''ეს ვერასდროს წარმომედგინა, მით უმეტეს, ჩემს ასაკში...'

''რუსთავი 2''-ის მაყურებელმა სოფო ტოროშელიძე ''ვარსკვლავების აკადემიიდან'' გაიცნო. შემდეგ იყო ''ელდრაინი'', ''ევროვიზია'', ''ემ-ტი-ვის'' ბათუმური შოუ, ''საქართველოს ვარსკვლავის'' მუსიკალური პროდიუსერობა. დღეს, 23 წლის ასაკში, ''რუსთავი 2''-ის მუსიკალური პროდიუსერია. ამჟამად ახალი პროექტ ''X ფატორით'' არის დაკავებული. პროექტის შიდაშესარჩევ ტურებზე, უცნაურ მონაწილეებზე, კარიერასა და პირადზე დღეს მუსიკოსი ჩვენთან საუბრობს.

- სოფო, საზოგადოებამ ''ვარსკვლავების აკადემიიდან'' გაგიცნო. რა იყო მანამდე?
- ორი წლისას უკვე მუსიკალური სმენა აღმომაჩნდა. ''მოამბის'' მუსიკა წავიმღერე თურმე ერთი ერთში და ოჯახი დატრიალდა (იცინის). თუკი რაიმე მუსიკალური წრე არსებობდა, ყველგან შემიყვანეს. 3 წლის უკვე ორი ხელით ვარჩევდი სიმღერებს ფორტეპიანოზე. ვიყავი ''ბასტი-ბუბუში'', ''მზიურის'' მეექვსე თაობის წევრი. დავამთავრე ზაქარია ფალიაშვილის სახელობის მუსიკალური სასწავლებლის ათწლედი. ბოლოს მოვხვდი კონსერვატორიაში საგუნდო-სადირიჟორო ფაკულტეტზე. დედა მღერის და თვითონაც აპირებდა მუსიკოსობას. ალბათ, ამიტომაც ჩაერთო ასე აქტიურად ჩემს მუსიკალურ განათლებაში.
- სხვა ინტერესები არ გქონია?
- მუსიკის გარდა არაფერი ვიცი. ვხატავდი, მაგრამ ახლა რომ ვუკვირდები, არ მეხერხება. ლექსებსაც ვწერდი, მაგრამ ესეც ასაკის ბრალი იყო... მუსიკოსი რომ არა, ალბათ, მეცნიერი ვიქნებოდი. ბებია და ბაბუა ასტრონომები იყვნენ, სახლიც გვაქვს აბასთუმანში, ობსერვატორიასთან ახლოს. სულ ტელესკოპის წინ ვტრიალებდი. მამა - ფიზიკოსია. მისტიკური რაღაცები მაინტერესებს.
- ''ვარსკვლავების აკადემია'' როგორ გახსენდება?
- მაშინ სტუდენტი ვიყავი. ვიფიქრე, ფართო აუდიტორიის წინაშე წარსადგომად მზად ვარ-მეთქი.
- რეალური შოუ, თანაც მუსიკალური, ქართული ტელესივრცისთვის ახალი იყო.
- რეალური შოუ რატომღაც ''ჯეობართან'' ასოცირდებოდა, მაგრამ ეს მთლიანად მუსიკალური პროექტი იყო, ამიტომაც მივიღე გადაწყვეტილება, ამ შანსზე უარი არ მეთქვა. მიუხედავად იმისა, რომ გასაგები მიზეზების გამო პროექტი შეწყდა, დიდი გამოცდილება მომცა და წარმატება მომიტანა. სწორედ ამის შემდეგ დაიწყო ჩემი კარიერის აღმასვლა. შევიძინე მეგობრები, რომლებთან ერთად ვარ დღემდე. ამ პროექტის შემდეგ დამირეკეს და მითხრეს, რომ ''ელდრაინში'' სოლისტად მიწვევდნენ. ჩემი ''ევროვიზიასთან'' შეხება ბავშვების ''ევროვიზიით'' დაიწყო, როცა ამ შოუში ''პრინცესები'' გადიოდნენ. მათი პედაგოგი ვიყავი. მაშინ ვნახე, თურმე რამხელა მასშტაბებია და რა ხდება საქართველოს ფარგლებს გარეთ. მეორედ სოფო ნიჟარაძეს ბექვოკალისტად გავყევი და შემდეგ უკვე ''ელდრაინის'' სახელით გამოვედი. მესამედ უკვე, ფაქტობრივად, სახლში ჩავედი. იმ ''ევროვიზიის'' შემდეგ დღემდე გვაქვს მიწვევები ევროპის სხვადასხვა ქვეყნიდან, მაგრამ ამ ყველაფერს ფინანსებიც სჭირდება. უარის თქმა გვიწევს. ''ევროვიაზიას'' მოჰყვა ''ემ-ტი-ვი''.
