თამთა ლანო - ''ქართველი ბარბის'' ახალი პროექტები

თამთა ლანოს შესახებ თქვენი ბუკლიკო ადრეც წერდა. წარმოშობით ქართველი მსახიობი და მომღერალი რა ხანია რუსეთში საქმიანობს. ცოტა ხნის წინ ჯგუფი შექმნა - ''თამაშის წესები'' და კონცერტებით გამოდის.

თამთას ნამდვილი გვარი ჯამალაშვილია. მოსკოვში დაიბადა 1988 წლის 26 ნოემბერს, თუმცა ადრეული ბავშვობა თბილისში გაატარა ბებიასთან და მხოლოდ ქართულად ლაპარაკობდა. 4 წლისა დაბრუნდა მოსკოვში და რუსულიც მაშინ ისწავლა.

რუსეთში სახელმწიფო საესტრადო-ჯაზური ხელოვნების მუსიკალური სასწავლებელი დაამთავრა, შემდეგ - გნესინების სახელობის მუსიკის აკადემია.

სახელი გაითქვა მუსიკალურ პროექტებში მონაწილეობით და გამარჯვებით - მაგალითად, ''რუსეთის ოქროს ხმა'' გახდა, ''არტ-ტრანზიტში'' გაიმარჯვა, ასევე სტოკჰოლმის საერთაშორისო მუსიკალური კონკურსის ლაურეატი გახდა.

ჯერ საბავშვო კონკურსებში მონაწილეობდა, მერე კი ზრდასრულებს შორისაც გამოდიოდა.
მუსიკალურ კონკურსებს სამსახიობო გამოცდილება მოჰყვა. რამდენიმე რუსულ ტელესერიალში გამოჩნდა, რომელთაგან განსაკუთრებით აღსანიშნავი იყო ახალგაზრდული სერიალი ''რანეტკი''.

მთავარი როლი ჰქონდა 2007-2008 წლებში გადაღებულ სერიალში ''დედინაცვალი''. აქ მის გმირს ბარბი ერქვა და ამ როლისთვის თამთამ თმა ქერად შეიღება. ეს პროექტიც პოპულარული აღმოჩნდა და თამთას ხშირად მოიხსენიებდნენ ქართველ ბარბიდ.

ბოლო წლებში მას კიდევ ჰქონდა რამდენიმე როლი, წელს გამოვა ფილმი მისი მონაწილეობით ''ლიზა შისოვა''. პარალელურად თამთა პედაგოგობს კიდეც - დამწყებ მომღერლებს ვოკალის გაკვეთილებს უტარებს.

რაც შეეხება მის ჯგუფს, ეს არის დუეტი ''თამაშის წესები'', რომელშიც მის გარდა პიოტრ მალანოვი მღერის. ჯგუფს ხშირად აქვს კონცერტები, მიჰყავთ კორპორატიული საღამოები.
მსახიობი

ჟურნალი ''რეიტინგი''