კახა გულორდავას ცოლის გაუპატიურების მცდელობაში ბრალდებული პოლიციელი გოგა ანჩაბაძე დანაშაულს არ აღიარებს

ბავშვობის ორი მეგობარი, კახა გულორდავა და მისი მეჯვარე გოგა ანჩაბაძე, ერთმანეთის მოსისხლე მტრებად იქცნენ და თავიანთი უფლებების დასაცავად ცალ–ცალკე იბრძვიან. შეგახსენებთ, რომ 2013 წლის 12 ნოემბერს ზუგდიდში მეგობრებს შორის სისხლიანი გარჩევა მოხდა, რის შესახებაც "სარკე" დაწვრილებით წერდა. პატრულის თანამშრომელი გოგა ანჩაბაძე ქუჩაში მძიმე მდგომარეობაში, დასერილი, ყურმოჭრილი და შიშველი იპოვეს. მას ასე სასტიკად კახა გულორდავა გაუსწორდა ცოლის შეურაცხყოფისთვის. ანჩაბაძე გულორდავას ახალშერთული მეუღლის, ორსული ანა ძაპტაშვილის გაუპატიურების მცდელობაშია ეჭვმიტანილი. საქმის მასალების მიხედვით, ქალი გაუპატიურებას იქვე მცხოვრებმა დევნილებმა გადაარჩინეს.
ზუგდიდის რაიონულმა სასამართლომ დაცვის მხარის შუამდგომლობა ბრალდებულის, გოგა ანჩაბაძის 7 ათას ლარიანი გირაოს სანაცვლოდ გათავისუფლებაზე არ გაითვალისწინა და ის პატიმრობაში დატოვა. კახა გულორდავა პროკურატურის და სასამართლოს გადაწყვეტილების მოლოდინშია, მიუსჯიან თუ არა მას ყოფილი მეგობრის, მისი მეჯვარის სხეულის დაზიანებისთვის პატიმრობას თუ პირობითი სასჯელი შეეფარდება.
მრავლობითი ჭრილობებით გოგა ანჩაბაძე დიდი ხნის განმავლობაში იმყოფებოდა საავადმყოფოში. ახლა ის საპატიმროშია, მაგრამ თავს უდანაშაულოდ აცხადებს და აპირებს, თავისი სიმართლე სასამართლო პროცესზე დაამტკიცოს. მისი ადვოკატის, ალექსანდრე თათელიშვილის თქმით, ანჩაბაძე მხოლოდ მოწმეების ჩვენებების საფუძველზე დააკავეს, ანა ძაპტაშვილის სხეულსა და ტანსაცმელზე ჩატარებულმა არაერთმა ექსპერტიზამ კი დაადასტურა, რომ ძალადობის ნიშნები არ იკვეთება. საპირისპიროს ამტკიცებს კახა გულორდავასა და მისი ცოლის, ანა ძაპტაშვილის მხარე.
ბრალდებულის სასამართლო პროცესი 14 თებერვალს ზუგდიდში გაიმართება, მანამდე კი "სარკემ" ორივე მხარის ადვოკატებისგან სცადა გაერკვია, რა ეტაპზეა გაუპატიურების მცდელობის საქმე.
ალექსანდრე თათელიშვილი – გოგა ანჩაბაძის ადვოკატი:
– გოგა ანჩაბაძეს ორსული ქალის გაუპატიურების მცდელობას ედავებიან. ის კი ბრალს არ აღიარებს და თავს დამნაშავედ არ ცნობს. როგორც ამბობს და საქმეში არსებული მასალებიც ცხადყოფს, მას დანაშაული არ ჩაუდენია და, ბუნებრივია, არც აღიარა.