- დღეს რას აკეთებ?
- ''რუსთავი 2''-ის მუსიკალური ხელმძღვანელი ვარ, რაც ვერასდროს წარმომედგინა, მით უმეტეს, ჩემს ასაკში. ეჭვები მაწუხებდა. ''საქართველოს ვარსკვლავის'' ნახევარფინალი იყო, როცა გიორგი ხაბურზანიამ დამირეკა და ამ პროექტში პედაგოგად მომიყვანა. ლუკა ზაქარიაძესთან ერთად მომიხდა მუშაობა. ალბათ, კარგი თვისებები გამოვამჟღავნე. მეორე სეზონზე უკვე პროექტის მუსიკალური ხელმძღვანელობა შემომთავაზეს. მასზე მუშაობით დიდი სიამოვნება მივიღე. ყველა მისი ტურით ვამაყობ, ეს იყო ახალი სტანდარტი ქართულ მუსიკალურ კონკურსებში. მერე უკვე არხის მუსიკალური ხელმძღვანელი გავხდი. პარალელურად ''რუსთავი 2''-თან ერთად გავხსენით სტუდია, სადაც თინეიჯერები დადიან.
- ამ კლუბისთვის ბიძინა ივანიშვილს ფართს სთხოვდი ''ფეისბუქით''...
- (იცინის) არა, ძალიან კარგი ფართი გვაქვს, ვიხუმრე, იქნებ, მეც მაჩუქოთ-მეთქი.
- ახლა ''X ფაქტორზე'' მუშაობ, როგორი კონტინგენტი მოვიდა შიდაშესარჩევ ტურზე?
- ჯერ მხოლოდ თბილისის კასტინგი ჩავატარეთ. ორ დღეში 600 მსურველი მოვიდა და ოთხ დღეზე გადავანაწილეთ. წინ გვაქვს რეგიონები და დიდი შრომა. ჩვენსავე თავს უნდა ვაჯობოთ, ''ვარსკვლავების აკადემიაზე'' უკეთესი შედეგი უნდა დავდოთ.
- მოგვიყევი ცოტა რამ ამ პროექტზე, ''ჯეოსტარის'' მსგავსად მაყურებელი ნახავს შიდაშესარჩევ ტურებს, კურიოზებს?
- ამ პროექტის პირველი ეტაპი არის სწორედ გადაცემები, რომლებშიც იქნება კასტინგები. შესაბამისად, ნახავთ უცნაურსაც და კურიოზულ გამომსვლელებსაც.
- განსაკუთრებით რომელიმე თუ დაგამახსოვრდა?
- იყო გოგონა, რომელიც ძალიან უცნაურ რაღაცებს ამბობდა, არც ვიცი, როგორ აგიხსნათ. შემოვიდა ბიჭი, რომელიც ვიზუალურად აბსოლუტურად სხვანაირი იყო და ისეთი ხმა ამოუშვა, სახტად დაგვტოვა. მოულოდნელობის ეფექტი ბევრი იქნება გადაცემაში. შემოვიდა გოგონა ფანდურით. გადადო ეს ფანდური და ისეთი როკი იმღერა, გაოცებული ვუყურებდით.
- ზოგადად რა ჟანრზეა გათვლილი ეს პროექტი?
- ყველანაირ ჟანრზე. იქნება გოგონების, ბიჭების, 25 წლის ზემოთ ასაკის და ჯგუფების კატეგორია. შესაბამისად, ჟანრობრივად მრავალფეროვანია. აგრეთვე დიდი მნიშვნელობა ენიჭება სცენოგრაფიას. სცენაზე მხოლოდ მომღერალი არ იდგება. მის უკან შოუ იქნება. მომღერალსაც ევალება მოძრაობა, ცეკვა.
- ქართულ სიმღერაზეც გაკეთდება აქცენტი?
