თემო მჟავია შვილის დაბადებას დაესწრო

იუმორისტ თემო მჟავიას ცოლმა, ანასტასია შმაკოვამ, ახალი წლის წინ ქმარს ყველაზე დიდი საჩუქარი გაუკეთა – თემო ბიჭის მამა გახდა. დანიელ მჟავია 29 დეკემბერს დაიბადა. მშობიარობას მამა დაესწრო. "სარკესთან" საუბარში ის ემოციებს ვერ მალავდა:
– დანიელი 29 დეკემბერს, საღამოს 7–ის 20 წუთზე, 3 კილო და 400 გრამი, 50 სანტიმეტრი დაიბადა. სახელი მე და ჩემმა ცოლმა ერთად შევურჩიეთ. ეს ერთადერთი სახელი იყო, რომელიც ორივეს მოგვწონდა. როცა ჩვენი შვილი დაიბადა და შევხედე, მივხვდი, რომ მე არ მგავდა. ეს ძალიან გამიხარდა, ბედნიერი ვიყავი და ახლაც ბედნიერი ვარ, როცა ვუყურებ. რაც ყველაზე მთავარია, მშობიარობას თავიდან ბოლომდე დავესწარი. ვთვლი, რომ ამით ცხოვრებაში ძალიან დიდი გამოცდილება მივიღე. მანამდე მშობიარობა მარტივი მეგონა. ვფიქრობდი, ქალს შეიყვანენ, 15 წუთში ბავშვი გაჩნდება, მოგილოცავენ, შამპანური გაიხსნება–მეთქი. ამ დროს კი მშობიარობა ჯადოსნური, მაგიური პროცესი ყოფილა. რამდენიმე დღე გაოგნებული ვიყავი. თურმე ქალებს საკუთარ თავზე რამხელა ტკივილის აღება უწევთ.
სიმართლე გითხრათ, თავიდან მინდოდა, გოგო მყოლოდა, მაგრამ როცა გავიგე, რომ ბიჭი დაიბადებოდა, რა თქმა უნდა, ძალიან გამიხარდა. ისეთი შეგრძნება მაქვს, თითქოს მანამდე რაც ხდებოდა, ყველაფერი უმნიშვნელო იყო და ცხოვრება ნულიდან დავიწყე, შეხედულებები შემეცვალა. აქვე ძალიან დიდი მადლობა დავით გაგუას, რომელიც ჩემი ნათლიაა. ძალიან სიმბოლურია, რომ ნათლიაჩემმა მიიღო მშობიარობა.