ნინო სურგულაძე: "ადამიანი თუ შინაგანად არ ანათებს, მას მაკიაჟი ვერ უშველის"

ოპერის მომღერალი, მეცო სოპრანო ნინო სურგულაძე, იმ ასაკშია, როცა სარკე მისთვის მხოლოდ და მხოლოდ კარგი მეგობარია და მასში ჩახედვა კარგ განწყობაზე აყენებს. იტალიაში, სადაც ქართველი მომღერალი წლებია ცხოვრობს და მუშაობს, ქალები განსაკუთრებით ზრუნავენ გარეგნობაზე, პლასტიკურ ქირურგიას ახალგაზრდობიდანვე იყენებენ. მათ მაგალითზე ნინოს ბევრი სასარგებლო ინფორმაცია აქვს მიღებული, თუმცა, როგორც ქართველი ქალებისთვისაა დამახასიათებელი, უპირატესობას მიანც ბუნებრიობას ანიჭებს და ამაში გენეტიკაც ეხმარება. ქართველი მომღერლისთვის სილამაზის ფაქტორებში პირველ ადგილზე დგას შინაგანი სამყარო, ჯანსაღი ცხოვრება და სიცოცხლის ხალისი.
მან ჩვენი ჟურნალის საშუალებით ქართველ ქალებს საინტერესო რჩევები მისცა.
– ნინო, სცენურ იმიჯს თავად იქმნით თუ დიზაინერი გეხმარებათ?
– არის შემთხვევები, როცა სპექტაკლს დიზაინერი ჰყავს და ის წყვეტს, არტისტს რა უნდა ეცვას, მაგრამ, თუ სოლო კონცერტი მაქვს, ან სხვა საჯარო გამოსვლა, იმიჯზე თავად ვზრუნავ.

– რა დრესკოდი უნდა დაიცვას სცენაზე კლასიკური მუსიკის შემსრულებელმა?
– კლასიკურ მუსიკას თავისი დოგმები აქვს, მაგალითად, კაბა ძირითადად გრძელი უნდა იყოს. ასევე, გაგიკვირდებათ და, არსებობს ფერები, რომლებიც თეატრში მიღებული არ არის. მაგალითად, იასამნისფერი იტალიაში სცენაზე სრულიად მიუღებელია. გარკვეული ცრურწმენაც კი არსებობს ამ ფერთან დაკავშირებით, რომ ის უიღბლო ფერია. მე ამ სტერეოტიპს ვებრძვი. შემიძლია ვთქვა, რომ ჩემი ერთ–ერთი წარმატებული კონცერტი იასამნისფერი კაბით ჩავატარე. ვაღიარებ, თავიდან ცოტა გამიკვირდა, როცა გავიგე, რომ ამ კონცერტისთვის იასამნისფერ კაბას მიკერავდნენ და შევწუხდი კიდეც. საბოლოოდ დიდი წარმატება მოვიპოვე და მივხვდი, რომ საკუთარ თავში უნდა ვებრძოლოთ სტერეოტიპებს თუ ცრურწმენებს.
– რა ფერებში გრძნობთ თავს კარგად?
– მიყვარს შავი ფერი, რომელიც ჩემს გარდერობში დომინირებს. ასევე ძალიან მიყვარს ცისფერი და თეთრი. ცისფერი პოზიტიურია, თეთრი – ნეიტრალურია და იმ დროს მაცვია, როცა განსაკუთრებულად კარგ ხასიათზე ვარ, მაგრამ თეთრი თითქოს წონას გვმატებს, შესაბამისად, თუ ამ ფერის სამოსი გვაცვია და საკუთარი თავი მოგვწონს, ესე იგი კარგ ფორმაში ვართ. თეთრი ფერი ჩემთვის კარგი საზომია.
– ამბობენ, რომ ოპერის მომღერლებისთვის საჭიროც კი არის ზედმეტი წონა. ეს სიმართლეა თუ მითი?