ამას გარდა, საქმეში გამომძიებლის მხრიდან სერიოზული დარღვევებია დაფიქსირებული. ანჩაბაძე უკანონოდ დააკავეს. მისი გაქცევის ან მიმალვის არავითარი საფრთხე არ არსებობდა. ის სერიოზულადაა დასახიჩრებული, რამდენიმე ოპერაცია ჩაუტარდა, ყური არ აქვს, ფეხი სპეციალურ სადგამში აქვს ჩადგმული. ასეთი ადამიანი გამოძიებას იქით სწერდა, მობრძანდით, საგამოძიებო მოქმედებაში მონაწილეობას მივიღებო და როგორ შეიძლებოდა მიმალულიყო?! სასამართლო პროცესზე პროკურორმა აბსურდული განცხადება გააკეთა, თითქოს იმის საშიშროება იყო, რომ ანჩაბაძე ოკუპირებულ ტერიტორიას შეაფარებდა თავს. როდის იყო, ადამიანი პროკურორს განცხადებით მიმართავდეს, საავადმყოფოდან გამომწერეს, სახლში ვარ, მობრძანდით საგამოძიებო მოქმედებების ჩასატარებლადო და თან ოკუპირებულ ტერიტორიაზე გარბოდეს?! მით უმეტეს, ყავარჯნებითაა და სასამართლო პროცესზე ათი ადამიანის დახმარებით შემოიყვანეს.
– თუ გოგა ანჩაბაძეს ეს დანაშაული არ ჩაუდენია, რატომ მიაყენეს ეს დაზიანებები, ყური რატომ აქვს მოჭრილი?
– დაჭრასთან დაკავშირებით სხვა სისხლის სამართლის საქმეა აღძრული კახა გულორდავას მიმართ.

– ანუ ეს დაჭრა კახა გულორდავას მეუღლის გაუპატიურების მცდელობას არ უკავშირდება?
– ეს ძალიან სერიოზული თემაა და ერთმანეთთან დაკავშირებისგან თავს შევიკავებ. ეს გამოძიების დასადგენია. ყველაფერი გაირკვევა, თუ რა მიზეზი იყო და როგორ შეიძლება კახა გულორდავამ ან სხვა პირებმა დასახიჩრების ფაქტი ახსნან. გულორდავას რა ინფორმაცია მიუვიდა და შემდეგ რა გააკეთა, არ ვიცი, მას არც ვიცნობ. ეს გამოძიებისთვის ძნელი დასადგენი არ იქნება.
– თავად გოგა ანჩაბაძე რას ყვება?
– ერთი შემიძლია გითხრათ, რომ გოგა ანჩაბაძე სერიოზულ სტრესშია. მორალურადაც ცუდ მდგომარეობაშია, ძალიან რცხვენია. როგორც ამბობს, ეს ყველაფერი შეთითხნილია და დანაშაული არ ჩაუდენია. დადგება დრო, როცა ჟურნალისტებს, სახალხო დამცველის აპარატიდან, არასამთავრობო ორგანიზაციებიდან ადამიანებს მოვიწვევთ და ყველაფერს ფარდას ავხდით.
– გამოცდილი ადვოკატი ხართ და თქვენთვის უცხო არ უნდა იყოს, რომ თითქმის არც ერთი დამნაშავე ბრალს არ აღიარებს. რა იქნება სასამართლოზე თქვენთვის ხელჩასაჭიდი გარემოება, რითიც იდავებთ, რომ ანჩაბაძე უდანაშაულოა?
– ეს ჩემი სტრატეგიაა და ვერ გავამხელ. საქმეში არსებული მასალები პირდაპირ მიუთითებს, რომ ანჩაბაძეს დანაშაული არ ჩაუდენია. თქვენ, როგორც ჟურნალისტს, გჯერათ, ადამიანმა ასეთი საშინელება ჩაიდინოს და არც ერთი ექსპერტიზის დასკვნის მიხედვით ამის კვალი არ ჩანდეს? არც ანაბეჭდის, არც მიკრონაწილაკების ექსპერტიზის შედეგად არ გამართლდეს ის, რაც ბრალში წერია? ჩატარებული რამდენიმე ექსპერტიზიდან ჩემი კლიენტის საწინააღმდეგო არც ერთია, პირიქითაა. თუ ის ქალი მის მანქანაში იყო და იქ ასეთი უბედურებები ხდებოდა, ბუნებრივია, რაღაცის კვალი უნდა ყოფილიყო – სხეულზე მიყენებული დაზიანებები თუ მანქანაში არსებული მიკრონაწილაკები. საქმეში მხოლოდ ირიბი, მოწმეების ჩვენებების საფუძველზე არსებული მტკიცებულებებია. ამ ჩვენებებს სასამართლო ჩემზე უკეთ გამოიკვლევს.
