ბორის ბედია: "ჩემს დას, სოფო ბედიას და მიშა მესხს ერთმანეთი უყვართ, მაგრამ ჯერ დაქორწინებას არ აპირებენ"

მომღერალი ბორის ბედია ცხოვრების ერთგულ თანამგზავრს კი ეძებს, მაგრამ თავად ერთგულება, მაქსიმუმი, ერთი თვე თუ გამოსდის, გოგონებს მალ–მალე შორდება. ელის იმ ერთადერთს, ვისთანაც არასოდეს მოიწყენს და სიცოცხლის ბოლომდე ერთად იქნებიან. მისი რჩეული თავიდანვე უნდა შეეგუოს, რომ მათ ოჯახში გენდერულ ბალანსზე ლაპარაკიც კი არასდროს იქნება, რადგან ბორისისთვის ეს მიუღებელია. მას არც ჭკუით სავსე და ლიდერი ქალები ხიბლავენ.
რამდენიმე დღის წინ ბორის ბედიას "ფეისბუქის" გვერდზე ვინმე თამარელა ქაჩიბაიასთან ერთად გადაღებული ფოტოები გავრცელდა, რომელსაც "ჩემი ქალი" ეწერა. ამას კი საინტერესო გაგრძელება მოჰყვა, რაზეც მომღერალი თავად გვიამბობს.

– ბორის, თქვენი "ფეისბუქის" გვერდზე ვინმე თამარელასთან ერთად გადაღებული ფოტოები გამოჩნდა. იქვე წერია, რომ ის თქვენი ქალია. მერე ამას იმ გოგონას მხრიდან უარმყოფელი კომენტარი მოჰყვა. რა ხდება სინამდვილეში?
– მე და თამარელა ძალიან კარგი მეგობრები ვიყავით. ერთმანეთი საქართველოში გავიცანით, მაგრამ კონკრეტულად სად, ეს ნამდვილად არ მახსოვს. ძირითადად რუსეთში, უკრაინასა და ბელორუსიაში ვარ. თუ ვინმე გოგოსთან ერთად სადმე გამოვჩნდები, სხვას ყოველთვის ასე ვაცნობ: "მაია დევუშკა", ოღონდ არა – ცუდი გაგებით, ქართველებს კი ეს სხვანაირად ესმით. ერთ–ერთ ჟურნალს უკრაინიდან სატელეფონო ინტერვიუ მივეცი, სადაც დაიწერა, რომ თამარელასთან რვათვიანი ურთიერთობა მაკავშირებდა, არადა ეს ადამიანი უბრალოდ რვა თვის წინ გავიცანი. მის მიმართ ალბათ სიმპათიაც მქონდა, მაგრამ ჩვენ შორის არაფერი ხდებოდა, მხოლოდ ვმეგობრობდით. მასთან სხვა ურთიერთობა რომ მქონოდა, არ დავმალავდი. ჩემი "ფეისბუქის" გვერდზე ისეთი ფოტოები დაიდო, თამარელა ყველას ჩემი ცოლი ეგონა.
– ეს აჟიოტაჟი არც თამარელამ დატოვა უპასუხოდ...
– ამის გამო ერთი ამბავი რომ ატყდა, მერე თავადაც გააკეთა კომენტარი და აღნიშნა, რომ ჩემი ქალი არ იყო. ჩემი აზრით, ასე არ უნდა მოქცეულიყო, მაგრამ რას ვიზამთ? მაინც საქართველოში ვცხოვრობთ. ამით მე არ მიგრძვნია თავი დამცირებულად, თვითონ დაიმცირა თავი.
რადგან ამ ამბავმა საზოგადოებაში ასეთი ინტერესი გამოიწვია, სიმართლეს ვიტყვი: ერთ–ერთ საღამოზე ერთად ვიყავით. ცოტა ნასვამიც გახლდით. ღმერთია მოწმე, რომ თამარელამ ჩემი "ფეისბუქის" პაროლი თვითონ მთხოვა, ჩვენი ფოტოებიც თავადვე დადო და მთავარ ფოტოდაც თავად დააყენა. მე ნამდვილად არ გამოვაქვეყნებდი ამ ფოტოებს.
– ასე ენდობოდით თამარელას, რომ თქვენი "ფეისბუქის" პაროლი გაუმხილეთ?
