რა ხერხებით ვაპირებთ, მაგრამ მაყურებელი ტელევიზიის ფუნქციონირებაში მიიღებს მონაწილეობას. მსგავსი პრეცედენტი ქართულ ტელესივრცეში არ ყოფილა და დიდი იმედი გვაქვს, რომ ეს გაამართლებს.
– არხზე პოლიტიკური ტოქ შოუები დარჩება?
– უფრო სოციალურ–პოლიტიკური გადაცემები გვექნება. საინფორმაციო გამოშვებებიც ახალი ფორმატით გავა. ჩვენთან "ბიბისი"–ს წარმომადგენლები ჩამოდიან, რომლებიც ჟურნალისტებს ტრენინგებს ჩაუტარებენ და ასევე მონაწილეობას მიიღებენ გადაცემების დაგეგმვაში. დიდი იმედი გვაქვს, რომ მათი გამოცდილება ძალიან დაგვეხმარება.
დიდი ალბათობით დაიხურება გადაცემები "არგუმენტები" და "პოლიტმეტრი". ეთერში დარჩება "სუბიექტური აზრი", ოღონდ მისი ფორმატიც დაიხვეწება. გადაცემების დახურვა არ ნიშნავს იმას, რომ ნინო თოლორდავა და ნინო ჟიჟილაშვილი ჩვენთან აღარ ითანამშრომლებენ. არავინ წავა. ისინი ჩვენს არხზე აქტიურად გამოჩნდებიან, ოღონდ სხვა ფორმით, მაგრამ არავის აქვს გარანტიები – როგორც იმუშავებენ, რა რეიტინგსაც დადებენ, იმის მიხედვით გაგრძელდება ყველასთან თანამშრომლობა.
– ისეთ პოლიტიზირებულ ქვეყანაში, როგორიც საქართველოა, პოლიტიკური გადაცემების გარეშე ტელევიზია ძნელი წარმოსადგენია. სოციალურ და გასართობ თემებზე გადასვლით რეიტინგს საფრთხის ქვეშ არ დააყენებთ?
– ჩვენი არხი ადამიანებს გასართობი გადაცემებით პრობლემებზე თვალს არ დაახუჭვინებს, პირიქით ვაპირებთ. გავაკეთებთ არა პოლიტიკურ გადაცემებს, სადაც პოლიტიკოსები ფუჭად იდავებენ, არამედ, პირველ რიგში, პრობლემას წამოვწევთ. გვინდა, ხალხის რეალურ პრობლემებზე მაქსიმალური აქცენტი გავაკეთოთ.
როგორც უკვე აღვნიშნე, "ბიბისი"–დან ჩამოდის გუნდი. ისინი ფორმატის დახვეწაში დაგვეხმარებიან. სწორედ მათი რჩევა იყო გადაცემების გაკეთება არა – პოლიტიკოსების, არამედ ხალხისთვის.
– თურქული სერიალების ჩვენება გაგრძელდება?
– თურქული სერიალები აუცილებლად იქნება ჩვენს არხზე, რადგან ძალიან პოპულარულია. ამ სერიალებზე არჩევანი იმიტომ შევაჩერეთ, რომ მაღალი რეიტინგი მოგვიტანეს, მაგრამ არამხოლოდ ამით ვაპირებთ რეიტინგის შენარჩუნებას. გვინდა, ახალი სეგმენტი შევმატოთ "მაესტროს" მაყურებლებს – ახალგაზრდები და მამაკაცები. ამას კი შემდეგნაირად ვგეგმავთ: ვიყიდეთ ნბა–ის (ამერიკული საკალათბურთო ჩემპიონატი) ლიცენზირებული ტრანსლაცია, რომელიც 15 დეკემბრიდან გავა ეთერში. მას ძალიან კარგი კომენტატორები და წამყვანები ეყოლება, მათ შორის გიორგი ზურაბიშვილი – პოლიტიკოს დავით ზურაბიშვილის შვილი. ის ძალიან ინდივიდუალურია, კარგად ფლობს ამ სფეროს და ვფიქრობ, რომ ამომავალი ვარსკვლავია.
– ტელევიზია და მოდა – ამ ორი სფეროდან თქვენთვის რომელი უფრო საინტერესოა?
– ჩემთვის, როგორც პროფესიით მხატვრისთვის, დიდი განსხვავება არ არის, რადგან ორივე ერთნაირ ძალისხმევას ითხოვს. ტელევიზია ძალიან საინტერესო სფეროა და გამიხარდა, როცა ბორდმა გადაწყვიტა, ეს თანამდებობა ჩემთვის მოენდო. ვფიქრობ, რომ კარგ შედეგს დავდებ.
– შესაძლოა ტელესახედაც გიხილოთ?
– ყველაფერი შესაძლებელია, მაგრამ უახლოეს გეგმებში ეს არ შედის.
– წლებია საქართველოში ყველაზე ლამაზ ქალად ხართ აღიარებული. როგორ აღიქვამთ ამ ტიტულს?
– ვერ გიპასუხებთ ამ კითხვაზე, ძალიან მერიდება. მსგავსი შეკითხვა ადრეც დაუსვამთ და ვერასდროს ვპასუხობ, რადგან არ მაქვს შეგრძნება, რომ ყველაზე ლამაზი ქალი ვარ. ამ ტიტულზე უარს ვამბობ!