– როგორც ვიცი, ექიმის მიერ გაცემული ცნობა არსებობს, სადაც წერია, რომ ანა ძაპტაშვილს თმა ჰქონდა აგლეჯილი.
– არც ერთი მტკიცებულება საქმეში არ არის. რომელ თმის მოგლეჯაზეა ლაპარაკი? ეს ჟურნალისტურ გამოძიებას უფრო ჰგავს, ვიდრე სამართლებრივს. საქმეს მხოლოდ ლოგიკა არ შველის, მტკიცებულებებია აუცილებელი. არ შეიძლება გამომძიებელმა მხოლოდ მოყოლილი და გაგონილი დაწეროს. ყველაფერს გამოვააშკარავებთ და საზოგადოებას ვანახებთ.
ამ კაცის მიმართ ასეთი აგრესია ნუ არის, თითქოს მონსტრი და კაციჭამიაა. თითქოს 10 წლის განმავლობაში ქალებს ასე დასდევდა. ეს სირცხვილია! ის 10 წელი პოლიციელი იყო, კაპიტანი. გოგა ანჩაბაძის დახასიათება, ოფიციალური დოკუმენტები გვაქვს, ის წესიერად მუშაობდა, თავის მოვალეობას კეთილსინდისიერად ასრულებდა. ასეთი რომ არ ყოფილიყო, იქ არავინ გააჩერებდა. ძალიან პატიოსანი ოჯახი, შვილები, მეუღლე ჰყავს. დანარჩენს გამოძიება დაადგენს, ვინაა მართალი და ვინ ვის დასწამა ცილი. თუ გოგა ანჩაბაძე იქნება მტყუანი, მას ვერც მე ვუშველი. თუ ბრალი დაუმტკიცდა, თუ არ ვცდები, ამ დანაშაულზე 9–დან 12 წლამდე პატიმრობაა.
...
"სარკე" კახა გულორდავას ადვოკატ ჯიტა გულუასაც ესაუბრა. მან პროკურატურას საპროცესო შეთანხმებაზე მიმართა და პასუხი რამდენიმე ხანში გახდება ცნობილი.
ჯიტა გულუა – კახა გულორდავას ადვოკატი:
– კახა გულორდავა ამჟამად დაკავებული არ არის, მაგრამ ეს სასამართლო გამოძიების ეტაპზეა. თუ პროკურატურასა და ჩვენ შორის საპროცესო შეთანხმება ვერ შედგა, შეიძლება მოსამართლემ გულორდავას მიმართ პატიმრობაც გამოიყენოს. თუ საპროცესო შეთანხმება შედგა, ალბათ პირობით სასჯელსა და ჯარიმას დააკისრებენ.
– თუ კახა გულორდავას პატიმრობას მიუსჯიან, რამდენწლიანი სასჯელი ემუქრება?
– 3–დან 5 წლამდე. როცა საქმე ნაკლებად მძიმე დანაშაულთა კატეგორიას მიეკუთვნება, მოსამართლეს უფლება აქვს, 3 წელზე ნაკლებიც მიუსაჯოს.
– გოგა ანჩაბაძის სასამართლო პროცესს ესწრებოდით? ის თავს დამნაშავედ არ ცნობს.
