საზაფხულო ტოლმა ტკბილ წიწაკებში

საზაფხულო ტოლმა შეგვიძლია მოვამზადოთ სხვადასხვა ფერის წიწაკებით, ასე უფრო ლამაზი გამოვა.


საჭირო მასალა


8 ცალი ტკბილი (ბულგარული) წიწაკა
2 ცალი პატარა ბადრიჯანი
1 ცალი პატარა ყაბაყი
1 კონა ოხრახუში
1 თავი ხახვი
100 გრ ხორცის ფარში
1 ცალი გახეხილი სტაფილო
2-3 ს.კ. ზეთი
მარილი
პილპილი

სოუსისთვის

300 გრ არაჟანი
4 ცალი გახეხილი პომიდორი
2 თავი ხახვი
2-3 კბილი ნიორი
1 ს.კ. ზეთი
მარილი
პილპილი

მომზადება

წიწაკებს ფრთხილად ამოვაცალოთ ყუნწები და თესლი. სტაფილო გავხეხოთ, დანარჩენი ბოსტნეული წვრილად დავჭრათ. ტაფაში ჩავასხათ ზეთი, დავუმატოთ ხახვი და მოვშუშოთ. შემდეგ დავუმატოთ დანარჩენი ბოსტნეული და ხორცის ფარში და განვაგრძოთ შუშვა.

ბოლოს დავაყაროთ მწვანილი, მარილი და წიწაკა. მოშუშული ბოსტნეული ოდნავ შევაგრილოთ და დავტენოთ წიწაკები. ჩავაწყოთ ქვაბში, დავასხათ იმდენი წყალი, რომ წიწაკები 1/3-ზე დაფაროს, დავუმატოთ მარილი, დავახუროთ სახურავი და დავდგათ ცეცხლზე.

ცალკე მოვამზადოთ სოუსი: ტაფაში ჩავასხათ ცოტა ზეთი, დავუმატოთ წვრილად დაჭრილი ხახვი. 3-5 წუთით შუშვის შემდეგ დავასხათ გახეხილი პომიდორი და განვაგრძოთ მზადება. არაჟანში ავურიოთ დაჭყლეტილი ნიორი და დავუმატოთ პომიდორს, დავაყაროთ მარილი და პილპილი, კარგად ამოვურიოთ და დავასხათ წიწაკებს. ვხარშოთ საბოლოო მომზადებამდე.