– როგორია თქვენი ერთი დღე შვეიცარიაში?
– დილით ვდგები, ყავას ვსვამ, უმცროს შვილს ვისტუმრებ სკოლაში, დისშვილს, მარიანას – ინსტიტუტში, მე კი "სკაიპთან" ვჯდები. ბაია გადაბაძე, "მაესტროს" გენერალური დირექტორი ხაზზე მხვდება და ვიწყებთ მუშაობას. დღის განმავლობაში სხვადასხვა საქმეს ვხელმძღვანელობ. ამავდროულად აქტიურად დავდივარ იოგაზე.
– სამი ვაჟის დედა ხართ. გვიამბეთ შვილებზე, მათ საქმიანობაზე, გატაცებებზე.
– ისინი იმ ასაკში არიან, რომ უკვე გვერდით მიდგანან. საამაყო, დიდი ბიჭები არიან და ჩემს პრობლემებსა თუ სიხარულს იზიარებენ. კახი 19 წლის არის და ჟენევაში სწავლობს. ლევანი 17 წლის არის, ფეხბურთს თამაშობს ჰოლანდიის ერთ–ერთ გუნდში და იქვე სწავლობს (კახი და ლევან ჟორდანიები – შვილები პირველი ქორწინებიდან. ავტ.). უმცროსი, კონსტანტინე კი 9 წლისაა, სკოლაში დადის. ის ჯერ კიდევ პატარაა და მეტი ყურადღება სჭირდება.
– უფროსი ვაჟი უკვე იმ ასაკშია, რომ შესაძლოა მალე დედამთილიც გახდეთ. ემზადებით ამ სტატუსისთვის?
– ამაზე ჯერ ნამდვილად არ ვფიქრობ, მაგრამ გამიხარდება, რადგან დიდი ოჯახის მოყვარული ვარ.
– თქვენი ქმარი, ბიზნესმენი კოტე გოგელია, თქვენს ტელესაქმიანობაში რაიმე ფორმით მონაწილეობს?
– ჩემი მეუღლე მთლიანად ჩართულია ჩემს საქმიანობაში და ასევე მეც – მის საქმიანობაში. კოტე "მაესტროს" ძალიან ეხმარება ფინანსურ თუ მართვის საკითხში და ბაიას ხშირად აძლევს რჩევებს. ორივეს ცხოვრების ახალი წესი გვაქვს, რომელიც დრომ მოიტანა: ჩემი ქმარი ძირითადად მოსკოვში ცხოვრობს, მე – შვეიცარიაში. ამიტომ ძალიან ბევრს ვმოგზაურობთ. ხან ერთმანეთთან ჩავდივართ, ხან რომელიმე მესამე ქვეყანაში ვხვდებით. ცხოვრების რიტმი ძალიან აჩქარებულია და ჩვენც სხვა გზა არ გვაქვს, ფეხდაფეხ უნდა მივყვეთ.
– 10–15 წლის წინ ქართული შოუბიზნესის წამყვანი სახე და თბილისური ბომონდური ცხოვრების მამოძრავებელი ძალა იყავით. არ გენატრებათ ის მხიარული დრო?
– არა, ჩემთვის ეს წარსულია და საინტერესო აღარ არის. ჩემი ცხოვრება გაგრძელდა, პროექტები თუ გეგმები შეიცვალა, ყველაფერი წინ მიდის და მეც მივყვები.
– რა არის თქვენთვის დასვენების საუკეთესო საშუალება?
– შვილებთან ყოფნა. როცა მთელი ოჯახი ვიკრიბებით, მნიშვნელობა არ აქვს, ეს რომელ ქვეყანაში იქნება, ყველაზე კარგად და მშვიდად მაშინ ვგრძნობ თავს.
– ერთი პერიოდი მცენარეების მოვლით, მებაღეობით იყავით გატაცებული. შვეიცარიაში პატარა ბოსტანიც გქონდათ გაკეთებული საკუთარი ხელით. რა ბედი ეწია იმ ბოსტანს?
– ბოსტანი, რომელსაც ჩემი ხელით ვუვლიდი, სამწუხაროდ, ვეღარ შევინარჩუნე. მაშინ 2 წლის განმავლობაში მხოლოდ ბავშვებზე ვიყავი გადართული, ცხოვრების გარდამავალი ეტაპი მქონდა, ძირითად დროს სახლში ვატარებდი და ბოსტანიც გავაკეთე. ახლა ვეღარ ვახერხებ მის მოვლას, მიუხედავად იმისა, რომ ძალიან მინდა. ეს საქმე ჩემთვის სასიამოვნო იყო.

– წარმატებულ ადამიანად ითვლებით, მაგრამ ბევრი სიძნელე და პრობლემაც გაქვთ გადალახული. არის რაიმე, რასაც ნანობთ?
– კონკრეტულად ვერაფერს გეტყვით, ისე კი ძალიან ბევრ რამეს ვნანობ, მაგრამ ცხოვრება წინ მიდის და არც მე მიყვარს უკან ყურება, სულ წინ და წინ მივდივარ.
მანანა ნოდია, ჟურნალი სარკე