ამერიკაში საშიში დაავდება ვრცელდება, რომელიც მღრღნელებს გადააქვთ

კალიფორნიაში, იოსემიტის ნაციონალური პარკის თითქმის 10 ათასი დამთვალიერებელი შეიძლება დაავადებულიყო სასიკვდილო სენით, რომლის მსხვერპლიც უკვე გახდა 2 ადამიანი – წერს ადგილობრივი მედია.

საუბარია ფილტვების ჰანტავირუსულ სინდრომზე, უიშვიათეს დაავადებაზე, რომლის დიაგნოსტირებაც ძალიან რთულია.

დაავადების საინკუბაციო პერიოდი 6 კვირაა. სიმპტომებით ჩვეულებრივ გრიპს ჰგავს, დაგვიანებულ სტადიაზე კი ფილტვების შეშუპებას იწვევს.

ამ დროისათვის ოფიციალურად 6 ადამიანის ინფიცირების შემთხვევაა დადასტურებული და ექვსივე შემთხვევაში ინფიცირება კალიფორნიაში მოხდა. როგორც გაირკვა, დაავადებულები, ამ ზაფხულს იოსემიტის ნაციონალურ პარკში ისვენებდნენ.

ვირუსის პირველი მსხვერპლი კი 37 წლის მამაკაცი გახდა.

აშშ-ის ჯანდაცვის სამინისტრომ პარკის ყველა დამთვალიერებელს, ეს კი წლევანდელ ზაფხულს დაახლოებით 10 ათასი ადამიანია, მიმართა ყურადღება მიაქციოს ჯანმრთელობას და პირველივე ეჭვის შემთხვევაში ექიმებს მიმართონ.

ჰანტავირუსული სინდრომის საწინააღმდეგო წამალი ან ვაქცინა არ არსებობს. ის ადვილად გადადის ადამიანიდან ადამიანზე. ინფიცირება შესაძლებელია ხელის ჩამორთმევითაც კი. ის ასევე მღრღნელებსაც გადააქვთ.

იოსემიტის ნაციონალური პარკის ადმინისტრაცია იუწყება, რომ ყოველდღიურად შეშფოთებული ტურისტების ათასობით სატელეფონო ზარს იღებს. მიუხედავად ამისა, პარკს ხალხი მაინც ეტანება.

ამ ადგილებში ფილტვის ჰანტავირუსული სინდრომით დაავადების შემთხვევები 2000 და 2010 წლებშიც დაფიქსირდა, თუმცა მან მსხვერპლი წელს პირველად გამოიწვია.