– არ ვესწრებოდი. რამდენადაც ვიცი, ის დუმილის უფლებით სარგებლობს, ეს კი თავისთავად იმას ნიშნავს, რომ თავს დამნაშავედ არ ცნობს. არც მიკვირს, ასეთი საქმის აღიარება ძნელია. ყველა ყაჩაღი, ყველა ქურდი და ბანდიტი ამბობს, რომ მართალია. იმდენი მტკიცებულება გვაქვს, მაგის აღიარება ან არაღიარება არაფრისმომცემია.

– გოგა ანჩაბაძის ადვოკატი აცხადებს, რომ ექსპერტიზამ ძალადობის კვალი არ დაადასტურა.
– მე ანა ძაპტაშვილის ადვოკატი არ ვარ, მაგრამ ექიმის მიერ გაცემული დოკუმენტი ვნახე, სადაც მითითებულია, რომ ის თმითაა ნათრევი, თმა აგლეჯილი ჰქონდა. ერთ მხარეს ანას 9 ადამიანი ექაჩებოდა, მეორე მხარეს კი – გოგა ანჩაბაძე. ეს ჩემი ქალია, აქ შემოვიყვანე, თქვენ რა გინდათო, ყვიროდა. ძლივს გამოგლიჯეს გოგო ხელიდან. ამის მოწმეები არსებობენ. ეს ჩემს პრაქტიკაში პირველი შემთხვევა იყო, როცა მოწმეების ნაკადი არ წყდებოდა. ხალხი თვითონ მოდიოდა, ეს რომ ჩვენს შვილს, ჩვენს დას ვინმემ გაუკეთოს, გავგიჟდებითო. ასე რომ, კიდევ ერთხელ ვამბობ, გოგა ანჩაბაძის აღიარებას მნიშვნელობა არ აქვს. თან, ხომ იცით, ციხეში ასეთ დამნაშავეებს ძალიან ცუდად ხვდებიან, ამიტომ სათქმელად მაინც ხომ უნდა ჰქონდეს, არა, ბატონო, ეს მე არ ჩამიდენიაო, ეს მაინც ხომ უნდა თქვას?
ამ საქმეში იმდენად ნათელია ყველაფერი, რომ ანა ძაპტაშვილს ადვოკატიც კი არ ჰყავს, არც სჭირდება. არსებული მტკიცებულებები გოგა ანჩაბაძის დანაშაულზე მიუთითებს. მისი ადვოკატი გამოსავალს ეძებს და ყველაფერს ებღაუჭება, მისიც მესმის, ანჩაბაძისაც მესმის, ცდილობს, ამ უხერხულ ბრალდებას თავი დააღწიოს. როგორ შეიძლება ამდენი მოწმის ჩვენების უგულებელყოფა?! სხვათა შორის, გოგა ანჩაბაძე შემთხვევამდე რამდენიმე დღით ადრე კახასთან და მესამე მეგობართან ერთად ლუდს სვამდა, რა დროსაც წაუტრაბახია, ბიჭებო, აქ ისეთი მიყრუებული ადგილია, ქალები მომყავს ხოლმეო. რამდენიმე დღეში კი თავისი მეგობრის ცოლი აიყვანა. იქ მართლა ცუდი განზრახვით თუ ახვალთ, თორემ ისეთი ადგილი არ არის, რომ უბრალოდ შეისეირნო. რა ესაქმებოდა, რა უნდოდა იქ?
– როცა თქვენთან ინტერვიუ ჩავწერეთ, კახა გულორდავა სასამართლო დარბაზიდან სულ რამდენიმე საათის გათავისუფლებული იყო. მაშინ თქვით, რომ მასთან საუბარი ვერ მოასწარით. მას შემდეგ თუ ესაუბრეთ, რას ამბობს?