– მას შემდეგ, რაც ჩემი "ფეისბუქის" გვერდზე ჩვენი ფოტოები დადო, მიუხედავად იმისა, რომ ძალიან ახლო ურთიერთობა გვქონდა, პაროლი მაშინვე გამოვცვალე. წესით, მისთვის ჩემი სოციალური გვერდის პაროლი არ უნდა გამემხილა, ალბათ შევცდი. ეს სიტყვები სულაც არ ნიშნავს იმას, რომ მე ამ ადამიანის მიმართ პატივისცემა აღარ მაქვს. თამარელა მოყვარულის დონეზე ძალიან კარგად მღერის და ერთადაც გვიმღერია. მინდა, დიდი ბედნიერება ვუსურვო!
– ერთი პერიოდი უკრაინელ გოგოსთანაც გქონდათ ურთიერთობა, მაშინ ამბობდით, რომ მასთან სერიოზული გრძნობა გაკავშირებდათ. რატომ დაშორდით?
– რუსეთშიც და უკრაინაშიც ძალიან ბევრ გოგოსთან მქონდა ურთიერთობა. არ მინდა, ვინმემ ცუდად გამიგოს, მაგრამ იცით, რა მახასიათებს? გერლფრენდთან ჩემი ურთიერთობა, მაქსიმუმი, ერთ თვეს თუ გასტანს ხოლმე, მაგრამ ცუდად არც ერთ ქალს დავშორებივარ. ჩემს ცხოვრებაში ვიღაც ერთადერთი რომ ყოფილიყო, მეყვარებოდა და ახლა ალბათ შვილებიც გვეყოლებოდა.
– რატომ აგვიანებთ დაოჯახებას?
– იმიტომ, რომ ყოველთვის ძიებაში ვარ, ყოველთვის სიყვარულს ვეძებ. ალბათ ჩემი დრო ჯერ არ არის და როცა არ ველოდები, ბედნიერებაც მაშინ დამეცემა თავს. ღმერთმა ერთი წამით არ მაცოცხლოს ამ მოლოდინის გარეშე.

– როგორი ქალები იმსახურებენ თქვენთან თუნდაც ერთთვიან რომანს?
– ქალი მზეთუნახავი თუ არ იქნება, სიმპათიური და ეშხიანი მაინც ხომ უნდა იყოს? შავგვრემანი ქალიც მომწონებია, ქერაც და ჩინელიც. ძალიან ჭკვიანი და ფილოსოფოსი ქალები ჩემთვის მოსაბეზრებლები არიან. ქალი შეიძლება ძალიან ჭკვიანიც იყოს და თავი ცოტა სულელად მოგაჩვენოს. ქალებთან ურთიერთობის იმხელა გამოცდილება მაქვს უკვე, რომ კარგად ვხვდები, როცა ქალი თავს ისულელებს, მაგრამ მაინც მომწონს, მით უმეტეს, თუ კარგად გამოსდის, რადგან ვიცი, ამას რის გამო აკეთებს. ქალს ბოლომდე ვერავინ ამოხსნის, მაგრამ მისი ფიქრების 100%–დან 30%–ს მაინც გამოვიცნობ. ჭკვიანმა ქალმა იცის, რომ თავისი დიდი სიბრძნით შეიძლება კაცი დააშინოს. ასეთი ქალები ძალიან პრინციპულები და ამასთანავე მამაკაცურებიც არიან, რაც შეიძლება ბევრი კაცისთვის არ იყოს მოსაწონი.
ამას წინათ ერთ–ერთ გერლფრენდთან ერთად სუფრასთან ვიჯექი, ვსაუბრობდი და სიტყვაში რამდენჯერმე ჩამეჭრა. რამდენჯერმე მივეცი შენიშვნა და ისევ იგივე რომ გაიმეორა, უკვე ხმამაღლა ვუთხარი და იქაურობაც დატოვა. ჩემგან შორს ისეთი ქალი, რომელსაც ლიდერის თვისებები აქვს! გენდერული თანასწორობის დიდი წინააღმდეგი ვარ. ეს ხომ საერთოდ დეგენერატის მოგონილია!
– ამ სიტყვების შემდეგ თქვენთან ურთიერთობას ბევრი ქალი მოერიდება.