– ჩვენი საქმე მსოფლიოში მეორე პროფესიად ითვლება თავისი სირთულით. ამიტომ მაქსიმალურად უნდა შევუწყოთ ხელი ჩვენს ფიზიკურ სიჯანსაღეს. დღეს სტერეოტიპები შეიცვალა, სხვა მოთხოვნებია სცენაზე და არ არის აუცილებელი, ოპერის მომღერალი ძალიან მსუქანი იყოს. ჭარბი წონა კარგი არავისთვის არის. ჩემი გამოცდილებით ვამბობ, რომ ფორმის შენარჩუნება სრულიად შესაძლებელია, თუ ნებისყოფა გეყოფა.
– ოპერის მომღერლებს რაციონიც განსხვავებული აქვთ. თქვენი კვების რეჟიმი როგორია?
– ჩვენ აუცილებლად გვჭირდება საკვები, რომელიც ენერგიის წყაროა – ცილები და ვიტამინები. დამტკიცებულია, რომ მძლეოსნის და საოპერო შემსრულებლის გული ერთსა და იმავე დატვირთვას განიცდის, მაგრამ ეს არავითარ შემთხვევაში არ ნიშნავს, რომ სპექტაკლიდან სახლში მივიდეთ და მაცივარი გამოვაცარიელოთ. ჩვენთვის სწორი კვებაა აუცილებელი, რომელიც დროში უნდა იყოს განაწილებული. ფიზიკური ფორმის შენარჩუნებისთვის ძალიან მნიშვნელოვანია ერთსა და იმავე დროს კვება. იტალიელებს ეს გათვალისწინებული აქვთ. იქ ყველამ იცის, როდის არის კვების საათები და ამ დროს არავინ არავის ურეკავს.
– პროექტში "ცეკვავენ ვარსკვლავები" მაყურებელმა რამდენჯერმე გიხილათ განსხვავებული და საინტერესო მაკიაჟით. თავად შეგიძლიათ მისი გაკეთება თუ მხოლოდ ვიზაჟისტებს ანდობთ სახეს?
– წლების განმავლობაში, რაც სცენაზე ვდგავარ, ხშირად მიწევს მაკიაჟის გამოყენება, ამიტომ ჩემი სახე ძალიან გადაღლილია. სხვადასხვა ვიზაჟისტებთან მუშაობის შედეგად უკვე ზუსტად ვიცი, თუ რა უხდება ჩემს სახეს. რა თქმა უნდა, მომწონს, როცა პროფესიონალი ვიზაჟისტი მიკეთებს მაკიაჟს, რადგან ერთია, რას ხედავ შენ და მეორე, რას ხედავს სხვა. ამიტომ ვიზაჟისტი უფრო კარგად აკეთებს მაკიაჟს. მაგრამ მითითებებს მათ ყოველთვის ვაძლევ.
მომხრე ვარ, რომ ყოველდღიურობაში ადამიანი მაქსიმალურად ბუნებრივად გამოიყურებოდეს. როცა სადმე მივდივარ, ვცდილობ, თვალებს მეტად გავუსვა ხაზი. მიყვარს ისეთი მაკიაჟი, რომელიც თითქმის არ ჩანს. ასევე მნიშვნელოვანია შანელის სიტყვები, რომელიც ამბობდა, ქალს, რომელიც საერთოდ არ იყენებს მაკიაჟს, საკუთარ თავზე დიდი წარმოდგენა აქვსო. არის ასაკი, როცა ქალმა მაკიაჟზე ფიქრი უნდა დაიწყოს. სასურველია, თინეიჯერმა მაკიაჟი არ გამოიყენოს, თუმცა დღეს პირიქით ხდება – მცირე ასაკში უფრო ბევრ მაკიაჟს იკეთებენ. გემოვნებით და ზომიერად გაკეთებული მაკიაჟი ყოველთვის მისასალმებელია.
– აქსესუარები და სუნამო – ამ ქალური სისუსტეების მიმართ რა დამოკიდებულება გაქვთ?
