სისხლისღვრით დასრულებული ოჯახური კონფლიქტი

მცხეთის რაიონში, სოფელ მუხრანში მომხდარმა ოჯახურმა ტრაგედიამ საზოგადოება შეძრა. 54 წლის გიორგი ოკინაშვილმა სანადირო თოფით მეუღლე და 21 წლის რძალი სასიკვდილოდ დაჭრა, ასევე მძიმედ დაჭრა ერთადერთი ვაჟი - შაკო. როგორც ამბობენ, ბაბუა 4 თვის შვილიშვილის მოკვლასაც აპირებდა, თუმცა პატარა ბიჭუნა ნათესავმა სამშვიდობოს გამოიყვანა. თურმე, მან იმ მამაკაცის მისამართითაც გაისროლა, რომელსაც პატარა ჩახუტებული ჰყავდა და სახლიდან გაჰყავდა. საბედნიეროდ, ისინი გადარჩნენ.

ამ ტრაგედიიდან სულ მალე გიორგი ოკინაშვილი დააკავეს. სამართალდამცავებს ბრალდებულის ჩვენება ჯერჯერობით არ გაუვრცელებიათ და არც ის არის ცნობილი, რეალურად რა მოხდა ოკინაშვილების ოჯახში, მაგრამ ფაქტია, მას უმძიმესი ბრალდებით მოუწევს სასამართლოს წინაშე წარდგომა და გამოტანილ განაჩენზე მძიმე, ალბათ, საკუთარი ოჯახის წევრების მკვლელის სახელის ტარება იქნება.

არც ის არის ცნობილი, ბრალდებული ფსიქიკურად შეურაცხადია თუ არა. ბუნებრივია, ეს საკითხიც ექსპერტიზით გაირკვევა. ჩვენ შევეცადეთ, ამ ოჯახზე გარკვეული ინფორმაცია მათი ახლობლების დახმარებით შეგვეგროვებინა. ისინი მომხდარით გაოგნებულები არიან. ტრაგედიაზე საუბარს გაურბიან ოკინაშვილების მეზობლები... დაჭრილები სასწრაფოდ საავადმყოფოში გადაიყვანეს, მაგრამ არც ბრალდებულის მეუღლის მთვარისას გადარჩენა მოხერხდა და არც მათი 21 წლის რძლის. ეკა ტეტოშვილს ზურგის არეში ორი ტყვია ჰქონდა მოხვედრილი. გოგონას მამამთილმა მაშინ ესროლა, როცა იგი გააფთრებული მოძალადისგან მიმალვას ცდილობდა. ფეხის არეშია დაჭრილი ბრალდებულის ვაჟი - შაკო, მას ოპერაცია გაუკეთდა და მის სიცოცხლეს საფრთხე აღარ ემუქრება.

მკვლელობის მოტივად ურთიერთშელაპარაკება სახელდება. გავრცელებული ინფორმაციით, კონფლიქტი ცოლ-ქმარს შორის მოხდა, შემდეგ კი მამაკაცმა ჯერ მეუღლე მოკლა, მერე სროლის ხმაზე ოთახიდან გამოსულ შვილსა და რძალს ესროლა. ამ ვერსიისგან განსხვავებულია შვილის მონათხრობი: შაკო ოკინაშვილის მტკიცებით, მთვრალი მამა მას წაეკამათა და პირველად მას ესროლა, შემდეგ კი ხმაურზე მათთან მისული რძალი და ცოლიც არ დაინდო.

ოკინაშვილების ოჯახში მუდმივად კონფლიქტური სიტუაცია ყოფილა. თურმე, ხან მამა-შვილი ჩხუბობდა, ხან დედა-შვილი, ხან რძალ-დედამთილს შორის იყო უსიამოვნება. სამწუხაროდ, ერთ-ერთი ასეთი ჩხუბი ტრაგედიით დასრულდა.

