კბილების წმენდა აახალგაზრდავებს

ადამიანის შეგრძნება და განწყობილება ბევრადაა დამოკიდებული მისი კბილების მდგომარეობაზე. მოხუციც კი, თუ მას მაგარი, თეთრი და სუფთა კბილები აქვს, თავს მხნედ გრძნობს და თავის თავში დარწმუნებულია.

ამჟამად არსებობს კბილის პასტები ყველა ასაკისა და გემოვნებისათვის. როგორ ისუფთავებდნენ მათ გარეშე კბილებს ჩვენი წინაპრები?

კბილების წმენდის გავრცელებული საშუალება ძველ რუსეთში იყო ხის ნახშირის ფხვნილი, რომელსაც არყის ხის დაწვის შედეგად იღებდნენ. ამ ფხვნილით გაწმენდის შემდეგ კბილებში წყალს კარგად ივლებდნენ და სურნელოვანი საპნით იბანდნენ.

ძალიან სასარგებლოდ მიიჩნეოდა წიწვიანი მცენარეების - ფიჭვის, ნაძვის და ა.შ. საღეჭი ფისი. ჩვენში მას კევს ეძახიან. ფისს იმარაგებდნენ შემოდგომაზე და ნაჭრის ან ხის ქერქის კოლოფებში ინახავდნენ.

ფისს გასასუფთავებლად ათავსებდნენ წვრილხვრელებიან ფიცარზე, რომელიც ქოთანს ეხურა. ნედლი ფისი ნახვრეტებით ქოთანში ეწვეთებოდა, ჭუჭყი კი ზემოთ რჩებოდა.

კბილების გასაწმენდად წიწვიანი ხის ტოტის კანიც კარგია. კანს აცლიან, შემდეგ კი ერთი მხრიდან კარგად ჩეჩქვავენ რაიმე მძიმე საგნით და ფუნჯს ამსგავსებენ (დაღეჭვაც შეიძლება).
ასეთმა ფუნჯმა საველე პირობებში თავისუფლად შეიძლება შეცვალოს ჯაგრისიც და პასტაც.

კბილების გაწმენდის სხვა მრავალი ხერხიც არსებობდა. ბევრ ეთნოგრაფს აოცებდა აფრიკული ტომის - ბერგდამების - კბილების თვალისმომჭრელი სითეთრე. როგორც აღმოჩნდა, ისინი საკმაოდ მარტივ და ხელმისაწვდომ საშუალებას იყენებდნენ: განუწყვეტლივ ღეჭავდნენ ტყავის პატარა ნაჭერს.

რაც შეეხება კბილების ჯანმრთელობას, ბოლო გამოკვლევებმა აჩვენა, რომ ჩაი აუცილებელია კბილის ემალის სხვადასხვა დაზიანებისგან დასაცავად.

მსგავსი უნარი აქვს ყურძნისა და ალუბლის წვენს, რძეს, ყავას და სხვადასხვა სახის ყველს.
სპეციალისტების აზრით, კბილების რეგულარული წმენდა ღრძილებში სისხლის მიმოქცევასაც აუმჯობესებს, რაც ხელს უწყობს მათ სიჯანსაღეს, ჯანსაღი კბილები და ღრძილები კი მნიშვნელოვნად ახანგრძლივებს ახალგაზრდობას.

ჟურნალი ''რეიტინგი''