წითელი მოცხარის საწებელი - უხდება ხორცს

ეს საწებელი ძალიან უხდება შემწვარ ხორცეულს - იქნება ეს ღორის, საქონლისა თუ ქათმის. ძალიან გემრიელი გამოდის ალუბლითაც.


საჭირო მასალა

500 გრ წითელი მოცხარი, გარჩეული
1 კონა ქინძი, სასურველია თესლიანი
3-4 ტოტი ქონდარი
1 პატარა წითელი წიწაკა, თესლების გარეშე
3-4 კბილი ნიორი
მარილი

მომზადება

მწვანილები გავარჩიოთ, ღეროდან მოვაცილოთ ფოთლები, ნიორსა და წიწაკასთან ერთად დავნაყოთ, ბლენდერში დავაქუცმაცოთ ან სულაც ძალიან წვრილად დავჭრათ. აუცილებლად შევურიოთ ქინძის მწვანე თესლიც.

მოცხარი დავჭყლიტოთ (კარტოფილის საჭყლეტით ან ხელით) და წამოვადუღოთ რამდენიმე წუთით. შევურიოთ მწვანილიანი მასა, დავამატოთ მარილი. უფრო ერთგვაროვანი კონსისტენციისთვის შეგვიძლია დავაბლენდეროთ. გაცივებული საწებელი შევინახოთ მაცივარში.

მწვანილის და ნიორ-წიწაკის რაოდენობა აბსოლუტურად დამოკიდებულია ჩვენს გემოვნებაზე და რაოდენობა შეგვიძლია შევცვალოთ. თუ მთლიანი წიწაკა არ გვაქვს, მსხვილად დაფქული გამოიყენეთ.

თუ ასეთი საწებელის ზამთრისთვის შენახვას გადავწყვეტთ, ქილებში განაწილებულს სტერილიზაცია გავუკეთოთ და მოვხუფოთ.