მერაბ ბაბუაშვილი, სოფელ მუხრანის თემის რწმუნებული:
- ოკინაშვილები ჩვენს სოფელში ცხოვრობენ. არაფერი მსმენია მათ ოჯახში არსებულ კონფლიქტზე. ბრალდებულსაც არ ჰქონია ფსიქიკური პრობლემები და ნამდვილად არ ვიცი, რატომ ჩაიდინა ასეთი დანაშაული. პატიოსანი მეუღლე ჰყავდა, სულ შრომობდა. რძალიც კარგი შემოიყვანეს, ისიც მშრომელი გოგო იყო. ოჯახში პატარ-პატარა კონფლიქტი ჰქონდათ, მაგრამ სერიოზულ დაპირისპირებაზე ადრე არაფერი გვსმენია. ვინ წარმოიდგენდა, ასეთი ტრაგედია თუ დატრიალდებოდა. თითქმის ყველა მეზობელს გავესაუბრე და ყველა თავს იკავებს ლაპარაკისგან. გაოგნებულები ვართ მომხდარით. ვფიქრობ, გიორგის ფსიქიკური მდგომარეობაც გასარკვევია. არ ვიცოდი, ადრე ნასამართლევი თუ იყო... ტრაგედია გამთენიისას მოხდა. ალბათ ჩვენებას მისცემს ბრალდებულის ბიჭი და სიმართლე გაირკვევა.

- გიორგი ოკინაშვილი რას საქმიანობდა?
- მას საქონლის ფერმა ჰქონდა და იქ მუშაობდა მამა-შვილი.

შაკო ოკინაშვილი ისევ საავადმ­ყო­ფოში იმყოფება, დედამისი სოფელ მუხრანში, სახლში დაასვენეს, ხოლო რაც შეეხება 21 წლის ეკა ტეტოშვილს, გოგონა ოჯახმა მშობლიურ სოფელში, ყვარლის რაიონის სოფელ ენისელში ჩაასვენეს.

ამ საშინელი ტრაგედიის შესახებ პირველად ეკას მამამ შეიტყო. ეკას დედა და ძმები სამუშაოდ უცხოეთში იყვნენ წასულები და იქიდან სასწრაფოდ ჩამოფრინდნენ. მომხდარ ტრაგედიაზე საუბარი უჭირთ.

ეკა ტეტოშვილი და შაკო ოკინაშვილი თურმე, ერთი წლის წინ დაქორწინდნენ. წყვილმა ოჯახი სიყვარულით შექმნა. მათი პატარა შვიდთვიანი დაიბადა.

დავით ექიზაშვილი, გარდაცვ­ლილი გოგონას ბიძა:
- აპრილში ეკა 22 წლის გახდებოდა, მაგრამ არ დასცალდა. ძალიან კარგი გოგო იყო - შრომისმოყვარე, მოსიყვარულე... მიჭირს მასზე წარსულში ლაპარაკი. რეალურად რა მოხდა, არ ვიცით. ზუსტი ინფორმაცია ჩვენთვისაც უცნობია. მხოლოდ ის ვიცით, რომ მამა-შვილს შორის კონფლიქტი ხშირად იყო. ყველაფერი გამთენიისას მოხდა. თურმე, მკვლელი სახლში ცხენით დაბრუნებულა. ფერმაში ყოფილა. მხარზე სანადირო თოფი ჰქონია გადაკიდებული. შაკო ამბობს, მთვრალი იყოო. იმ დღეს მათ შორის მორიგი კონფლიქტი მომხდარა. მერე მამამ ჯერ შვილს ესროლა, შემდეგ - ეკას. შაკო ამბობს, გასროლის ხმაზე ეკა საძინებელი ოთახიდან პერანგის ამარა გამოვარდა. მას ვუთხარი: ჩქარა, გაიქეცი, თავს უშველე-მეთქი, მაგრამ ეკამ გაქცევა ვერ მოასწრო, ზურგში ორი ტყვია დაახალაო. ამის მერე ცოლიც სასიკვდილოდ დაჭრა. პატარა ბავშვის მოკვლაც უნდოდა, მაგრამ ახლობელმა ბიჭმა გადაარჩინა.

- თუ იცით, რა გახდა კონფლიქტის მიზეზი?
- ამის შესახებ ნამდვილად არაფერი ვიცი. ეკა ოჯახში არსებულ კონფლიქტზე ხმამაღლა არ საუბრობდა, მაგრამ ახლა ირკვევა, რომ ეს პატარა გოგო ბევრ რამეს მალავდა. თურმე, ერთ-ერთი ახლობლისთვის ისიც უთქვამს: იქიდან გამოპარვის მეშინია. ვიცი, მომკლავენო. ეს ჩვენ რომ გვცოდნოდა, სხვანაირად ვიმოქმედებდით. ირკვევა, ეკასაც ჰქონდა კონფლიქტი მამამთილთან და დედამთილთან, თუმცა რა საკითხზე, უცნობია... ეკა სიყვარულით გათხოვდა. შაკოს ისე გაჰყვა, მისი არც სახელი ვიცოდი და არც - გვარი. როცა გავიგე, რომ შეყვარებული იყო, ვთხოვე, მისი ვინაობა ეთქვა. გავიკითხავ, ვინ არიან-მეთქი, მაგრამ გამიბრაზდა. წელიწადი გავიდა მას მერე, რაც გათხოვდა, მაგრამ ჩვენ, ნათესავები მის ოჯახში არ ვყოფილვართ და არც მისი ოჯახის წევრებს ვიცნობდით. ეკას მამა სულ რამდენჯერმე იყო იქ მისული. ქორწილი არ ჰქონიათ. ადრე რომ მცოდნოდა, ვის მიჰყვებოდა, აუცილებლად დავუშლიდი...