– მისი ბუნების ადამიანისთვის ძნელი ასატანია ის, რაც მოხდა, თუნდაც მეგობრის ასე დაუნდობლად ცემა. მითხრა, თვალს ვერ ვხუჭავ, კიდევ ვერ მომინელებია, ვერ ვაცნობიერებ, რომ ეს მართლა ჩემს თავს მოხდაო. როცა ცოლმა ამ შემთხვევის შესახებ უამბო, ვერ იჯერებდა, ერთი სული ჰქონდა, პირადად მეგობრისგან გაეგო ყველაფერი. მიამბო, როცა გოგა ანჩაბაძე შემხვდა, რამის კითხვა ვერც მოვასწარი, მითხრა, მოსაკლავი ვარ და მომკალიო, იმის შემდეგ არაფერი მახსოვს, იმდენად მხეცად ვიქეცი, მხოლოდ ის მახსოვდა, რომ არ უნდა მომეკლაო.
– ალბათ დამეთანხმებით, რომ არ შეიძლება ერთ დღეში ადამიანი ასეთ დამნაშავედ იქცეს. რას ამბობს კახა, მანამდე არაფერი შეუმჩნევია ანჩაბაძისთვის?
– არასდროს შემიმჩნევია, რომ ასეთი სისაძაგლეებს ჩადიოდაო. საქეიფოდ ერთმანეთის გარეშე არ მიდიოდნენ. კახა ძალიან საინტერესო ადამიანია, გიტარაზე კარგად უკრავს, მღერის, ცეკვავს, მის გარემოცვაში ყოფნა სასიამოვნოა. ახლა ანაც და კახაც ფსიქოლოგიურ რეაბილიტაციას საჭიროებენ.
– ადრე გვითხარით, რომ ანჩაბაძის მამამ ოლქის პროკურორს წერილობით მიმართა და გულორდავას გათავისუფლება ითხოვა. ახლა რა პოზიციაზე არიან ანჩაბაძის ოჯახის წევრები?
– მათთან კონტაქტი არ მაქვს, ამიტომ დეტალები არ ვიცი. როგორც გავიგე, მათ მეზობლებიც და ნათესავებიც ნაკლებად აკითხავენ.
...
ფეხმძიმე ანა ძაპტაშვილის მდგომარეობის შესახებ მისმა დედამ, რუსუდან ლომაიამ გვიამბო. როგორც მან გვითხრა, ძლიერი სტრესის და ძალადობის გამო ნაყოფს საფრთხე ემუქრებოდა, თუმცა გადარჩა.
რუსუდან ლომაია – ანა ძაპტაშვილის დედა:
– საბედნიეროდ, ნაყოფის შენარჩუნება მოხერხდა, მაგრამ ანა სტრესულ მდგომარეობაშია. მისთვის ძალიან მტკივნეულია ის, რაც ხდება, მიუხედავად იმისა, რომ მეუღლის და ოჯახის მხრიდან ყურადღება არ აკლია. კახა პატარა ბავშვივით უვლის, მაგრამ ანასთვის ძალიან რთული ეტაპია. ახლა მისთვის პირველ ადგილზე მისი ქმრის მომავალია, მხოლოდ კახას ბედზეა ორიენტირებული.
– რას ამბობს თქვენი სიძე?
– კახას თავის ემოციებზე საუბარი არ უყვარს. ის მიმტევებელია, მაგრამ ამ შემთხვევაში ძალიან უჭირს... გოგა ანჩაბაძის მიმართ მთელი ცხოვრება დარჩება ეს კითხვები: "რატომ? რისთვის?". თვითონ ამ კითხვაზე პასუხი არ აქვს. როცა კახამ ინტერნეტში სასამართლო სხდომაზე გადაღებული თავისი მეჯვარის ფოტო ნახა, თქვა, რომ ბავშვობიდან სულ სხვა გოგას იცნობდა და ასეთი სახე არასოდეს უნახავს. რითი უნდა იმართლოს იმ ადამიანმა თავი?! რა გამართლება აქვს ღვთის წინაშე, თავისი ოჯახის, ჩვენ წინაშე?!
ეკა ლემონჯავა, ჟურნალი სარკე