- როგორ არა, ჩვენ ქართველები ვართ და ქართული სიმღერისადმი სიყვარული და პატივისცემა დავამტკიცეთ ''ვარსკვლავების აკადემიაში'', ნინო ქათამაძის, ირაკლი ჩარკვიანის ტურებით. ამას გარდა, იქნება რეალური შოუს ელემენტები. კულისებშიც დამონტაჟდება კამერები. ჟიურის თითო წევრს ეყოლება თავისი გუნდი, რომელთან ერთადაც გაივლის კონსულტაციებს. ვიღაცას გადაიყვანს შემდეგ ტურში, ვიღაცას - არა. მაყურებელი ეჩვევა მონაწილეებს, უყვარდება ისინი და ამდენად, ეს მომენტი იქნება ემოციური, დრამატული. გადაცემაში ყველაფერი მოხვდება.
- ვინ იქნებიან ჟიურის წევრები?
- ჯერჯერობით მოლაპარაკებები მიმდინარეობს. ამ პროექტში ძალიან დიდი მნიშვნელობა აქვს ჟიურის წევრებს, ამიტომ ამ საკითხს ფრთხილად ვეკიდებით. საკმარისი არ არის მხოლოდ კარგი მუსიკოსობა. უნდა იყოს ქარიზმატული.
- არაერთი მუსიკალური პროექტი ვნახეთ ბოლო დროს, როგორ შეაფასებდი თითოეულ მათგანს?
- კონკურენცია ძალიან კარგია. როცა მარტო ხარ, არ იცი, ვის გაეჯიბრო. ყველა გადაცემას ვუყურებ და მაქვს ჩემი დამოკიდებულება. კარგი პროექტებია ''ერთი ერთში'', ''ცეკვავენ ვარსკვლავები'', დავდიოდი კიდეც პროექტის ''ერთი ერთში'' კონცერტებზე. ელენე კალანდაძის მეგობარი ვარ, ვგულშემატკივრობდი, მაგრამ ფაქტია, რომ ''რუსთავი 2''-ის პროექტები მაღალ რეიტინგს დებს. იმიტომ არ ვამბობ, რომ აქ ვმუშაობ.
- როდის იწყებთ ახალ პროექტს?
- მარტში მაყურებელი უკვე ნახავს კასტინგებს, მოგვიანებით ლაივკონცერტებს.
- შენი დიპლომატი და გიტარისტი ქმარი როგორ უძლებს შენს ასეთ დღის რეჟიმს?
- დიტო დრამერიც არის უკვე და მგონი, აღარ დარჩა ინსტრუმენტი, რომელზეც არ უკრავს. დიდი წვლილი მიუძღვის, რომ მე ''ელდრაინში'' ვმღერი, რეალიზებული ვარ. თვითონაც რეალიზებულია და ამდენად, ეს პრობლემა არ აწუხებს. მონატრების გრძნობა ორივეს გვაქვს, მაგრამ იცის, სახლში რომ დავჯდე, არ ვიქნები ის, ვინც ახლა ვარ. ასეთი ვუყვარვარ.
- არც იმაზე ბრაზდება, ზოგჯერ ჭურჭლის დარეცხვა რომ უწევს და მერე ამის ამსახველ ფოტოს რომ უქვეყნებ ''ფეისბუქზე''?
- (იცინის) არა, არ ბრაზდება. ხშირად მეხმარება. ორი წელი მარტო ვცხოვრობდით. არაფრის გაკეთება არ ვიცოდი, მაგრამ ყველაფერიც ვისწავლე, რომ დამჭირდა. ახლა დიტოს ბებია ცხოვრობს ჩვენთან და ის რომ არ იყოს, არ ვიცი, რა გვეშველებოდა. უბრალოდ, ახლა დრო არ მაქვს, თორემ არ მიყვარს, რომ ამბობენ, კვერცხის შეწვაც არ ვიციო. საამაყოა, კვერცხს რომ ვერ წვავ?!
- შენთვის რა არის საამაყო?
- ჩემი ქმარი და ჩემი ოჯახი. ბავშვობაში რომ ვოცნებობდი, ასეთი სახლი, ასეთი ქმარი და ასეთი ოჯახი მინდა-მეთქი, ამისრულდა.

ნინო მჭედლიშვილი
ჟურნალი ''რეიტინგი''