- რატომ?
- შემდეგ გავიგე, რომ შაკო პირველ მეუღლესთან გაცილებული იყო და მასთან გოგონაც ჰყავდა. ამ 25 წლის ბიჭმა უკვე ყველაფერი მოასწრო. წარმოიდგინეთ, არ ვიცით, რეალურად რა ხდებოდა იმ სახლში. ვნახოთ, შაკო რას იტყვის. დაურეკავს და უთქვამს: ექიმები საავადმყოფოდან გაწერაზე უარს მეუბნებიან, მაგრამ გამოპარვაც რომ დამჭირდეს, ეკას დაკრძალვაზე მაინც მოვალო. ვნახოთ, რას იტყვის... ეკა დედამისსაც უმალავდა, რომ დიდი პრობლემები ჰქონდა. საერთოდ, იმ ოჯახში თურმე, გამუდმებით კონფლიქტური სიტუაცია იყო მამა-შვილს შორის. ეს ერთადერთი შვილი ჰყავდა და ასე რატომ იყვნენ გადაკიდებული, ვერ ვხვდებით. საშინელ დღეში ვართ, ძალიან გვტკივა. მის მშობლებს ლაპარაკის ძალაც არ აქვთ. თქვენ არ იცით, როგორი საყვარელი გოგო დავკარგეთ. ფარმაცევტული ფაკულტეტი დაამთავრა, სტაჟირებაზე დადიოდა და სწორედ ამ დროს გათხოვდა. ეკას პატარა ჩვენთან არის, ალბათ აქ გაიზრდება.

- ხომ არ იცით, შაკო პირველ ცოლს რატომ გაშორდა?
- არაფერი ვიცი. სოფელში უთქვამთ, - იმ გოგომ დროზე დააღწია თავი ამ ოჯახსო. მკვლელი ნასამართლევიც ყოფილა. ეკა რომ მათი რძალი გახდა, მაშინ გამოვიდა ციხიდან.

სოფელ ენისელის რწმუნებული - გია გოგიაშვილი ეკა ტეტოშვილის ოჯახს დადებითად ახასიათებს:
- მომხდარით მთელი სოფელი შოკირებულია. ეკა უწესიერეს ოჯახში გაიზარდა. გოგონას დედა სამუშაოდ თურქეთში იყო წასული, ძმები კი ესპანეთში. სახლში მხოლოდ ეკას მამა ცხოვრობდა და ის უძღვებოდა ოჯახის მეურნეობას. როგორც ჩანს, გოგონა მამას რაღაცებს არ უყვებოდა. ძალიან მშრომელი ხალხია. საშინელ დღეში არიან. არ მესმის, რატომ გაიმეტეს გოგონა სასიკვდილოდ და რატომ დააობლეს პატარა?!

ეკა ტეტოშვილის ცხედარს უამრავი ადამიანი დასტირის და წარსულ დროში მასზე ლაპარაკი ყველას უჭირს. მეზობელი ქალბატონი - რიმა თვალცრემლიანი საუბრობს ეკაზე. ამბობს, რომ იგი მის თვალწინ გაიზარდა და მისი შვილების მეგობარი იყო.

