"პროფილის" გადაწყვეტილება ჟანა ვახტანგიშვილის დაწუნებულ ბინაზე

რამდენიმე დღის წინ გადაცემა "პროფილში" სულისშემძვრელი ისტორია მოვისმინეთ, რომლის მიხედვითაც 20 წლის ჟანა ვახტანგიშვილი 5 წლის ქალიშვილთან ერთად ქუჩაში ცხოვრობდა, ღამის გასათევი არ ჰქონდა და თავს მათხოვრობით ირჩენდა. 20 წლის დედის ოცნება სახლი და სამუშაო იყო, რათა საკუთარი ქალიშვილისათვის ცხოვრების ნორმალური პირობები შეექმნა. გადაცემა "პროფილისა" და კეთილი ადამიანების წყალობით ჟანას სამტრედიაში ბინა აჩუქეს, ყოველთვიური დახმარებაც დაუნიშნეს და სამსახურიც უშოვეს. სულ ცოტა ხნის წინ კი მაია ასათიანმა ინფორმაცია გაავრცელა, რომლის მიხედვითაც ჟანამ სამტრედიაში ნაჩუქარ სახლსა და სამსახურზე უარი თქვა, თბილისში მათხოვრობით მეტი შემოსავალი მაქვსო...

საზოგადოების დიდი ნაწილი ჟანას საქციელს გმობს. გადაცემა "პროფილი" და მაია ასათიანი ხალხის აზრით დაინტერესდნენ, აღნიშნულ თემასთან დაკავშირებით ბევრი საინტერესო მოსაზრება გავრცელდა. "ამ თემის გასაჯაროვება მხოლოდ იმიტომ გადავწყვიტეთ, რომ პასუხისმგებლობას ვგრძნობთ მაყურებლისა და იმ ადამიანების წინაშე, რომლებმაც ჩვენი სტუმრების პრობლემები გულთან ახლოს მიიტანეს"-წერენ თოქ-შოუ პროფილის ოფიციალურ ფეისბუქის გვერდზე. ბევრი კამათის, მსჯელობისა და მითქმა-მოთქმის შემდეგ გადაცემა "პროფილის" შემოქმედებითმა გუნდმა გადაწყვეტილება მიიღო: "გავითვალისწინეთ თქვენი აზრი და გადავწყვიტეთ შემდეგი: რადგან საქმე მხოლოდ ჟანას არ ეხება და საფრთხე მის 5 წლის შვილს ემუქრება, ამ ბავშვს რომ მაინც ჰქონდეს შანსი, რომ იცხოვროს ნორმალურ პირობებში, არ ირღვეოდეს მისი უფლებები და თანატოლების მსგავსად აქვს ღირსეული ცხოვრების უფლება, ამიტომ ჟანას ვაძლევთ დროს - 3 თვეს. თუ ამ დროის განმავლობაში ის საკუთარ თავს და შვილს მისცემს შანსს, რომ იცხოვროს ღირსეულად, ბინა იქნება მისი და ჩვენ მას ყველა პირობას შევუქმნით და გვერდით დავუდგებით! თუ ეს ასე არ იქნება, მაშინ ამ ბინას გადავცემთ სხვა გაჭირვებულს და ამის შესახებ ჩვენს მაყურებელს შევატყობინებთ!"

საინტერესოა როგორ განვითარდება მოვლენები...