– კაცი, რომელიც იტყვის, გენდერული თანასწორობის მომხრე ვარო, ჩემგან ერთ ადგილას დიდ პანღურს მიიღებს. ამის მთქმელი კაცი უკვე ჩვარია! ნამდვილი ოჯახი გენდერულ თანასწორობაზე კი არა, ნდობასა და სიყვარულზე უნდა იყოს დამყარებული. კაცი რომ გქვია და ძლიერი სქესი ხარ, ოჯახში წამყვანი ფიგურა უნდა იყო. იმას არ ვამბობ, რომ ვინმემ ცოლი მონად უნდა გაიხადოს, მაგრამ ცოლს ქმრის რიდი უნდა ჰქონდეს, ქმარი კი ცოლისადმი დიდი პატივისცემით უნდა იყოს განმსჭვალული, არც ყურადღება მოაკლოს და არც ყვავილები. ესეც იმისათვის, რომ ქმრის ერთგული იყოს სიცოცხლის ბოლომდე.
– თქვენ როგორ გამოხატავთ ქალისადმი პატივისცემას?
– ხელოვანი ადამიანი ვარ და ეს გამიჭირდება? ღმერთმა სიმღერის ნიჭი მომცა. ქალს ხან ვუმღერებ და ხანაც ყვავილებს ვაჩუქებ. როცა ქალს უკვე სერიოზულად შევხედავ, ძალიან მინდა, მას ისეთი შევუყვარდე, როგორიც შინაგანად ვარ და არა – როგორც მომღერალი.
– საკუთარი თავის დახასიათება ალბათ არ გაგიჭირდებათ და გვითხარით, როგორი ხართ.
– მე ვარ ადამიანი, რომელიც ნიღბის გარეშე ცხოვრობს. იმის გამო, რომ ძალიან ალალი ვარ, ზოგს იოლად სამართავი ვგონივარ, მაგრამ იმხელა ცხოვრებისეული გამოცდილება მივიღე, ასე ნამდვილად არ არის. 21 წლის ვიყავი, როცა ერთი გოგო ძალიან მიყვარდა. მასთან დაშორება ძალიან განვიცადე, რადგან ის გულწრფელი და ნაღდი სიყვარული იყო. უბრალოდ ის გოგო ჩემი ბედი არ იყო და ამიტომაც დავშორდით ერთმანეთს, მაგრამ, იცით, რაშია საქმე? არ შეიძლება, იმ ადამიანის ბედნიერება არ გაგიხარდეს, რომელიც გიყვარს ან თუნდაც გიყვარდა. დღეს ის გოგო გათხოვილია, შვილებიც ჰყავს და ბედნიერიცაა, რაც მეც ძალიან მახარებს. როცა შეყვარებული ვიყავი, ჩემნაირი ბედნიერი ადამიანი არ არსებობდა. ყველაფერს ვაკეთებდი მისთვის, დავფრინავდი!
– რა ჩაგიდენიათ მისი გულის გასახარად?
– რა აღარ! ჩემგან შორს ცხოვრობდა. დამირეკავს და ტელეფონით მთელი ჩემი კონცერტი მომისმენინებია! ეს მეც დიდ ბედნიერებას მანიჭებდა და დარწმუნებული ვარ, მასაც მოსწონდა.
– გქონიათ ისეთ გოგოსთან ურთიერთობა, შემდეგ რომ გინანიათ?
– ალბათ უფრო ქართველ ქალებთან ურთიერთობა მინანია. ჩემი ცოლისთვის პირველი მამაკაცი უნდა ვიყო და იცით, რატომ? ყოველთვის შემჭამს იმაზე ფიქრი, რომ ჩემამდე მასთან ნოდარი, შალიკო ან მურთაზი იყო. ამ შემთხვევაში ქართული ტრადიციების მომხრე ვარ. იმ ერთს ველოდები, რომელიც ალბათ ძალიან მალე მოვა.