რიმა:
- ეკა ძალიან მშრომელი, კეთილი, ლამაზი გოგონა იყო. მასზე ლაპარაკი აღარ შემიძლია, გული მტკივა. მისი მშობლებიც განადგურებულები არიან. ახლა ირკვევა, რომ მას ოჯახში პრობლემები ჰქონდა. საწყალი დედამისი მოთქვამს, - ნეტავ წამომეყვანეო. ეტყობა, იმ სახლში ბედნიერი არ იყო. ოჯახის წევრებისთვის უთქვამს: ჩემს ქმარს ძალიან ვუყვარვარ, მეც მიყვარს, მაგრამ იქ ცხოვრება გაუსაძლისიაო. ეტყობა, ყველაფერს სიყვარულის გამო ითმენდა, მაგრამ ასეთ საშინელებას ვინ წარმოიდგენდა? დედამთილთან კონფლიქტი ჰქონია. დედამისი მოთქვამს, - მიზეზს ვეძებდი ჩემი შვილი იქიდან წამომეყვანაო. რა ექნა, შვილი ეუბნებოდა თურმე, ოჯახს ვერ დავანგრევ, მიყვარს ჩემი ქმარიო. არ ვიცი, მშობლები ამხელა ტკივილს როგორ გადაიტანენ. გამწარებულები და განადგურებულები არიან. მთელი სოფელი დამნაშავის უმკაცრესად დასჯას ითხოვს.

მომხდარით შოკირებულები არიან ეკა ტეტოშვილის ნათესავები. ეკას დეიდაშვილის - მარიამის თქმით, ამ ტრაგედიამდე 5 დღით ადრე, ეკას დეიდაშვილის მეუღლისთვის "სკაიპში" მიუწერია, რომ ოჯახში სიტუაცია ძალიან დაეძაბა, მაგრამ რას გულისხმობდა ამაში, არ დაუკონკრეტებია.

მარიამი:
- ეკა ერთი პერიოდი თბილისში ჩემთან ერთად ცხოვრობდა. ძალიან ნიჭიერი, თბილი, კეთილი გოგო იყო. მან "ბიბლუსში" დაიწყო მუშაობა. დამთავრებული ჰქონდა ფარმაცევტული ფაკულტეტი. გვინდოდა, სწავლა გაეგრძელებინა, მაგრამ გამოგვიცხადა, რომ შეყვარებული იყო. სურდა, ოჯახი შეექმნა და შვილები გაეზარდა. მომავალი მეუღლე ინტერნეტით გაიცნო და ხშირად საუბრობდნენ "სკაიპით". როცა გავიგეთ, შაკო ცოლს გაცილებული იყო, მთელი სანათესავო ამ ქორწინების წინააღმდეგი ვიყავით, მაგრამ მან მაინც გადადგა ეს ნაბიჯი. მის სახლში ერთხელაც არ ვარ ნამყოფი. შვილი რომ შეეძინა, დავურეკე და მივულოცე. ბედნიერი ჩანდა... როგორც ჩანს, შაკო ეჭვიანი იყო, - როცა ეკას ვურეკავდით, აუცილებლად გამოიკითხავდა, ვის ესაუბრებოდა მისი ცოლი... დედამთილთანაც დაძაბული ურთიერთობა ჰქონია. ის ქალი თურმე შვილზე ფანატიკურად იყო შეყვარებული და რძალზე ეჭვიანობდა. იმ დღეს რა მოხდა, არ ვიცით, გამოძიების შედეგებს ველოდებით. როგორც ამბობენ, დანაშაული გამთენიისას, 6 საათზე მოხდა და როცა ეკა მცხეთის საავადმყოფოში გადაიყვანეს, ჯერ კიდევ ცოცხალი იყო. საავადმყოფოში მიყვანიდან 45 წუთში გარდაიცვალა. მისი სიკვდილი 10 საათზეა დაფიქსირებული... საინტერესოა, ამ დრომდე რატომ არ გადაიყვანეს ეკა საავადმყოფოში?

P.S. ჩვენი ინფორმაციით, ექიზაშვილები განცალკევებით ცხოვრობდნენ, ვენახების ტერიტორიაზე და სავა­რაუდოდ, ოჯახის წევრების ჩხუბს მეზობლები ვერ გაიგებდნენ. მკვლელის მეუღლე - მთვარისა სოფელ ძალისიდან იყო. ცოლ-ქმარს ერთი ვაჟი 4 წლის ასაკში გარდასცვლია. მომხდარი ტრაგედიის შემდეგ მთვარისას ძმას გადაუწყვეტია, ის მშობლიურ სოფელში წაესვენებინა, მაგრამ ამის უფლება შვილს, შაკოს არ მიუცია.

საქმეზე გამოძიება გრძელდება. იმედია, სამართალდამცავები ტრაგედიის რეალურ მიზეზს გაარკვევენ.

თეა ხურცილავა
ჟურნალი ”გზა”