– აქსესუარებს დიდ მნიშვნელობას ვანიჭებ. მიმაჩნია, რომ სამკაულები სცენაზე აუცილებელია. აქსესუარები გამოხატავს გემოვნებას და ის სიტუაციის შესაბამისი უნდა იყოს. რაც შეეხება სუნამოს, ჰოროსკოპით სასწორი ვარ და ჩემი ნიშნისთვის სუნამო ნამდვილი სისუსტეა. როგორც ბევრს, მეც მაღიზიანებს დიდი რაოდენობით სუნამოს გამოყენება. ვთვლი, რომ სურნელი იდუმალი უნდა იყოს. სუნამოს კოლექცია მაქვს. წლის განმავლობაში შეიძლება მხოლოდ ერთი სურნელი გამოვიყენო, მაგრამ კოლექციას ახალ–ახალ სუნამოს ძალიან ხშირად ვამატებ.
– ასაკის მატებასთან ერთად ქალი განსაკუთრებით დიდი მნიშვნელობას ანიჭებს კანის მოვლას. რა არის საჭირო კანის სიჯანსაღისთვის, თქვენი გამოცდილებიდან რას გაგვიზიარებთ?
– მივესალმები, როცა ქალები თავიანთ თავს უვლიან და ამისთვის ესთეტიკურ მედიცინას მიმართავენ – ვთქვათ, ბოტოქსს იყენებენ ან, რადიკალურ შემთხვევაში, კანის გადაჭიმვას. გასაგებია იმ ადამიანის მდგომარეობა, რომელიც სარკეში ყურებისას სახეზე წლების კვალს ხედავს და მდგომარეობის გაუმჯობესება სურს. მიმაჩნია, რომ პლასტიკური ქირურგის ჩარევა მაქსიმალურად შორს უნდა გადაიდოს. არსებობს ბევრი სხვა საშუალება კანის მოვლისთვის, მათ შორის – მეზოთერაპია თუ კანის საცხები, რომლებიც საკმაოდ ეფექტურია. პირველ რიგში კი, საჭიროა ცხოვრების ჯანსაღი წესის დაცვა – უარი ნიკოტინს და მზის სხივებს, რომლებიც კანისთვის საზიანოა. აუცილებელია წყლის ხშირად დალევა, ანუ ბუნებრივი საშუალებებით სრულიად შესაძლებელია ადამიანმა დიდ შედეგს მიაღწიოს.
– თქვენ თუ მიგიმართავთ ესთეტიკური მედიცინისთვის და თუნდაც ბოტოქსი გამოგიყენებიათ?
– ბოტოქსი არასდროს გამიკეთებია, კიდევ ერთხელ ვამბობ, ბუნებრიობის მომხრე ვარ. ვცდილობ, კანს საცხებით მოვუარო. არ ვიცი, ჩემი კანისთვის ეს როდემდე იქნება საკმარისი, მაგრამ სანამ ის ამის საშუალებას მომცემს, ამ ხერხს გამოვიყენებ. კანისთვის გენეტიკური ფაქტორიც ძალიან მნიშვნელოვანია. არიან ადამიანები, რომლებიც საერთოდ არაფერს იკეთებენ, მაგრამ არაჩვეულებრივად გამოიყურებიან. ასე რომ, გენეტიკას პლუს თავის მოვლა კარგ შედეგს გვაძლევს. ჯანსაღი ცხოვრების წესი დაბერებას ხელს უშლის.
– არსებობს გამოთქმა, რომ გარკვეულ ასაკამდე სარკე ქალის მეგობარია, შემდეგ კი მტერი ხდება. გულწრფელად რომ გვითხრათ, სარკის წინ მდგომს გიფიქრიათ ასაკის მატებასა და მისგან გამოწვეულ არასასიამოვნო ცვლილებებზე?