ცოტა თავისუფალი ადამიანი ვარ და თავისუფალი ურთიერთობა მომწონს. კარგია, როცა ქალს თავისი მეობა გააჩნია, მაგრამ ეს ყველაფერი კომპლექსში არ უნდა გადასდიოდეთ. უკრაინელი და რუსი ქალი ურთიერთობას არასოდეს დაგამადლის. ქართველ გოგოს, რა წარსულიც უნდა ჰქონდეს, ყველას ერთი ამბიცია აწუხებს, ოფიციალურად გათხოვება უნდათ. ერთი კვირაა, გიცნობ და უკვე ცოლობას მთხოვ?! ასე როგორ შეიძლება! წყვილმა ჯერ ერთად უნდა იცხოვროს და მერე იქორწინოს. ამდენი ოჯახი რატომ ინგრევა, არავინ ფიქრობს? ზოგი ხასიათით ვერ ეწყობა ერთმანეთს და ზოგიც სექსში. სიყვარული აღარ არსებობს, ხალხი მატერიალისტი გახდა, რაზეც ძალიან მწყდება გული. ქართველ გოგოსთან ურთიერთობა შარია! ქართველი ქალი კარგი არტისტული მონაცემებითაა დაჯილდოებული. შეუძლიათ თეატრალურ უნივერსიტეტში გამოცდების გარეშე ჩააბარონ.
– ქართველ ქალებზე ასე რატომ ფიქრობთ, ხშირად გატყუებენ?
– ვინც მე მომატყუა, საკუთარი თავი მოიტყუა. როცა ქალს ჩემი მოტყუება დაუპირებია, ღმერთმა მაპატიოს, მისთვის ამ საქციელის საპასუხოდ რეებიც გამიკეთებია, აქ დასაწერი ნამდვილად არ არის. ქალი ტყუილისთვის გამინადგურებია! ამის პატიება არ შემიძლია. არტისტობისთვის არაერთი ქალი მიმიტოვებია. მანდილოსანში ყველაზე მეტად ერთგულებასა და ნამუსს ვაფასებ. საკუთარი თავისადმი პატივისცემა ყველა ქალმა უნდა იცოდეს და თუ კაცთან ცხოვრებას გადაწყვეტს, სიცოცხლის ბოლომდე უნდა უერთგულოს, რა თქმა უნდა, თუ ცუდი ქმარი არ შეხვდა და რაღაც სასწაული არ მოხდა.
ჩემი მომავალი მეუღლე კარგი ოჯახის შვილი უნდა იყოს, რადგან მეც ასეთი ოჯახიდან ვარ. ამის მაგალითი დედაჩემი და მამაჩემი არიან.
– თქვენი დის, სოფო ბედიას ოჯახში ეს პრინციპები დაცული არ იყო და იმიტომ დაინგრა?
– არ არის კარგი ოჯახის დანგრევა, მაგრამ რას ვიზამთ? სოფომ ასეთი არჩევანი გააკეთა. ალბათ სერიოზული მიზეზი ჰქონდათ. ასე რომ არ ყოფილიყო, ჩემი და არავითარ შემთხვევაში ოჯახს არ დაანგრევდა. მხოლოდ ის გავაკეთე, რომ სოფოს ვურჩიე, კარგად დაფიქრებულიყო, მაგრამ დაშორება უკვე მტკიცედ ჰქონდა გადაწყვეტილი. დედას გეფიცებით, მათ შორის რა მოხდა, დეტალებში არაფერი ვიცი.
რთულია, როცა კარგად შეკრული ოჯახი ინგრევა. მათ პირად ცხოვრებაში არასოდეს ვერეოდი, არ იყო ჩემი საქმე. როცა სოფო ქმარს გაშორდა, უკრაინაში ვიყავი. ეს ამბავი დედამ შემატყობინა და ვერ გადმოგცემთ, რა დამემართა. მეგონა, სადღაც ჩავვარდი.
– სულ ცოტა ხნის წინ სოფოსა და ყოფილი პოლიტპატიმრის, ამჟამად უფლებადამცველ მიშა მესხის რომანის შესახებ გახდა ცნობილი. ეს ადამიანი ხომ არ იყო თქვენი დის ოჯახის დანგრევის მიზეზი?
– სოფოს სიყვარულს მივესალმები, მაგრამ მისი ოჯახის დანგრევაში მესამე პირი რომ არაფერ შუაშია, ამაზე თავს დავდებ. მიშას ალბათ ერთი თვეა, რაც ვიცნობ. ძალიან კარგი, თავმდაბალი, სიცოცხლით სავსე და მეგობრული ადამიანია. ქეიფშიც, ძმობაშიც და მეგობრობაშიც გადასარევი პიროვნებაა. სოფო და მიშა დაქორწინებას ჯერ არ აპირებენ, უბრალოდ ერთმანეთი მოსწონთ და უყვართ.
სოფიო ბოჭორიძე, ჟურნალი სარკე