– გეტყვით, რომ ასევე არსებობს თეორია, რომლის მიხედვითაც, სარკეში ყოველი ჩახედვა ადამიანისთვის გარკვეული შოკია. პროფესიიდან გამომდინარე, ჩემთვის სარკესთან მუდმივი კონტაქტი აუცილებელია. ამავდროულად, სარკეში ჩახედვა ჩემთვის აუტოტრენინგია – ის თავდაჯერებულობას მმატებს, უფრო კონცენტრირებული ვხდები. განსაკუთრებით ძნელია ასაკობრივი ცვლილებების შემჩნევა იმ ადამიანებისთვის, ვისაც კარგი გარეგნობა აქვთ, მაგრამ ყველა უნდა შეეგუოს, რომ ეს ბუნებრივი პროცესია. იმედი მაქვს, რომ ერთ დღეს ექიმები მიაგნებენ მეთოდს, რომელიც უჯრედების დაბერებას ხელს შეუშლის. მანამდე კი უნდა შევეგუოთ, რომ სიბერე ბუნებრივი პროცესია.
ქალს შეუძლია ყველა ასაკი მოიხდინოს. ვთვლი, რომ შეუხედავი ქალი არ არსებობს, მთავარია, თავისი გარეგნობა სწორად წარმოაჩინოს. სარკე კი ყოველთვის ჩვენი მეგობარია, რადგან ის გვაძლევს ობიექტურ ინფორმაციას ჩვენ შესახებ.
– უფროსი თაობისგან რა გახსოვთ, როგორ უვლიდნენ თავს თქვენს ოჯახში?
– ჩემს ოჯახში ვუყურებდი, რომ დედა თავის მოვლაზე კი არა, შვილების აღზრდაზე იყო გადართული. მიუხედავად ამისა, დედა ახლაც, თავის ასაკში, ჩემზე უკეთესად გამოიყურება. ალბათ ეს გენეტიკის გამოა. მისგან მახსოვს, რომ მზის სხივების მიმართ სიფრთხილე უნდა გამომეჩინა და მეც მზეს ყოველთვის ვერიდები. სოლარიუმში სულ ორჯერ ვარ ნამყოფი. მზის სხივები კანს ძალიან აბერებს. რაც შეეხება ბებიას, ისიც მხოლოდ საპონს და წყალს იყენებდა, მაგრამ ხანდაზმულ ასაკშიც კი საოცარი კანი ჰქონდა.
ახლა მეტი საშუალება არსებობს თავის მოვლისთვის და შედეგიც უფრო ეფექტურია, მაგრამ კარგ გარეგნობას ყველაზე მეტად განწყობა და ბედნიერება უზრუნველყოფს. ამიტომ მთავარია, განწყობაზე ვიზრუნოთ.
– იტალიაში ცხოვრობთ და სხვადასხვა ქვეყანაში გასტროლებზე ხშირად დადიხართ. შეადარეთ ქართველი და უცხოელი ქალების გარეგნობა, სტილი.
– ახალი თაობა თბილისში უფრო კარგად გამოიყურება, ვიდრე თუნდაც იტალიაში. ეს ალბათ ისევ და ისევ გენეტიკის დამსახურებაა. იტალიაში მალე ბერდებიან. იქ პლასტიკური ქირურგიის თუ ბოტოქსის გამოყენება ძალიან ჩვეულებრივი მოვლენაა. სამაგიეროდ იტალიაში ასაკოვანი ქალები ძალიან სასიამოვნოდ გამოიყურებიან. იქ იმდენად უვლიან თავს, რომ მათი შეხედვა გესიამოვნება. საქართველოში კი ასაკის მატებასთან ერთად ეშვებიან. დასაფასებელია, რომ საზღვარგარეთ ქალები გვიან ასაკამდე დადიან სილამაზის სალონებში, მაგრამ, რა თქმა უნდა, ამის მოტივაციას მათი ცხოვრების მაღალი დონე იძლევა. თუმცა, თუ ადამიანი შინაგანად არ ანათებს, მას ვერანაირი მაიკაჟი და სილამაზის სალონი ვერ უშველის. ამიტომ, მიუხედავად ყველა პრობლემისა, უნდა ვეცადოთ, შინაგანი წონასწორობა დავიცვათ და პოზიტიური განწყობა შევინარჩუნოთ.
მანანა ნოდია, ჟურნალი სარკე